Ebya S.4 byatandika gye oihireho enjura eyateganisa abeegi

Ebya S.4 byatandika gye oihireho enjura eyateganisa abeegi

N’ebya Thomas Tumwebaze

KAGADI:

Abeegi ba S.4 omu disiturikiti ya Kagadi eriizooba bayegaita ahabeegi abandi omu eihanga ryona okutandika ebigyezo byabo eby’akamaririizo ebya UCE omunjura y’amaani obwo barikutandika na Geography Paper 1 na Geography Paper 2.

Enjura eyatandika aha shaaha 11 z’akasheeshe yaaba erihakye kuremesa abamwe kukora ebibuuzo byabo beitu kandi bagigumira n’obu bamwe baremesibwa kukora ekibuuzo ekyokubanza.

Ah’eishomero erya London Fountain of Hope SS, ahabeegi 136, abeegi 134 nibo bashutamira ebigyezo kandi 2 babura.

Christopher Kusiima, orikukurira eby’obwegyese ah’eishomero eri naagira ngu abeegi babiri aba tibaha enshonga ahabwaki bayosha kandi ngu bagyezaho okubaronda baremwa okubatunga.

Kusiima naagira ngu nk’eishomero nibaza kugumizamu okubaronda okwenda kwetegyereza enshonga ahabw’enki batashutamira ebigyezo byabo eby’ahamuheeru.

Ah’eishomero erya Bunyoro SS, Kagadi ahabeegi 102, abeegi 101 nibo abareebekaho kandi omwe tiyakora bibuuzo n’obu abazaire be bahamiize eishomero ngu naija kukora ebigyezo bye.

Robert Ssemate, mukuru w’eishomero erya Bunyoro SS, Kagadi

Robert Ssemate, mukuru w’eishomero erya Bunyoro SS, Kagadi naagira ngu hariho orikurinda ebigyezo ebi oizire ah’eishomero rye akyererirwe beitu kandi yamubinga ahabw’okutiina okuteganisibwa.

Ho ahari Kagadi People’s SS na Kagadi SS, abeegi boona babaho kandi bakora gye ekigyezo ky’okubanza bateine kuteganisibwa kwona.

Gonzaga Mugabi, mukuru w’eishomero erya Kagadi People’s SS naagira ngu abeegi baabo boona 58 bakoora ebigyezo kandi ngu tihaine oine ekizibu kyona.

Mugabi naagira ngu batebeekanise gye abeegi baabo okukora ebigyezo ebi.

Abeegi abariyo nibakora ebigyezo abagambaho na TV West nibagira ngu babandize kutiina embeera z’ebigyezo beitu kandi kubahika bamanyiira kandi nikwe kugira ngu nibamanya ngu nibaza kukora kurungi.

Aba nibagira ngu enjura yaaba nyingi beitu kandi bagyezaho bahiika aha myanya ei barikukorera ebigyezo omu bwire.

Omu mashomero agandi agetoroire etauni eya Kagadi, nka Kagadi Academy, Kagadi Progressive SS, Naigana SS, United Progressive hamwe n’agandi  ebya S.4 naho byatambura gye.

#WestUpdates