TOP
  • Home
  • Ag’eggwanga
  • Gavt. ekkirizza ensobi ezaakolebwa mu kukyusa emyaka gya Pulezidenti

Gavt. ekkirizza ensobi ezaakolebwa mu kukyusa emyaka gya Pulezidenti

By Musasi wa Bukedde

Added 17th January 2019

SSAABAWOLEREZA wa Gavumenti, William Byaruhanga akkirizza nti, okuggya ekkomo ku myaka gya Pulezidenti kyakolebwa mu bukyamu wabula n’asaba bisigale nga bwe biri mu nsobi eyo.

Tata 703x422

Loodi Meeya Erias Lukwago ( ku ddyo), Radislus Rwakafuuzi (wakati) ne Ogala Wandera (ku kkono) mu kkooti e Kololo.

BYA MARGRET ZALWANGO

Byaruhanga yagambye nti, ensobi nnyingi ezaakolebwa mu bintu ebitali bimu olwo n’akkiriza nti byali tebisaanye kukolebwa nga bwe byakolebwa.

Yabadde mu kkooti Ensukkulumu e Kololo mu maaso g’abalamuzi omusanvu abawulira okujulira okwatekebwamu enjuyi ssatu nga ziwakanya ensala ya kkooti Etaputa Ssemateeka.

Kkooti eno yali esazeewo nti okuggya ekkomo mu myaka gya Pulezidenti tekulina buzibu bwonna.

Oludda lwa Gavumenti lwabadde luwa kkooti ensonga zaalwo kwe basinziira okugamba nti, etteeka lyakolebwa mu butuufu nga n’emitendera baagigoberera kyokka ate Byaruhanga yeekubye endobo n’akkirizia nti kituufu emitendera mingi egyabuukibwa Palamenti bwe yali ekola etteeka ssaako ne Pulezidenti okulissaako omukono.

Yadde yafubye okuwolereza etteeka lino, abalamuzi abaakulembeddwa Ssaabalamuzi Bart Katureebe baamutadde ku nninga annyonnyole kkooti oba ddala baagoberera amateeka n’emitendera emituufu.

Byaruhanga eyabadde atandise ensonga ze nga mugumu yatandise okusikatHajj. Ssebunnya tiramu n’okutegeeza nti, wadde waaliwo ensobi ne vvulugu mu kuyisa etteeka lino, lisagala ddungi era n’asaba balireke nga bwe liri.

Yayongedde n’ategeeza abalamuzi nti wadde ebbago lyatwalibwa ewa Pulezidenti n’alissaako omukono nga waliwo ebibulamu, ye (Byaruhanga ) takirabamu buzibu bwonna.

Byaruhanga yawagiddwa omumyuka we Mwesigwa Rukutana naye yategeezezza abalamuzi nti, etteeka lino tewali bwe lityoboola Ssemateeka wa 1995 ng’abaajulira bwe bagamba n’ayongerako nti kkooti eyasooka terina nsobi yonna gye yakola bwe yali ewa ensala yaayo mu musango guno ogwakazibwako erya 'Togikwatako'.

Rukutana yategeezezza nti ababaka bonna baaweebwa obudde obumala ne bagenda ne beebuuza ku bantu mu bitundu byabwe ku nsonga eno nga n’ebbaluwa ya poliisi eyawandiikibwa ASP Asuman Mugyeni ng’ebagaana okukuba enkuhhaana bangi ku babaka baagityoboola.

Yayangeddeko nti n’ebbaluwa Sipiika gye yawandiikira Pulezidenti ng’abuuza engeri amagye gye gaayingira Palamenti yakikola mu bukyamu kubanga yandibadde abeebuzaako nga ofiisi ya Ssaabawolereza wa Gavumenti.

Oludda lwa Gavumenti lwakiikiriddwa Byaruhanga, Rukutana, omuwabuzi wa Gavumenti ku mateeka Francis Atoke, Christine Kahwa, Martin Mwangusaha ne Phillip Muwakanya nga bonna baasabye kkooti ereke etteeka nga bwe liri waleme kubaawo kkomo ku myaka gya Pulezidenti.

Bano bategeezezza abalamuzi nti tewali nsobi yakolebwa mu kukyusa akawayiro 102(b) era okukakyusa tewali kusobya mu ssemateeka w’eggwanga n’enkola ya Ssemateeka, emitenderwa gyagobererwa bulungi, era byonna byakolebwa lwa bulungi bwa ggwanga lino.

Lukwago ne banne beegayiridde kkooti esazeemu etteeka lino kubanga ensonga za Gavumenti ze yawadde teziriimu ggumba.

Katureebe n’abalamuzi abalala baategezezza nti essaawa yonna baakuwa ensala yaabwe.

More From The Author

Emboozi z’omuwandiisi endala

Emboozi endala

Pp 220x290

Abayimbi Bannayuganda battunse...

Abajamaica;Christopher Martin ne D-Major bakubye Bannayuganda emiziki egibaccamudde

Hse1 220x290

By’olina okumanya ng’ogula ennyumba...

Kya makulu omuntu akuguza ennyumba okukuwa ppulaani yaayo n’ogiwa omukugu nagyetegereza okukakasa nti ebiriko byagobererwa...

Ssenyonjo 220x290

Poliisi ezudde ebipya ku yatema...

POLIISI ezudde ebipya ku musajja Hamidu Ssennyonjo amanyiddwa nga Munomuno omu ku bagambibwa okuyingirira omugagga...

Mayiga 220x290

Katikkiro alaze engeri ebbula ly’amazzi...

KATIKKIRO wa Buganda, Charles Peter Mayiga ayongedde okukkaatiriza obukulu bw’amazzi mu bulamu bw’abantu n’agamba...

Bazigu1 220x290

Abazigu balumbye amaka e Munyonyo...

ABAZIGU balumbye amaka e Munyonyo ne batemaatema omukozi w’awaka Isa Birimusho n’okumusiba akandooya ne bamuleka...