Buuza omusawo

K M

Eddagala eriweweeza ku  kawuka ka siriimu erimu  liba ly’amaanyi nnyo ne liba nga lyokya obutofaali bw’omubiri gw’oyo abeera alikozesa.
Kino kireetera akabubi k’omubiri ak’oku ngulu akaba  akalebevu ennyo gamba ng’akoku maaso, amatu, ebyenda,  ebitundu by’ekyama  ssaako emimwa okukosebwa.

Akabubi ako bwe kamala  okukosebwa, ekitundu ekyo kiyinza okufuna amabwa naye ng’amabwa ago gasigala wansi waako nga tegaggyewo lususu lwa ku ngulu  era abamu ne bamyuka ebitundu ebyo gamba ng’emimwa.

Waliwo  eddagala eriyitibwa  “antifungal oba  antibiotics” eriweebwa omuntu ng’alina ekizibu ekyo.

Wabula olina  okukitegeera  nti si buli muntu alina  emimwa emimyufu y’abeera n’akawuka  ka siriimu. Waliwo  abantu ababeera  baazaalibwa  bwe batyo nga bbo  emimwa gyabwe mimyufu. 
 
Njawukane n’omukyala kuba alina siriimu?
Mukazi wange ali lubuto. Yazuulibwa n’akawuka ka siriimu ate nga nze sikalina. Twawukane nsobole obutakwatibwa bulwadde? J M.

Ekya mukazi wo okuba  nga yakeberebwa n’asangibwa n’akawuka ka siriimu tekikuleetera kwawukana  naye. 
Jjukira  nti  omukyala bw’aba olubuto aba  yeetaaga nnyo obuyambi bwa bba.

Mu ngeri y’emu ne bw’amala okuzaala asigala  abwetaaga ate nga  n’omwana gw’aba azadde abeera yeetaaga  omukwana gwa nnyina  ne  kitaawe.
Waliwo embeera mu bafumbo  eyinza okubaawo ng’omu akawuka ka siriimu kalabika mu musaayi ate omulala ne katalabika. 

Mu mbeera eyo, atakalina era asobola bulungi  okusigala nga takalina  singa aba akozesa kondomu buli lwe beegatta n’omukyala.

Eky’okwawukana  ne  mukyala wo tekijja  kukuyamba oba tosobola  kumugamba  kukozesa  kondomu  waakiri  mutwale  ew’omusawo amuwa eddagala ly’akozesa  y’ajja  kukimugamba

Okwesasuza ng’osaasaanya siriimu oba weesimira bunnya
Abantu abamu bwe bamanya nti balina akawuka ka siriimu baggwaamu amaanyi.

Abamu batandika okuganza abantu abawera nabo beesasuze nga bongera okusiiga abalala siriimu.

Enkola eno nkyamu nnyo kuba oba weereetera mitawaana. Oba oyongera kunafuya mubirigwo kuba oba okombooza endwadde okuva ku buli muntu gwe weegatta naye.

Olina kwekuuma na kuba mwesimbu omubiri gwo gusobole okuba n’amaanyi.