TOP
  • Home
  • Ageggwanga
  • Ensonga za Bobi Wine ne Zaake zongedde okutabula ababaka mu Palamenti

Ensonga za Bobi Wine ne Zaake zongedde okutabula ababaka mu Palamenti

By Musasi wa Bukedde

Added 5th September 2018

ENSONGA z’abaserikale abaakuba omubaka wa Kyaddondo East, Robert Kyagulanyi (Bobi Wine) ne Francis Zaake (Mityana Munisipaali) zongedde okutabula Palamenti.

Medardssegonnainlegalcommittee 703x422

Omubaka Medard Sseggona

Mu lutuula olwakubiriziddwa omumyuka wa sipiika, Jacob Oulanyah, lwefugiddwa okusika omuguwa ku biteeso ebiwerako.

Wiiki ewedde Palamenti yayabuka tewedde ng’ababaka baagala Pulezidenti asooke addemu ebbaluwa sipiika gye yali amuwandiikidde nga yeemulugunya ku baserikale abaatulugunya abantu.

Oulanyah yasoose kutegeeza nga bwe yabadde amaze okufuna ebbaluwa okuva ewa Pulezidenti ng’annyonnyola ensonga ababaka ze baali beemulugunyaako.

Kyokka teyalambululidde babaka biri mu bbaluwa n’ategeeza nti baagiwandiikidde sipiika Rebecca Kadaga eyawandiikira Pulezidenti.

Yagambye nti Kadaga bw’anaaba ayagadde ajja kunnyonnyola ababaka.

Akulira oludda oluvuganya Gavumenti, Betty Aol Ocan yagambye nti tekiba kya bwenkanya ofiisi y’oludda oluvuganya Gavumenti obutafuna kkopi ku bbaluwa eno kuba balina bye bandyagadde okwanukula.

EBYOKWERINDA MU GGWANGA

Gen. Elly Tumwine minisita w’obutebenkevu bwe yamalirizza okusoma lipooti ng’annyonnyola ababaka ku mbeera y’ebyokwerinda eri mu ggwanga mwe yalambululidde engeri ababaka ba Palamenti gye baatuuka okukwatibwamu mu Arua n’abamu ne basimbibwa mu mbuga z’amateeka, Ibrahim Semujju Nganda (Kira Munisipaali) n’ategeeza Palamenti nti efuuse nkola ya Gavumenti ntongole okukubanga abantu buli lwe wabeerayo okulonda mu ggwanga.

Embeera eno yagiraba e Rukungiri, Jinja, Bugiri ne Arua. Yalabudde nti singa Gavumenti tesalira kizibu kino magezi, abantu bajja kutuuka okwenyiwa bakozese amakubo agatali mu mateeka.

Medard Lubega Sseggona (Busiro East) yawakanyizza Tumwine bye yabadde annyonnyodde n’agamba nti bwabadde bulimba naddala ku ngeri Zaake gye yatolokamu awamu n’engeri Bobi Wine gye yaggyibwako omusango gw’okulya mu nsi olukwe. Kyewalabye Majegere (Bunya East) yasabye ensonga y’abaserikale ba Poliisi n’amagye abakuba abantu n’abaamawulire ekwatibwe na maanyi.

Kyokka yagambye nti olumu mubeeramu obutali bwenkanya bwe baleka abaserikale abakulu ababa baaduumidde okukuba.

Bernabus Tinkasiimire (Buyaga West) ne Celicia Ogwal baavudde mu mbeera ne basaba Gavumenti ekomye okutulugunya Bannayuganda buli lwe wabeerayo okulonda kuba abavuganya Gavumenti baliwo mu mateeka.

OKUTEESA KU LIPOOTI EYAKOLEBWA AKAKIIKO

Wano waabaddewo kalumanywera. Mwesigwa Rukutana amyuka Ssaabawolereza wa Gavumenti yategeezezza nti kimenya mateeka okuteesa ku nsonga eziri mu kkooti era n’asaba okulinda okusalawo kwa kkooti.

Kyokka Medard Sseggona Lubega (Busiro East) yamuwakanyizza nti emisango gyonna egiri mu kkooti tekuli gwa kutulugunya bantu.

Wano Rukutana yamwanukudde nti tasaanidde wadde okwogera ku nsonga eziri mu kkooti kuba bwe yasindikibwa Palamenti okubuuliriza ate yadda mu kukola ssente bwe yeefuula munnamateeka w’abasibe.

Oulanyah yasazeewo nti Sseggona yalina okulangirira nga bwe yali asazeewo okuyamba ababaka ekintu kye yakoze.

Muwanga Kivumbi (Butambala) naye yawakanyizza eky’obutasoma lipooti. Sseggona oluvannyuma yasazeewo nti ajja kusalawo mu lutuula olwa leero (Lwakusatu) ng’amaze okwebuuza n’okutunula ku mpaaba y’omusango oguvunaanibwa ababaka.

More From The Author

Emboozi z’omuwandiisi endala

Emboozi endala

Parliamentofuganda640381 220x290

Palamenti eyimrizza eby'okuyisa...

PALAMENTI eyimirizza eby’okuyisa ebbago lyetteeka erikwata ku kubonereza abantu abazza emisango egyekuusa ku mukwano...

Mbabazi 220x290

Boogedde ebinobya bakazi ba Ssegawa...

ABAALI bakazi ba Vincent Ssegawa bamulangidde bw’atalisobola kuwasa mukazi n’amugumiikiriza kubanga alina obuzibu...

Masomeroweb 220x290

Empaka z'amasomero ga siniya ziyiiseemu...

Abaddukanya empaka z'amasomero ga siniya basuubizza okulinnyisa omutindo kkampuni ya Fresh Diary bwe bayiyeemu...

Kanga 220x290

Isabirye ayawukanye n’omukazi omupya...

JOEL Isabirye eyali bba wa Rebecca Jjingo ayawukanye n’omukazi omulala omupya gw’abadde amaze naye omwaka gumu...

Kulula 220x290

Owa Romi Wine eyatemeddwa azze...

OMUGAGGA wa Romi’s eyatemeddwa ebijambiya abatemu oluzze engulu n’attottola engeri agasajja gye gaamusazeeko n’alemwa...