Poliisi egaanyi abooluganda lwa Bobi okugenda mu maka ge e Magere

ABOOLUGANDA lwa Pulezidenti wa NUP Robert Kyagulanyi Sentamu balemeseddwa Poliisi okuyingira mu maka ge e Magere gye baabadde bagenze okumulabako ne famire.
Baganda ba Kyagulanyi okuli; Henry Ssentamu (Banjo man), Micheal Mukwaya (Mikie Wine) Irene Kayemba ne Catherine Namuleme, baatuuse e Magere mu ttuntu eggulo ku Lwokusatu nga bali mu mmotoka ssatu mwe baabadde batadde ebikozesebwa awaka omuli n'emmere.
Wabula nga babuzaayo mmita nga 50 okutuuka ku ggeeti y'amakaage, baasanze wasuuliddwaawo emisanvu gy’abaserikale ba Poliisi ab'ekibinja ekirwanyisa obutujju ekya Counter Terrorism (CT) abaagumba ewa Kyagulanyi, ne babagaana okweyongerayo.
Baagezezzaako okwogeraganya n'abaserikale kyokka ne bigaana era oluvannyuma baategeezezza Bannamawulire nti baalagiddwa okusooka okufuna olukusa lw'omuduumizi wa Poliisi. Wakati mu kwewuunaganya n'okukuba amasimu, essuubi ly’okutuuka awaka lyabawedde oluvannyuma lw'okulinda essaawa ezisoba mu bbiri! Baapondoose ne badda gye baavudde n'ebintu byabwe.
Omwogezi wa Poliisi mu Kampala n'emiriraano, Rachael Kawala bwe yatuukiriddwa ku nsonga eno, yagambye nti yeetaagamu obudde okusooka okwebuuza ku bakama be. Kyokka akola ng’omwogezi wa UPDF, Col. Chris Magezi bwe yabadde ku Palamenti ku Lwokubiri yategeezezza nti Kyagulanyi amagye tegalina kye gamwagaza, mpozzi nga Poliisi y'emuyigga.
Mikie Wine yasabye ebitongole by'ebyokwerinda okwamuka amaka ga muganda waabwe n'okumulekera eddembe lye n'ab’omu maka ge kuba si mumenyi w’amateeka.

Okuva ku kkono; Jonathan Erutu, George Musisi, Rubongoya, Muyizzi, Kakande ne Katana oluvannyuma lw’okulambula abasibe e Kitalya eggulo.

BANNAMATEEKA BA NUP BAKYALIDDE MUWANGA KIVUMBI MU KKOMERA E KITALYA
Bannamateeka ba NUP nga bali wamu ne Ssaabawandiisi w’ekibiina, David Lewis Rubongoya bakyalidde amyuka Pulezidenti wa NUP, Muwanga Kivumbi mu kkomera e Kitalya wamu n'abasibe abalala abamaze kati emyaka etaano mu nkomyo.
Balooya ba NUP okuli Samuel Muyizi, George Musisi, Jonathan Erutu ne Paul Kenneth Kakande baatuuse ku kkomera e Kitalya ku ssaawa nga 3 ez'oku makya ne bayita mu misoso gy'ekkomera ne balyoka bakkirizibwa okulaba Muwanga Kivumbi.
Bannamawulire tebakkiriziddwa kuyingira era oluvannyuma nga bamaze okulaba abasibe, Muyizi ne Rubongoya bannyonnyodde ku mbeera.
Muyizzi, yategeezezza nti ensonga enkulu eyabatutte e Kitalya kwe kufuna ebiragiro okuva eri Muwanga Kivumbi okulaba butya bwe bagenda okukwatamu omusango gw'obutujju ogumuvunaanibwa nga bali wamu ne bannamateeka abalala.
Bino biddiridde Muwanga Kivumbi okusimbibwa mu kkooti e Butambala ku Lwokutaano oluwedde n'aggulwako emisango gya nnaggomola okuli n'ogw'obutujju kyokka nga bannamateeka be tebaliiwo era akulira abalamuzi ba kkooti ento e Butambala, Deogratius Ssejjemba n'amusindika ku limanda e Kitalya okutuuka nga February 3, 2026
Muyizzi yagambye nti NUP egenda kufuna ttiimu ya bannamateeka ey’amaanyi okulwanirira Kivumbi kuba emisango egyamussiddwaako mijingirire. Rubongoya yagambye nti ng'oggyeeko okulaba Kivumbi, baalabye n’abasibe ba NUP abalala okuli Yasin Ssekitoleko (Machete) Gadafi Mugumya, Abddallah Kintu, Smart Grace Wakabi, Sharif Kalanzi n'abalala abamaze emyaka etaano mu kkomera n'ategeeza nti okusibwa kimu ku mitendera gya situlago era baakukola ekisoboka okulaba ng’abasibe baddamu okwetaaya.