TOP
  • Home
  • Essomero
  • Ssesimba yaakawandiika ebitabo 5 ku myaka 20!

Ssesimba yaakawandiika ebitabo 5 ku myaka 20!

By Silvano Kibuuka

Added 12th December 2016

Agamba nti yatandika okuwandiika ebitabo ku myaka 12 ng’ali mu P6.

Leta1 703x422

Ssesimba ng’alaga ekitabo kye ekyasooka.

MAHAD Ssesimba ayinza okuba omuwandiisi asinga obuto mu Uganda. Ku myaka 20 gy’alina yaakawandiika ebitabo by’Oluganda bitaano!

Agamba nti yatandika okuwandiika ebitabo ku myaka 12 ng’ali mu P6. Ssesimba alina ekitone ky’okuwandiika era mu mwoleso gw'ebitabo ku lunaku lw'ennimi ennansi mu nsi yonna ogwabadde ku National Theatre gye buvuddeko yagambye nti ekitabo kye ekisooka kye yatuuma, Eddoboozi Lya Buganda eky’emiko 40 yakiwandiikira mu P6.

“ Bwe nnali omuto, nnawuliranga abavubuka nga bakyamya Oluganda mu njogera, kwe kwagala okubaako bye ngolola n'okubawabula waakiri bwe baba baliko bye baagala okwogera nga tebabimanyi basooke beebuuze. Okugeza mpulira bangi abagamba nti, ‘Sijja Lya’, ng'ategeeza nti ‘sijja kulya’.

Enkoko tezaala wabula ebiika oba okwalula; embwa teba na mulambo wabula omutulumbi n’ebirala.

Bino byonna bye nassa mu kitabo ekisooka nga nange awamu nneebuuza. Ekitabo kino era kirimu okusiima Ssekabaka Sir Edward Muteesa II eyalwanirira ennyo Obuganda mu biseera ebizibu.

Muka kitange Lumbe ky’ekitabo kyange ekyokubiri kye nnakiwandiikira mu S 2 mu London College e Nansana.

Kibuulirira baka bakitaffe okwagala abaana be basanze awaka kubanga bwe babayisa obulungi bayinza okubayamba nga bakuze. Bangi abagwa mu kiti kino abaawula abaana ku bakitaabwe nga kiggya bangi mu ssomero.

Kyongerako okubuulira abazadde okuleka abaana baabwe okusoma emisomo n'okukola emirimu gye baagala mu bulamu bwabwe so si kubasibako bo abazadde bye baagala kubanga bangi bibalemerera.”

Ebitabo ebirala Ssesimba by’awandiise mulimu Nsimattuka Amagombe ekiteebereza obulamu omuntu bw'ayinza okuyitamu ng'ali emagombe era ekibuulirira okukolerera obulamu obuddako. Kino kya miko 160.

Waliwo Obutamanya bwe Buyiggisa Embwa Effumbe. Kino kirambika embeera eya bulijjo gye tuyitamu ng'abantu abandibadde abooluganda bagugulana mu butamanya.

Ekikyasembyeyo akituumye Empologoma ku Nnamulondo ky’awandiise ng’ali mu S4. Kikwata mu bukyayi abantu bwe balaga Obwakabaka naddala obwa Buganda ne kibuuza n’ekibuuzo ekisoomooza: Ggwe kiki ky'okoze okuyimirizaawo n'okukuuma ekitiibwa kya Buganda?

“Kati mpandiikayo ekitabo ekirala, Obuddu mu Nsi Yange n’eky’Olungereza kye mpise, I Wish, ekiraga engeri abantu gye bayita mu nsi ey’okwekubagiza n’okwejjusa.

Ekirala, Yields Of My Seeds kiyigiriza abavubuka okukozesa obudde bwabwe mu ngeri gye basobola okuganyulwamu nga bakaddiye. Kisomesa omuvubuka okwagala eddiini ye, okwegerera nga bagenda mu beetiingi oba okwekatankira amagengere,” bw’agamba.

Ssesimba agamba nti by’awandiika abiggya mw’ebyo by’alaga ne by’awulira eyo gy’aba atambulidde. “Okugeza bwe ndaba owa bodaboda ng'avuga endiima nfuna ekirowoozo nti ayolekedde akabenje, okufiirwa obulamu n'ebintu.

Olwo bwe ntegereza nga nnyinza okuwandiikako ekitabo ekiyamba omuntu ng’ono nga nkikola,” bw’agamba.

Agamba nti talyerabira jjajjaawe Saidat Nabukenya eyamukuza era eyatunda ente ye ku 300,000/= ze yamuwa okukubisa ekitabo kye ekyasooka ng'abantu bangi baali bagaanyi okumuyamba.

Kitaawe ye Isma Kiyemba Birungi, makanina wa mmotoka mu Nyendo e Masaka ate nnyina ye mugenzi Mariam Kizza eyafa mu 2002.

Yasomera mu Kimanji P.S e Kalangala; Victory Town School e Kyazanga mu Lwengo; London College Nansana omwaka oguwedde nga kati ali mu S5 ku Kololo High School gy’asoma History, Luganda ne Divinity.

Yeebaza Ssentebe wa disitulikiti y’e Lwengo, George Mutabaazi, kansala Mark Turyejuka owa Lwengo ne Moses Musasizi owa MK Publishers b’agamba n ti bamuyambye okukuza talanta ye ey’okuwandiika.

“Nsoma nnyo obutabo, ate kati njiga n'okuzannya katemba n'okuwandiika emizannyo mu kibiina kya Tendo Sisters ne mu Honest Film Productions.’, bw’agamba.

More From The Author

Emboozi z’omuwandiisi endala

Emboozi endala

3f74e568a3684a1eac5d6d555644365318 220x290

Magufuli alagidde abaddukanya ekidyeri...

OMUWENDO gw’abantu abaafiiridde mu kidyeri mu nnyanja Nnalubaale gwongedde okulinnya! Pulezidenti wa Tanzania John...

Sevo 220x290

Ab'e Rubirizi basabye Museveni...

ABAKULEMBEZE b’omu disitulikiti y’e Rubiriizi basabye Pulezidenti Museveni okukoma ku bajaasi ba UPDF okukendeeza...

Budgetkasaijaweb 220x290

Bawera kusimbira kkuuli enteekateeka...

ABABAKA ku kakiiko ka palamenti akavunaanyizibwa ku byobulimi bawera kusimbira kkuuli enteekateeka z’okuyisa embalirira...

Kola 220x290

Mukolerere obukadde bwammwe - Minisita...

MINISITA omubeezi ow’ebyenguudo Gen. Edward Katumba Wamala akubirizza abantu okukolerera obukadde bwabwe nga bakyalina...

42312484102150760182472974931861717081653248n 220x290

Bobi Wine eby’okutulugunya abantu...

BOBI Wine ne banne eby’okubatulugunya babitutte mu kibiina ky’amawanga amagatte (UN ), era boongedde okukungaanya...