Omuwendo gw’abayizi abatudde ebigezo gweyongedde e Kalangala

Omuwendo gw’abayizi abatudde ebigezo by'ekyomusanvu okwetoloola ebizinga bye Ssese mu disitulikiti ye Kalangala gweyongedde obungi obutafananako n’emyaka egyiyise. 

Ku mulundi guno Kalangala etuzizza abayizi 554 okusinziira ku alondoola ebyenjigiriza Ronald Mutebi era ategeezezza nti ebigezo bituusiddwa ku masomero ag'enjawulo mu budde olw'embeera y’obudde okubeera ennungi. 

“Okuggyako okusomozebwa mu bbeeyi y’amafuta eyekanamye naye ebigezo tubituusizza bulungi wonna mu bizinga era abayizi batandikidde mu budde,” Mutebi bwategezezza.

Abakulu b'amasomero okubadde David Tusubira ne Ignatius Muddu bategeezezza nga abayizi bwebabatesetese obulungi era nti tebafunyemu bambuto wadde abazze n'abaana nga bayonka. 

“Tusuubira nti abaana baffe bajja kukola bulunji kubanga bazze batekebwatekebwa abasomesa abenjawulo ate abakugu,” Tusubira bwayongeddeko. 

Weziweredde saawa satu ez’okumakya abayizi bonna babadde bamaze okutandika ekibuuzo kyaabwe ekisooka eky’okubala.