Omujaasi agambibwa okukuba omukozi w'ebbaala amasasi agamusse akwatiddwa

OMUJAASI agambibwa okukuba omukozi w'ebbaala amasasi mu Kampala, akwatiddwa poliisi.

Bino, bibadde ku bbaala ya Top Pub  ku luguudo lwa William Street mu Kampala wakati leero nga bukya, agambibwa okuba omujaasi bw'avudde mu mbeera n'akuba omusajja akola ogw'okusiimuula mu kifo ekyo amasasi agamusse.

Omu ku beerabiddeko , omujaasi ono ategeerekeseeko erya Rodger abadde anywera omwenge mu kifo ekyo nga bw'azannya n'omuzannyo gwa pool ne munne, ne bafuna obutakkaanya.

Kitegeezeddwa nti asoose kuva mu mbeera n'ava awabadde omuzannyo, n'agenda mu biyigo by'ekifo ekyo, nti era mu kiseera ekyo, omugenzi naye agenze okubaako emirimu gy'akolayo.

Ekiddiridde kubadde kuvuga kwa masasi nti bakozi banne bagenze okutuukawo , ng'omukozi ali mu kitaba kya musaayi wansi. Batemezza ku poliisi etuuse n'abajaasi ne bakwata omujaasi ne bamutwala.

Omwogezi wa poliisi mu Kampala , Recheal Kawala, ategeezezza nti abaserikale , baabadde bakyekenneenya ekifo ekyo , ng'okunoonyereza bwe kugenda mu maaso.

Emyaka egiyise mu kifo kye kimu era, waaliwo ettemu eryakolebwa , omujaasi mwe yakubira abantu amasasi agaabatta, bwe baafuna obutakkaanya.

Amyuka omubaka wa gavumenti mu Kampala, Shafick Nsubuga, alagidde abakuumi bonna mu kifo ekyo, bakwatibwe olw'okuleka abantu okuyingiza emmundu n'alagira n'okugira ng'ebbaalo eyo bagiggala.