PLU eraze gw'eyagala adde mu kifo kya Gen. Moses Ali

PLU eleese Daniel Izale mu kifo kya Gen. Moses Ali.

Ekibiina kya Patriotic League of Uganda (PLU) kireese Daniel Izale okukwata bendera yaakyo mu kalulu k'okujjuza ekifo ky'omubaka wa Adjumani West, omwali Gen. Moses Ali eyafa omwezi oguwedde.

Basaliza (ku kkono) Ng'ayogera Ne Izale Oluvannyuma Lw'okuteekayo Empapula Ku Kifo Ky'omubaka W'e Adjumani

Izale yabadde awerekeddwako abakulembeze n'abawagizi ba PLU, okuli Henry Basaliiza, omumyuka wa ssaabakunzi w’ekibiiina, ne Frank Mwesigye, omu ku bakunzi n'abakulembeze abalala, okuva ku kitebe kya PLU e Naguru.

Kino kyabaddewo ku Lwokusatu, August 12, 2026. Basaliiza yagambye nti PLU yasalawo okuleeta Izale kubanga bamulaba ng'omuntu alina obusobozi okuddukanya emirimu Gen. Moses Ali gye yakolanga.

Izale Ng'awaayo Obukadde 3 Obw'okusunsulwa

Basaliiza yagambye nti Gen. Moses Ali yali mukulembeze omunyiikivu era eyali asobola okutuuka ku bantu n'okubakung’aanya, nga bino bye bimu ku bintu PLU bye yatunuulira mu kulonda Izale.

Yagambye nti Izale bamulinamu obwesige nti asobola okugenda mu bigere bya Ali n'okwongera ku nkulakulana y'abantu b'e Adjumani West.

Frank Mwesigye, omu ku bakulembeze abaakulembeddemu enteekateeka y'okwanjula Izale, yagambye nti Izale musajja agumira ku nsonga era ayagala ennyo okukolagana n'abantu.

Mwesigye yagambye nti PLU emulinamu obwesige nti agenda okuyamba okunyweza obumu n'enkulaakulana y'abantu ba Adjumani West.

“Ffe aba PLU tumanyi Izale ng'omuntu asobola okugumya obumu n'okuleeta enkulaakulana mu bantu ba Adjumani West,” Mwesigye bwe yagambye.

Izale mubazi wa bitabo era munnabizinensi. Alina ddiguli eyookubiri mu Business Administration gye yafunira mu Makerere University Business School (MUBS).

Akakiiko k'Ebyokulonda, Electoral Commission, kaategekedde akalulu k'okujjuza ekifo kino okubaawo nga September 17, 2026.

(Ebifaananyi bya Isaac Nuwagaba)