Ow’emyaka 70 azaire abarongo.

N’ebya Agnes Kyotalengerire 

Omukazi w’emyaka 70 omanyirwe nka Safinah Namukwaya, akozire ekyafaayo bwanyima y’okuzaara abarongo.

Omushaho arikuragurira omwe aha baana ba Namukwaya.

Namukwaya ashemereziibwe ah’eirwariro erya Women's Hospital and International Fertility Centre omuri Bukoto, Kampala kuza kumwihamu abaana aba. Namukwaya azaire abarongo ( omwojo n’omwishiki) nyomwebazyo Orwakashatu ebiro 29/11/2023 kandi buri omwe abaire naremera 1.7kg

Omushaho arikuragurira omwe aha baana ba Namukwaya.

Dr Edward Ssali, Omushaho mukuru omu kuzaarisa ah’eirwariro eri ahamize ngu abaana na nyina boona baine amagara marungi.

Ogu gubaire guri omurundi gwa kabiri, Namukwaya, omutuura w’omu kyaro kya Nunda omu muruka gwa Lwabenge omu gomborora eya Buyiisa omu disiturikiti eya Kalungi kugira enda kandi hati abaasize kuzaara.
 

Safina Namukwaya 70 aine omushaho ah'eirwariro erya Women Hospital And International Fertility Centre Bukoto ahi azaariire abarongo be bwanyima y'okushemezibwa.

Namukwaya abaasize kugira enda egi kumara wiiki 31 kuhisya ebiro 5 ebihingwire obu Namukwaya ahairwe ekitanda ah’eirwariro ry’abakazi erya Women’s Hospital and International Fertility Centre omuri Bukoto. Abashaho batandikire kumureeberera n’okumuteebekanisa kushemezibwa kureeba ngu babaasa kumwihamu gye abarongo be.

Namukwaya akagira enda y’okubanza yazaara omwana w’omwishiki obwo arikushemezibwa ah’eirwariro erihango erya Masaka omu kwezi kwa 6 omu mwaka gwa 2020. Okutunga omwana we w’okubanza kukaijaho bwanyima y’okumara emyaka 47 arikuronda omwana.

Namukwaya akabanza kushwerwa aha myaka 15 omu mwaka gwa 1973. Akaija yagira enda beitu ekaija yarugiramu aha wiiki 22. Taragarukire kutwara enda endijo kandi akaguma nashaasha arikuza omu nshonga z’abakazi. Bwanyima y’emyaka 9, akakyeberwa bashanga ngu enshekye ze zikigara kandi akatwara ah’eirwariro erya Masaka kuragurirwa. Akaija yateerera kandi n’obusaasi obu yabaire natunga bukakira yatandika kugomoka. Eky’obusaasi taragarukire kugira enda.

Ahabwa Namukwaya obutazaara, omushaija we akashwera omukazi ondiijo yamuzaarira abaana. N’obu abaramu bagumire nibamujuma ngu n’engumba, omushaija we akaguma namukunda kandi arikumuheereza ekitinisa ahabw’emicwe mirungi ei yabaire aine. Namukwaya naagira ngu ekiteekateeko ky’okwanga tikiramwiziremu kandi akacwamu yatandika kureeberera abaana ba muk’iba.

“Ekiteekateeko ky’obutatwara n’obutagira baana kikaguma nikinteganisa kandi nkaba ntaine ky’okukora ahabw’okuba nkaba ntaine esente z’okutaho oburyo kureeba nanye natunga omwana,” Namukwaya arikushoborora.
 
Eky’obusaasi, omushaija we akaija yarwara ekitarareine kandi akafa bwanyima ya wiiki emwe. Hoona nabwo, Namukwaya tararugire mu maka gye. Omushaija we ku yamazire kufa, Namukwaya yatunga omushaija ondiijo. Akahika nagambira omushaija we omusya ngu akaremwa kuzaara beitu akaikiriza kumushwera n’obu yabaire atarikuzaara.

Namukwaya akaruga omu maka g’omushaija we owafiire. Omushaija we omusya, Badru Walusimbi, akamwombekyera enju. Ababiri bakatandika kuronda omwana. Eky’omugisha omurungi, Namukwaya akagambiraho munywani we nk’oku yaremirwe kutwara, owamuhabwire kuza omu eirwariro ry’abakazi akabaasa kutunga obuhabuzi bw’abashaho.

Munywani we akahamiza Namukwaya ngu bwanyima y’okuza omu eirwariro bakamutamu amaizi g’omushaija naija kuzaara. Na bwanyima, akarangiirira Namukwaya eirwariro ery’okutamu abakazi abarikuba baremirwe kuzaara amaizi g’abashaija.

Omu kwezi kwa 7 omu mwaka gwa 2018, Namukwaya akaza ah’eirwariro eryo ahi bamukyebiire bakashanga ngu enshekye ze zikigara.

Namukwaya akaheebwa omubazi kandi na bwanyima akaija yatwara bwanyima y’okumutamu amaizi g’omushaija omu eirwariro (In vitro fertility treatment). Akaija yaaza kukyebeza enda kandi ebyarugire omu kumukyebera bikaba nibyoreka ngu aine enda ahi ahendiire azaire abarongo (Omwojo n’omwishiki).

#WestUpdates