Gavumenti egenda kuzza ennongosereza mu tteeka erirambika enkozesa y'omutimbagano

GAVUMENTI etegezeeza nga bwerina enteekateeka ekomyawo ennongoosereza mu tteeka erirambika enkozesa y’omutibagano erya Computer(Amendment) Act 2022 okukoma ku bakozesa obubi emitimbagano.

Kino Kiddiridde kkooti etaputa ssemateeka omwezi oguwedde okusazaamu ennongoosereza ezaali zakolebwa palamenti mu tteeka lino mu 2022.

Yasazaamu akawayiro aka 23, 26, 27, ne 29  oluvanyuma lwokutegeeza nti bwali butyoboola eddembe lya bantu eryokweyogerera

Kkooti munsala yaayo , yalaga nti mu budde ennongoosereza wezakolebwa,  palamenti yali teweza muwendo gw’ababaka  gulagirwa kusalawo ku kintu kyonna ekiyisibwa nga n’obuwayiro obumu obwayisibwa bumenya matteeka.

Omubaka Muhammad Nsereko(Kampala Central) eyali yaleeta ennongoosereza zino asabye Gavumenti etangaaze enteekateeka gyerina oluvanyuma lw’ensala ya kkooti.

Wadde ennongoosereza zaasaziddwamu, ssaabawolereza wa Gavumenti Kiryowa Kiwanuka yategeezezza ababaka nti eggwanga lirina amateeka agamala okukangavvula bonna abakozesa obubi emitimbagano.

Newankubadde yakakasizza nti amateeka agaliwo mu kiseera kino ebibonerezo ebirimu si byamaanyi nga  ebyali munnongoosereza ezaali zaakolebwa kyokka n'ategeeza nti mangu nnyo Gavumenti ereeta ennongoosereza empya mu tteeka lino era   minisitule ye y’ebyamawulire ,tekinologiya n’okulungamya eggwanga  yatandise dda okubaga ennongoosereza zino .

Yalabudde abaakuba gudiikudde era abagenda maaso nokozesa obubi emitimbagano bakimanye nti amatteeka wegali agasobola okubakwata era ebibonerezo nebibaweebwa.