Minisitule y’Ebyenjigiriza etandise enkola empya okutendeka abayizi eby’endiisa

MU kaweefube okutumbula ebyendiisa n'omutindo gw'emmere etundibwa ku katale, Ministule y'Ebyenjigiriza ekkaanyizza n'ab'amatendekero agawaggulu okutandika okusindikanga abayizi abasomye eby'emmere n'ebyendiisa  ababeera banaatera okutikkirwa mu kampuni ez'enjawulo ezikola eby'okulya bongere  okufuna obukugu mu by'emmere .

Bino byatuukiddwaako mu kutongoza enkola eno empya mu matendekero agawaggulu ku mukolo ogwayindidde e Kololo mu Kampala nga gwategekeddwa ekibiina ekivunaanyizibwa ku by'endiisa, ekya ' GAIN Uganda' .

Akulira ekitongole kya GAIN mu Uganda, Damali Ssali wamu ne kominsona w'Ebyenjigiriza John Ochira na bannabyanjigiriza abalala mu kutongoza enkola eno empya

Kominsona mu Minisitule y'Ebyenjigiriza John Ochira yannyonyodde nti ekyenjawulo ku nkola ebaddewo kiri nti ku mulundi guno abaddukanya amatendekero agawaggulu be baggya okusabiranga abayizi ebifo mu kampuni gye banaagendanga okwongera okubangulwa ku bikwatagana n'ebyendiisa era bannannyini matendekero abayizi gye bavudde kijja kuba kibakakatako okufaayo ennyo okulondola n'okumanya abayizi bye basomesebwa.

Akulira yunivasite ya Kyambogo, Polof. Elly Katunguka, yalaze essanyu nti enteekateka eno etandikidde mu yunivasite gy’akulira, era abayizi baakusindikibwa nga mu makampuni ago okumalayo wakati w’emyeezi 2 ne 3, okusinzira kw’oli ky’asoma, era mumativu nti abayizi abamu bajjanga kufunayo emirimu oba okwegomba nabo ne batandikawo ebyabwe .

Akiikirira ekitongole kya GAIN mu Uganda, Damali Ssali yannyonnyode nti basanyufu okulaba nti enteekateka eno Minisitule y'Ebyenjigiriza saako ne ofiisi ya Kattikiro w'eggwanga bagikkiriza.

Bo nga ab'ebyendiisa kye basinga okwagala okulaba nti emmere etali yabulabe esasaanira akatale bannansi basobole okusigala nga balamu bulungi.