TOP

Palamenti eragidde ku bbanka ezizze ziggalwa

By Ahmed Mukiibi

Added 29th November 2017

PALAMENTI eragidde ofiisi ey’omubazi omukulu ow’ebitabo bya Gavumenti okukola okunoonyereza okw’omuggundu ku ngeri Bbanka Enkulu eya Uganda gy’ezze yeddiza, okuddukanya n’okutunda bbanka ez’obwannannyini z’ezze eggalawo mu myaka egiyise.

Man1 703x422

Kasekende (ku ddyo) ne Suzan Kanyemibwa omuwandiisi wa Bbanka Enkulu.

Ababaka abatuula ku kakiiko ka Palamenti akalondoola ebitongole bya Gavumenti akayitibwa, Commissions, Statutory Authorities and State Enterprises (COSASE) baasazeewo eggulo nti Bbanka Enkulu enoonyerezebweko kubanga bafunye okwemulugunya okw’enjawulo n’entuumu z’ebiwandiiko ebiraga emivuyo n’obutali bulambulukufu mu ngeri banka ezizze ziggalwa Bbanka Enkulu gye ziddukanyiziddwaamu n’okutundibwa.

Kino ababaka aba COSASE nga bakulirwa ssentebe waabwe, Abdul Katuntu (Bugweri-FDC) baakisazeewo bwe baabadde basisinkanye ttiimu ey’abakungu Bbanka Enkulu abaakuliddwaamu omumyuka wa Gavana, Dr. Louis Kasekende.

Mu nsisinkano eno, ababaka basoose kukunya aba Bbanka Enkulu ku nsimbi ezisoba mu buwumbi butaano n’obukadde 700 eggwanga lye zaafiirwa olw’omulimu ogw’okuzimba ettabi lya Bbanka Enkulu e Kabale eryazimbibwa mu ngeri eyagadibengalye.

Ababaka era baatabukidde Bbanka Enkulu nga baginenya nti yeesuliddeyo gwa nnaggamba nga banka ez’obusuubuzi ne kkampuni ez’amasimu eziri mu bizinensi ya Mobile money zinyigiriza Bannayuganda mu kubabinika amagoba amangi ne ssente ez’okusindika n’okuggyayo ssente.

Ku kya Bbanka ezizze ziggalwa, Katuntu yagambye nti ky’ekiseera Bbanka Enkulu enoonyerezebweko ku nkola yaayo mu kuggala, okuddukanya n’okutunda bbanka ez’ebyobusuubuzi ezizze zifuna obuzibu, eggwanga litegeere obuzibu we buva n’ekiyinza okukolebwa okwewaliwa.

EZIMU KU BBANKA EZIGGADDWA

Crane Bank: October 20, 2017

Imperial Bank: October 13, 2015

Global Trust Bank (U): July 25, 2014

National Bank of Commerce (Uganda): September 27, 2012.

Cooperative Bank,: May 19, 1999

Greenland Bank, April 1, 1999

International Credit Bank: November 18, 1998.

Sembule Investment Bank : 1995

Teefe Bank : 1993

Katuntu yagambye nti omubazi omukulu ow’ebitabo bya Gavumenti bagenda kumuwa emyezi ng’esatu oba ena okunoonyereza ku bbanka ezaggalwa n’agamba nti bagenda kulondamu bbanka nga ssatu oba nnya ezigenda okussibwako essira mu kunoonyereza.

Omumyuka wa Gavana, Dr. Kasekende yategeezezza ababaka nti BBanka Enkulu nay’erina okunoonyereza kwayo kwe yatandise ku kitongole kyayo ekivunaanyizibwa ku kulabirira n’okulondoola banka zonna okuzuula lwaki banka ez’obusuubuzi zituuka mu buzibu obw’ensimbi ng’ekitongole tekitegedde mu budde.

Omubaka Elijah Okupa yasabye Kasekende annyonnyole ku byogerwa nti abamu ku bakungu ba Bbanka Enkulu bagaggawalidde nnyo mu mivuyo egy’okuggala bbanka ez’obusuubuzi kyokka Katuntu yagambye nti eyo y’emu ku nsonga ezigenda okubuulirizibwako.

More From The Author

Emboozi z’omuwandiisi endala

Emboozi endala

Kuba 220x290

Kenya okutukuba tejja kutulemesa...

ABAWAGIZI ba Rugby aba ttiimu ya Uganda baasoose kukuba nduula za luleekereeke nga balowooza nti ttiimu yaabwe...

Mazike 220x290

Fresh Daddy abawala batandise okumwerippa...

OBWASSEREEBU tebuva wala naye ne Fresh Daddy manya taata wa Fresh Kid bwe yayimbye ‘Mazike’ kati takyava mu bbaala...

Soma 220x290

‘Abaami mmwe mutabangula amaka’...

ABAKULEMBEZE n’abatuuze mu tawuni kanso y’e Luuka boolese obwennyamivu olw’omuwendo gw’amaka agasasika okweyongera...

Leo 220x290

Omusibe atolose ku baserikale abatuuze...

ABATUUZE ku kyalo Kimuli mu ggombolola y’e Maanyi mu disitulikiti y’e Mityana bavudde mu mbeera ne basuulira poliisi...

Sevo1 220x290

Aba NRM mu Buganda batongozza Museveni...

ABAKULEMBEZE ba disitulikiti za Buganda eziwera 10 bakwasizza Pulezidenti Museveni ekkanzu eya kyenvu, ekyanzi,...