Abeebijambiya balumbye omusuubuzi w'emmwanyi ne bamunyagako obukadde obusoba mu 100!

ABAZIGU abeebijambiya n'emiggo, balumbye omusuubuzi w'emmwaanyi  e Kassanda, ne bamunyagako ensimbi ezisoba mu bukadde 100.

Bino, bibadde ku kyalo Kitayiiya mu muluka gw'e Kamuseenene mu ggombolola y'e Kiganda mu disitulikiti y'e  Kassanda, bwe balumbye Everest Binikiro ne bamunyagako ensimbi 105,500,000/ .

Kitegeezeddwa nti ekiro nga beetegeka okwebaka, ekibinja ky'ababbi abaabadde n'ebijambiya , bamufumbikirizza mu ddiiro ne bamutwala mu kisenge wakati mu kufuuza ennyumba era obukadde 100 ne babuzuula mu kisero.

Kitegeezeddwa nti oluvannyuma, bakyukidde omukyala ne bamunyagako naye ensimbi obukadde 5 mu emitwalo 50, ne babulawo nazo.

Omwogezi wa poliisi mu Wamala Lamerk Kigozi, agambye nti poliisi yatuuse mangu mu kitundu era nga balina bye bazudde ng'okunoonyereza bwe kugenda mu maaso.