Abadde yaakayimbulwa okuva mu kkomera asse mukwano gwe lwa kumusanga ng'apepeya ne muganzi we

OMUSAJJA abadde yaakayimbulwa mu kkomera, asanze muganzi we ng’apepeya n’omusajja omulala ku kyalo,ekimuggye mu mbeera n'atta omusajja mu bukambwe.

Abatuuze Nga Beetegereza Omulambo Gwa Munnaabwe.

Okusinziira ku mwogezi wa poliisi mu kitundu  kya Masaka East, Twaha Kasirye bakutte ssaaalongo Agustine Muhweza abayambeko mu kunoonyereza ku bigambibwa nti amanyi ku kutemulwa kwa musajja munne Richard Gwalu ng'entabwe eva ku mukazi Shamim Namata.

Kigambibwa nti Ssaalongo Muhweza abadde yaakayimbulwa ku kakalu ka poliisi e Lukaya ku misango emirala nti kyokka  bwe yakomyewo yasanze muganzi we Namata omutunzi w'ebbaala, yamukubako dda ekibaati, ekimuggye mu mbeera n'asalawo atte omusajja.

Ssentebe w'ekyalo kino Leonard Kyeyune ne Afizu Kawuki ow’amawulire baategeezezza nti omulambo gwa Gwalu abadde akola ogw'okusala endokwa z'emmwaanyi mu kitundu gwasangiddwa abamu ku batuuze abaabadde bakedde okukola nga guli kumpi n'akazigo Namata k’abadde akozesa ng'ebbaala.

Omulambo gwa Gwalu nga gulagamye we baagutidde. Wano embwa ya poliisi yabadde etandise okukonga olusu

Ssentebe yagambye nti okusinziira ku batuuze, Muhweza ne Gwalu ekiro baasoose kunywa mwenge nga n’ekyazzeeko kuyombera mukazi ono kyokka beekanze okukeera kumakya nga yakubiddwa omutwe ne bagubetenta.

 Kino kyawalirizza poliisi okutwala embwa yaayo ekonga olusu era olwavudde awaabadde omulambo yasibidde mu kazigo ka Namata kyokka ono yasangiddwa yakuttemu dda ebyanguwa ng'abuzeewo.

Muhweza Akwatiddwa Ku By'okutta munne.

Omwogezi wa poliisi Kasirye yayongeddeko nti banywezezza Muhweza nga bwe bayigga ne Namata babayambeko mu kunoonyereza ekituufu ekyavuddeko okufa kw'omuntu ono.

Omulambo gwaggyiddwawo ne gutwalibwa mu ggwanika e Masaka okwekebejjebwa kyokka abatuuze baalaajanidde be kikwatako okwongera ebyokwerinda mu bifo eby'obulabe bye basonzeeko mu kitundu.