Abakungu ba Gavumenti balwanidde ekifo mu kakiiko

ABABAKA ba palamenti ku kakiiko akavunaanyizibwa okulondoola entambuza y’emirimu mu bitongole bya gavumenti(COSASE)  beerabidde katemba atali musasulire abakungu ba gavumenti mu kitongole ekivunaanyizibwa ku yinsuwa ( Insurance regulatory authority) bwe batandise okulwanira ekifo.

Baabadde balabiseeko mu kakiiko kano okubaako bye bayanukula ku lipooti eyabakolebwako omubalirizi w’ebitabo bya gavumenti mu mwaka gw’ebyensimbi 2024/2025.

Muwada Nkunyingi N'omumyuka We George Musisi Nga Beetegereza Ebbaluwa

Eyakulembeddemu ekitongole yeyanjudde nga akulira ekitongole kino , Protazio  Sande era nga y'abadde atudde kumpi ne ssentebe w’akakiiko wabula omu ku bantu beyatambudde nabo eyasembyeyo yeyanjudde nga Ibrahim Kaddunabbi Lubega.

Kino kyawalirizza ababaka okulagira Sande ne Ibrahim okunnyonnyola engeri buli omu gyeyafunamu obukulembeze buno okusobola okuzuula omutuufu alina okwanukula ku bibuuzo ebiri mu alipoota oluvanyuma lw’okutegeeza nti ekitongole tekiyiiznza kubeera na bakulembeze babiri

Protazio Sande Nga Bamukubisa Ebirayiro

Sande, okujja ku kifo ekyo yategeezezza nti yakakasibwa minisita ow’enkalakkalira mu minisitule y’ebyensimbi Ramathan Ggoobi kyokka Kaddunabbi neyeerema okuva mu offiisi ng’aliko n’ebimu ku bintu by’ekitongole bye yawamba.

Ebbaluwa eyamukakasa yasoose ku mubula kyokka oluvanyuma omumyuka wa kamisona mu minisitule y’ebyensimbi Dr. Bob Munene naakakasa nga bwajireese.

Kaddunabbi yawuniikirizza ababaka bweyakikaatirizza nti y’akulira ekitongole oluvanyuma lw’okunnyonnyola nti kontulakiti ye bwe yali tennagwako yaddukira mu kkooti enkulu nga 29 May, 2026 ebeereko ensonga zebabbabatunulamu.

Era n'akiddamu nti olw’okuba kkooti tennawa nsala yaayo ku nsonga ze y’akyakulira ekitongole kubanga ba looya b’ekitongole ne Sande bonna ensonga bazimanyiiko.

Ibrahim Lubega Kaddunabbi Ng'alaga Ebbaluwa Ya Kkooti Eyaweebwa Ba Looya B'ekitongole Ne Sande

Kino kyawalirizza akola nga akulira akakiiko ak’okuntikko akatwala ekitongole kino, Keto Kayemba okutegeeza nti Sande okuweebwa obuvunaanyizibwa nga 1 June, 2026 , kontulakiti ya Kaddunabbi yali ya ggwaako 21 May 2026.

Akaseera Sande weyalondebwa , ababaka baazudde nga omuwandiisi ow’enkalakkalira Ggoobi yali talina buyinza mu budde obwo kubanga yali tannaba kukakasibwa pulezidenti.

Baazudde nga waaliwo okupakukira mu nsonga so nga n’aggyibwako obuvunaanyizibwa si mwetegefu ku buwaayo , akakiiko kasazeewo okuddamu okubasisinkana nga ne Ggoobi waali.