TOP

Mugabe azize emmere n’ebyokunywa

By Musasi wa Bukedde

Added 20th November 2017

Palamenti ya Zimbabwe eyitiddwa bukubirire enkya ku Lwokubiri, ababaka okuyisa ekiteeso ekiggyamu Pulezidenti Mugabe obwesige.

Zimbabwestrike1 703x422

Bannansi ba Zimbabwe nga beekalakaasa, mu katono ye Mugabe ng'asumagidde

HARARE, ZIMBABWE 

Mugabe azize okunywa n’okulya  n’agamba nti waakiri okufa okusinga  okuswala mu bantu abaamulonda  ng’asuulawo obuyinza bwe baamuwa. 

Kiddiridde olukiiko olufuzi  olw’ekibiina kye ekya ZANU PF okumugoba  ku Ssande ne bamusikiza  Emmerson Mnangagwa gw’abadde  yaakagoba mu kifo eky’omumyuka  wa Pulezidenti, ekifo ng’ateekateeka  okukironderamu mukyala we Grace  Mugabe.

Teyakomye awo, wabula  yagaanye n’okuddamu okwogera ekikalubizza  n’enteeseganya ezaabadde  zitegekeddwa. 

“Pulezidenti azize buli kyakulya  na buli kyakunywa era agaanyi  okwogera n’omuntu yenna nti waakiri  k’afe naye tajja kukkiriza kumuswazaswaza”  Munisita w’abakozi ba  Gavumenti, Patrick Zhuwao bwe  yategeezezza eggulo. 

Minisita Zhuwao nga kizibwe wa  Mugabe (mutabani w’eyali mwannyina  wa Mugabe omugenzi Sabina  Mugabe) yasinzidde mu South Afrika  gye yaddukidde ng’amagye  gawambye Gavumenti ya  kkojjaawe. 

Yagambye nti yayogeddeko  n’aba famire yaabwe  abali ne Mugabe mu maka  ge agayitibwa “Blue Roof”  w’akuumirwa mu kitundu  ky’e Borrowdale Brook mu  kibuga Harare ne bamutegeeza  nti Pulezidenti  yagaanyi okulya oba okunywa  oba okubimuliraanya  era akeediimo kano  yakatandise ku makya ga  Ssande.

  Ensonda mu kibiina kya  ZANU PF zaategeezezza  nti Mugabe yali yakisalawo  dda nti waakufiira ku  Bwapulezidenti y’ensonga  lwaki yagaanyi ddiiru  zonna Bannamagye ze  baamuwadde akkirize  okuva mu buyinza mu mirembe  kuba ye kyamuyingira mu bwongo  nti okuva ku Bwapulezidenti  ng’amaze kufa.

Olumu yagamba nti ne Katonda  ayinza okumunyiigira ng’avudde ku  Bwapulezidenti bwa Zimbabwe!  Ky’asinga obutaagala, kwe kubeera  mu Zimbabwe ng’efugibwa omusajja  Mnangagwa era mu nteeseganya  ezaasoose ng’ali ne Bagenero  yababuuzizza oba tebalinaayo muntu  mulala gwe basobola kuleeta ku  Bwapulezidenti nga si Mnangagwa;  kyokka ne bamutegeeza nti oyo Bammemba  b’ekibiina kya ZANU PF gwe  baagala. 

Ensonda mu magye zitegeezezza  nti Gen. Constantino Chiwenga  eyakulidde okuwamba ateekateeka  okuwaliriza Mugabe okulya nti  era waakiri ebyokulya banaabiyisa  mu bupiira naye nga tebakkirizza  by’asaba era tebajja kumukkiriza  kutondoka njala kuba kiyinza okuleetawo  akavuyo akalala. 

Minisita Zhuwao yagambye nti  okuva ku Lwokubiri amagye lwe  gaawamba obuyinza, Mugabe  takyebaka, ali mu birowoozo  ng’oluusi n’amaziga gamuyitamu  olw’engeri gye baamusuuzizza  obuyinza. 

AMAGYE GAZZEEMU  OKUSISINKANA MUGABE

  Omuduumizi w’amagye ga Zimbabwe,  Gen. Constantino Chiwenga  ne bannamagye ab’oku ntikko bazzeeyo  mu maka g’Obwapulezidenti  okusisinkana Mugabe okuddamu  okumumatiza akkirize okulekulira  mu mirembe. 

Akafubo kaabadde kaakutambula  ekiro kya Ssande kyonna  nga kakubirizibwa Faaza Fidelis  Mukonori. 

Mugabe n’okutuusa ku  Ssande yabadde akyawera nti si  waakulekulira, Gen. Chiwenga ne  bw’anaawanula enjuba mu ggulu  era nti ye mwetegefu okufiira ku  kituufu. 

Amagye gaabadde gaperereza  Mugabe akkirize okulekulira, obuyinza  bukwasibwe Mnangagwa asseewo  gavumenti ey’ekiseera  okutuuka mu kulonda okwa  2018 kyokka Mugabe byonna  yabigaanyi ng’agamba nti  Konsitityusoni ya Zimbabwe  y’erina okugobererwa mu  kukyusa obukulumbeze era  ayagala bamuleke amaleko  ekisanja kye ekiggwaako mu  2018. 

PALAMENTI ETUULA NKYA OKUMUGOBA

Palamenti ya Zimbabwe  eyitiddwa bukubirire enkya  ku Lwokubiri, ababaka  okuyisa ekiteeso ekiggyamu  Pulezidenti Mugabe obwesige. 

Sipiika wa Palamenti ya  Zimbabwe, Jacob Mudenda  yaweerezza ababaka ‘notisi’  ng’abayita okuva mu  ggandaalo okugenda mu lutuula  olw’enjawulo ku Lwokubiri. 

Ensonda zaategeezezza nti ababaka  ab’ekibiina ekivuganya gavumenti  ekya Movement for Democratic  Change Zimbabwe (MDC), ekikulirwa  Morgan Tsvangirai nga bali  wamu n’ekibiina ekiri mu buyinza babaze  ekiteeso ekiggyamu Pulezidenti  Mugabe obwesige. 

Sipiika Mudenda yali asoose  kugaana okuyita Palamenti kyokka  ensonda zaategeezezza nti amagye  gaamutaddeko akazito n’akkiriza  okutuuza Palamenti okuwa omukisa  ababaka okuggyamu Mugabe  obwesige.

Lino litunuuliddwa  ng’ekkubo eryokubiri okuggyako  Mugabe nga bagoberedde mateeka,  amawanga galeme kusibira Zimbabwe  kikookolo nti gavumenti ya  Mugabe baawamba mpambe. 

Olutuula olw’oku Lwokubiri  lugenda kutandika ku mutendera  ogusooka ogw’okuggya obwesigye  mu Pulezidenti Mugabe kyokka kisuubirwa  nti kiyinza okutwala wiiki nga  ssatu emitendera gyonna okuggwa  okuggyako ng’ababaka banaasooka  okukyusa mu mateeka okukkiriza  Mugabe bamufuumule mu bwangu  olw’embeera eri mu ggwanga. 

Ekiteeso ekiggyamu Mugabe  obwesige kibagiddwa omubaka James  Maridadi akiikirira ekitundu kya  Mabvuku-Tafara ku kkaadi ya MDC  nga kyakusembebwa ababaka aba  ZANU PF.

More From The Author

Emboozi z’omuwandiisi endala

Emboozi endala

Lop2 220x290

Omusumba Bp. Silvester Kisitu asabye...

Omusumba Bp. Silvester Kisitu asabye Bannayuganda okubeera abaweereza abalungi

Kuba 220x290

Minisitule efulumizza entegeka...

MINISITA w’Ebyenjigiriza n’emizannyo Janet Museveni azzizzaamu abazadde, abayizi n’abasomesa essuubi nti singa...

Kip1 220x290

Geo Steady ne mukazi we, Prima...

Geo Steady ne mukazi we, Prima omulamwa gwa Corona bagutegeera

Lab1 220x290

Fifi agabidde eb’e Ggaba eby’okukozesa...

Fifi agabidde eb’e Ggaba eby’okukozesa mu kiseera kya Kalantiini

Shutterstockeditorial10434333bm 220x290

Coronavirus: Amerika kiri bubi,...

Corona ayongedde okwewanisa abantu emitima okwetooloola ensi yonna era Pulezidenti wa Amerika Donald Trump yalabudde...