Abagambibwa okutta ofiisa wa poliisi e Mukono balumirizza abaserikale okubatulugunyiza mu kkomera

Abavubuka bataano abagambibwa okutta eyali akulira poliisi y’e Ntawo e Mukono ne babba n’emmundu basimbiddwa mu kkooti y’amagye e Makindye ne bavunaanibwa, babasindise mu kkomera e Kitalya.

Abavunaaniddwa ye Labison Amutuhire ng’oluusi yeeyita Robinson olumu yeeyita Muleefu 28 mugoba wa boda boda ng’abeera Namataba Bweyogerere, Arafat Kasango 30 naye mugoba wa bodaboda, Daniel Alfonsi 26 ng’akola gwakukuba bbulooka, Daniel Okello 25 ng’abeera Kireku ne Joseph Innocent Luyirika 30 ng’abeera Ttula e Kawempe.

Abawawaabirwa mu kaguli ka kkooti

Omulamuzi wa kkooti y’amagye, Col Frederick Kangwamu emisango gyonna egyabasomeddwa ne bagyegaana.

Oludda oluwaabi lugamba nti nga November 23, 2025 mu Ntawo Cell e Mukono n’ettima ssaako ekigendererwa ekirowoozeddwako batta eyali akulira poliisi y’e Ntawo ASP Emmanuel Bagenda.

Omusango omulala ogubavunaaniddwa kigambibwa nti nga November 23, 2025 e Ntawo Banyaga omuserikale wa poliisi PC Joseph Kiyingi emmundu ye nnamba 56582735135369 n’amasasi gaayo 30 nga bino baabikola bakozesa emmundu SMG nnamba UPDF 48014555 n’endala UPSO 564211739.

Empaaba y’oludda ebasomeddwa era agamba nti abawawaabirwa era ku lunaku olwo baagezaako okutta omuserikale Joseph Kiyingi.

Omuwaabi wa gavumenti 2Lt Anthony Olupot ategeezezza kkooti nti okunoonyereza kukyagenda mu maaso n’asaba baweebwe obudde okukung’aanya obujulizi.

Munnamateeka w’abawawaabirwa Capt Daniel Kagombe abuulidde kkooti nti abawawaabirwa bajja kusaba okweyimirirwa gye bujja wabula baakubwa nnyo gye babadde bakuumirwa noolwekyo kkooti eragire baweebwe obujjanjabi obumala okwewala okwosa kkooti gye bujja nga beekwasa obulwadde.

Kyokka omuwaabi wa gavumenti, Capt Gift Mubehamwe ategeezezza kkooti nti byonna looya by’ayogedde bulimba era abasibe tebatulugunyizibwangako kubanga talina na bujulizi bw’aleese mu kkooti ku nsonga eyo. 

Omulamuzi Kangwamu alagidde bano batwalibwe e Kitalya kyokka bwe baba balina awabaluma wonna baweebwe obujjanjabi kubanga ddembe lyabwe okufuna obujjanjabi ssinga balwadde.

Bonna emisango bagyegaanye era kkooti n’ebasindika mu kkomera okutuusa nga April 1,2026.