Poliisi erabudde ku banaagaana okudda awaka nga bamaze okulonda!

POLIISI eyongedde okulabula Bannayuganda nti bwe bamala okusuula akalulu kaabwe, badde awaka.

Egambye nti oyo, anaalemwa okugondera ebiragiro ebissiddwawo, y'anaamanya ekinaddirira.

Omulung’amya w'ebyobufuzi mu poliisi ,AIGP Ubaldo Bamunoba , agambye nti mu kiseera kino, ebimu ku bifo mwe balondera, byetooloddwa amaka g'abantu nga n'ebirala  babikoleramu emirimu, nga kiba kizibu abantu okugumba mu bifo ebyo kuba kitaataaganya abantu abalala.

Bamunoba , akakasizza Bannayuganda ng'ebyokwerinda bwe binywezeddwa, wakati nga twetegekera okulonda okutandika ku Lwokuna.

Agambye nti abaserikale ba poliisi, ab'amagye, abaserikale b'ekitongole ky'amakomera , abakuuma ebisolo { UWA} ne bambega okuva mu bitongole eby'enjawulo bonna bakolera wamu.

Agasseeko nti mu bano, mulimu abali mu yunifoomu ne mu ngoye ez’abulijjo era nga baatandise dda okulawuna ku bigere, ku pikipiki , n'abalala nga bali mu mmotoka .