Poliisi ewadde abaserikale ebiragiro ebikakali mu biseera by'okulonda

POLIISI ewadde abaserikale ebiragiro okubeera obulindaala okwang’anga embeera yonna mu biseera by’okulonda  okusobola okuggwa obulungi wamu n’okukung’aanya amawulire ag’ekikessi.

Abaserikale nga bafuna ebiragiro.

Akulira ebikwekweto mu poliisi, Frank Mwesigwa bwe yabadde asisinkanye abaserikale abaduumira ebitundu okuli  Kampala n’emiriraano, Masaka,   Jinja Lugazi, Mityana ne Mpigi  abaserikale naddala abavunaanyizibwa okukkakkanya obujagalalo n’okwang’aanga embeera zonna ezitali ntebenkevu  balina okubeera obulindaala essaawa bina.

Yalagidde nti abaserikale balina essira okulissa ku kugaana enkungaana ezitakkirizibwa , okugumbulula abo abagezaako okuleeta okucankalana mu bwangu wamu n’okumaamira ebifo byonna ebimanyiddwa nti birimu obuzibu naddala abantu abangi.

Yagambye nti okukozesa eryanyi okugumbulira abagezaako okukola effujjo kulina okubeera mu mateeka era nga kusaliddwamu mu bwangu okusobola okuzza embeera mu nteeko.

Embeera y'ekibuga nga bw'eri ng'abaserikale bakirawuna.

Yategeezezza nti n’abaserikale abakung’aanya amawulire ag’ekikessi balina okubeera mu bantu okusobola okumanya ebikolebwa ng’essira baliteeka okumanya abo abagezaako okwekunga n’okusaasaanya amawulire ag’obulimba era nga okukungaanya n’okusaasaanya amawulire ag’ekikessi tekulina kuliimirira kuba kino kiyamba abaserikale okugenda mu bwangu aweetaaga obukuumi.

Yagambye nti era abaserikale balina okulawuna ebintu okusobola okwekenneenya embeera bw’eri nga kino kijja kuyamba okutangira abo abagezaako okwagala okukola efujjo.