TOP
  • Home
  • Amawulire
  • Omuwala omulala attiddwa mu bukambwe e Katabi - Ntebe

Omuwala omulala attiddwa mu bukambwe e Katabi - Ntebe

By Musasi wa Bukedde

Added 28th August 2017

OMUWALA omulala bamusse omulambo ne bagusuula e Katabi - Ntebe, ekyongedde okutakuza aba poliisi emitwe ku batemu ki abatta abakazi.

Sempi 703x422

Owa poliisi ng’agezaako okutangira abantu okutuuka ku mulambo gw’omukazi.

Abakazi abaakattibwa mu Kampala n’emiriraano mu myezi esatu gyokka kati basukka mu 20 ng’abasinga ku bano babattidde Nansana ne Ntebe.

Poliisi yalwanaganye n’abantu abaabadde bagezaako okutuukira ddala ku kifo omulambo gw’omukazi ono atemera mu myaka 30 we gwabadde.

Abantu baabadde baagala kwetegereza okuzuula oba omukazi ono bamumanyi ku kitundu, kyokka poliisi ng’ebaziyiza okulinnyirira ekifo kubanga kitaataaganya okunoonyereza.

Omuduumizi wa Poliisi mu Kampala South, Siraje Bakaleke bwe yatuuse yategeezezza nti tewali kiraga nti omukazi ono yattiddwa buttibwa era n’agattako nti abadde mulalu ku kitundu era alabika yafudde bulwadde; wabula abatuuze abaasoose okulaba omulambo ne bamuwakanya nga bagamba nti guliko ekiwundu ekinene ku mutwe, gwabaddeko omusaayi, gwayambuddwa era n’enviiri zaabadde zitankuuse nnyo nga n’omubiri gubunye ebikuyiro, ekiteeberezebwa nti yagezezzaako okulwanyisa abatemu abaamusse.

Omulambo gwasuuliddwa okumpi n’emizigo gya Ronald Mutebi e Katabi mu Ntebe era abaabadde bakedde ebweru ku Ssande be baagulabye ne bayita poliisi.

Omukazi ono eyattiddwa alinnyisizza omuwendo gw’abakazi be battidde e Ntebe ne guva ku musanvu ne gutuuka ku munaana wakati wa May 2017 ne August 2017.

Poliisi bwe yakwata Ibrahim Kaweesa gwe boogerako nti yakkirizza nti abadde mu kibinja ekyakatta abakazi 8 e Nansana yalumirizza omugagga Tumuhimbise nti y’abapangisa okutta abakazi balembeke omusaayi bagumutwalire.

Wabula Fred Egesa eyakuguka mu by’okunoonyereza ku buzzi bw’emisango n’akikubamu ebituli ng’agamba nti abattiddwa babadde batugibwa butugibwa era emirambo gibadde tegisangibwako biwundu we baalembekedde musaayi!

Kaweesa akuumirwa Nalufeenya, kyokka abatemu bakyayongera okutta abalala.

Omwogezi wa poliisi mu Kampala n’emiriraano Emilian Kayima yagambye nti ebikwata ku mukazi gwe basse byabadde tebinnategeerekeka kyokka n’agattako nti omulambo gwabadde gutandise okuvunda era ne baguggyayo ne bagutwala mu ggwanika e Mulago nga bwe bakola okunoonyereza.

Yagambye nti abantu baabulijjo balina okuyambako ennyo mu kuwa poliisi amawulire agakwata ku butemu obw’ekika kino obweyongedde.

More From The Author

Emboozi z’omuwandiisi endala

Emboozi endala

Mknmu21 220x290

Ababadde batwala omulambo batuuyanye...

Abatuuze ku kyalo Nassuuti mu munisipaaali y’e Mukono baasitaanye okufuna ebiwandiiko ebitambuza omulambo gwa munnaabwe...

1bc8d9398e5f4a07a3307fdfeb1d90ad 220x290

Kasujja omukulu w'ekika ky'Engeye...

OMUTAKA Hajj Mohamood Minge Kibirige Kasujja abadde akulira ekika ky’engeye obulwadde bwa sukaali ne puleesa bimugye...

Mkncov11 220x290

Ab’e Mukono batandise ekifo aw’okukuumira...

Ab’e Mukono batandise ekifo aw’okukuumira abateeberezebwa okuba ne Coronavirus

414009d1dd2349e0bd6b4678886a42d21 220x290

Kabaka awaddeyo obukadde 100 okuyamba...

KABAKA Ronald Muwenda Mutebi II addukiridde Bannayuganda n’obuyambi obw’enjawulo obubalirirwa obukadde 100 ng’ensimbi...

Lop2 220x290

Omusumba Bp. Silvester Kisitu asabye...

Omusumba Bp. Silvester Kisitu asabye Bannayuganda okubeera abaweereza abalungi