Museveni yeebazizza Bannayuganda okumuyiira obululu

PULEZIDENTI Museveni alaze ebintu 10 by’agenda okutandikirako mu kisanja ekijja okulaba  ng’ayongera okutereeza ebyenfuna bya Bannayuganda n’alabula baminisita n’abakungu ba gavumenti nti bateekeddwa okukolera  abantu.
“Nsooka kwebaza Bannayuganda okwongera okunteekamu obwesige n’okundaga omukwano mu bitundu by’eggwanga byonna gye mpise era nsaba okubategeeza nti  ekisanja ekijja saagala muntu yenna agend kusigala nga mwavu. hhenda kuwagira abagagga bonna abali mu Uganda mu kiseera kino abakola ebitundu 70 ku 100 n’abaavu abakola ebitundu 30 ku 100 okulaba nti nabo bagaggawala,’’ Museveni bwe  ategeezezza.
Bino Museveni yabyogeredde mu maka ge e Rwakitura mu disitulikiti y’e Kiruhura eggulo ku Ssande bwe yabadde asisinkanye abakulembeze b’ekibiina kya NRM ab’oku ntikko (CEC) nga bali wamu ne ssaabawandiisi w’ekibiina kya NRM, Richard Twodong  n’abalala okumukwasa satifikeeti akakiiko k’ebyokulonda gye kaamuwadde okumukakasa nti ye yawangudde akalulu k’obwapulezidenti okutwalaUganda mu maaso mu kisanja ekya 2026 – 2031.
AGENDA KUKWATIZAAKO ABAGAGGA
Museveni yagambye nti mu kisanja ekijja, Bannayuganda abagagganga Hajji Basajjabalaba bangi era gavumenti egenda kubakwatirako ng’ebawola ensimbi okulaba nga batwala mu maaso bizinensi zaabwe kubanga bakola kinene okuwa Bannayuganda emirimu n’okuwa omusolo oguvaamu ssenteezikulaalakulanya   ggwanga.
Yagambye nti ku Bannayuganda abakyali abaavu abakola ebitundu 30 ku 100, agenda kunnyikiza ssente z’ateeka mu nkola ya PDM kubanga ekoze bulungi nnyo mu bitundu by’eggwanga ebisinga.
Yagambye nti ensi nga Japan terina mafuta g’esiima naye erina abantu abagezi mu bya ssaayansi nga be batukolera emmotoka ze tuyaayaanira okugula n’agamba nti kino naffe wano mu Uganda tukisobola era ekirungi tukitandise ng’abavubuka aba Kiira Motors kati bakola bbaasi z’amasannyalaze n’ebika by’emmotoka ebirala.
Yasuubizza okwongera amaanyi mu ‘bonna basome’ eri buli Munnayuganda, eby’obulamu, n’okulwanyisa enguzi.
ABALONZI BE OBUKADDE 10 TEBAALONZE
Museveni yasabye abalamuzi okwongera okusala emisango n’amazima n’okukomya ekibbattaka ku banaku n’agamba nti yandiba nga y’ensonga eyavuddeko bamu ku bammemba ba NRM abawera obukadde 10, obuteetaba mu kulonda.
“Mu May, 2025, NRM yawandiika bammemba baayo nga bawera obukadde 21, nga ku bano obukadde 18, baali batuuse mu myaka egironda naye obululu bwe nnafunye 7,946,772 obwakoze ebitundu 71.6 ku 100 bwabadde butono, ekitegeeza nti abataalonze
obukadde 10, ssinga nabo baalonze, ab’oludda oluvuganya bandibadde kati beekaabira.” Museveni bwe yagambye.
Yagambye nti agenda kusisinkana olukiiko lwa NRM olufuzi olw’oku ntikko [CEC] bazuule ekyagaanyi bammemba ba NRM okulonda. Museveni yasuubizza okukola enguudo n’okulaba nga baddaabiriza ezoonoonese n’alabula minisitule y’ebyenguudo   okukomya okuzigayaalirira ne ziwomoggoka.
Yagambye waakwongera okulaba nga Bannayuganda bafuna amazzi amayonjo, okutondawo emirimu nga bayita mu bamusigansimbi abatandikawo amakolero. Yagambye ssente z’amafuta zigenda kukola bintu binene nga enguudo z’eggaali  y’omukka, amasannyalaze n’ebirala.
Yasuubiza okuwa abavubuka 1,000, pikipiki z’amasannyalaze era agenda zikwasa Richard Twodong azigabe mu bitundu bya Uganda eby’enjawulo. Yeebazizza mukyala we, Janet Museveni ne ffamire ye essaala ze bamusabidde mu kiseera ky’okunoonya akalulu n’asobola okukuba enkuhhaana 143, era agenda ziwandiikamu ekitabo.
ATENDEREZZA ABEEBYOKWERINDA
Museveni yatenderezza ebitongole ebikuumaddembe okuli amagye, poliisi, eky’amakomera n’ebirala olw’okukuuma emirembe mu kalulu. Yagambye nti bannabyabufuzi abali ku ludda oluvuganya, abamu babi naye nga si bayeekera ate abalala babi ate bayeekera.
Yalabudde Bannayuganda obuteenyigira mu kutabangula ggwanga nti byonna bye bateekateeka abimanyi. Yawadde ekyokulabirako ky’abavubuka b’e Butambala abawagira Muwanga Kivumbi abaalumbye poliisi n’ejjambiya ne bakubwa amasasi agaabattiddewo n’agattako nti ekyo kikyali kituuza. Yagambye nga January 13, 2026
 waliwo ekibinja ky’abavubuka ba NUP abaali bateereddwa mu nteekateeka y’okulumba poliisi mu bitundu eby’enjawulo nga tebalangiridde Kyagulanyi batabangule
eggwanga naye byonna baabinogera eddagala.
Omukolo gwetabiddwaako abantu bangi okwabadde mukyala we, JanetMuseveni, muwala we Natasha Karugire, omumyuka wa Pulezidenti, Jessica Alupo, sipiika Anita Annet Among, omumyuka we Thomas Tayebwa, Hajji Moses Kigongo, Ssaabawandiisi wa NRM, Richard Twodong, akulira offiisi ya ssentebe wa NRM mu ggwanga, hajjat Hadijah Namyalo, Katikkiro wa Uganda Robinah Nabbanja n’abalala.