TOP

‘Kitatta babadde bamuyisa nga mutujju’

By Musasi wa Bukedde

Added 30th January 2018

ABASAJJA be baasibye ne Kitatta mu kaduukulu k’amagye bagamba nti engeri mukama waabwe gye bamuyisaamu mu kkomera eringa ya basibe abavunaanibwa obutujju.

Kita 703x422

Omu yategeezezza nti okwawukanano n’abasibe abalala, ennaku mukaaga ze baamazeeyo, mukama waabwe Kitatta abadde asiiba ku njerege era nga kwe bamusuza. Kitatta era nti baamumaza ennaku ssatu ng’ali ku mpingu ate nga ku magulu kuliko enjegere.

Frank Makumbi omutuuze w’e Mutundwe yagambye nti essaawa zaali nga 2:30 ez’ekiro ku Lwomukaaga ng’ava kukola akimye mmotoka ye ekika kya Pajero UAG 642H gye yali alese ng’eyozebwa okuliraana ofiisi za Bodaboda 2010.

Yagambye nti engeri gy’atalina kakwate ku Bodaboda 2010, yali tamanyi bigenda mu maaso era yeekanga abaserikale bayingirawo mu mmotoka ezaaliko n’obugombe.

Attottola bw’ati: Abajaasi emmotoka baazibuukako zikyadduka ne bakwata buli muntu eyaliwo era nange mwe bantwalira.

Bwe nzijukira amaanyi abajaasi ge baakozesa mu kutukwata, nneebaza Katonda nti kati nnayimbuddwa; nnali sikisuubira.

Mu kutukwata waliwo omusajja eyajja kyokka nga buli gw’asongako, gwe batikka ku kabangali y’amagye era nange omusajja oyo yansongamu ne bantikka.

Simanyi kwe yasinziira kubanga nze emirimu gyange gya kutunda ddagala.

Emmotoka zaasimbula ne batuyisa e Kampalamukadde, Wandegeya, Lufula, Bugoloobi ne batutuusa e Mbuya ku CMI era awo we baatusibira ebigoye ku maaso.

Mu kaduukulu e Mbuya nnamalayo olunaku lumu naye lwankaluubirira nnyo kubanga entiisa eriyo nga teri akkirizibwa kwogera kigambo wadde ekimu era bw’owulira eddoboozi ng’omanya omujaasi abakuuma y’ayogedde.

Enkeera baasunsulamu abasibe abamu era nali wa mukisa nti nze omu ku be baatikka ku mmotoka ne tuweerezebwa e Kireka gye nafunira obuweerero okutuusa lwe nayimbuddwa.

KITATTA BABADDE BAMUKUUMIRA KU NJEGERE

Lawrence Ssendege omu ku bakulembeze ba Bodaboda 2010 yagambye nti baamusibira mu gusenge gumu ne Kitatta.

Yattottodde nti Kitatta babadde baamusibako enjegere ku bigere, emikono ne bagissaako empingu nti era kino yakyetegereza ennaku ssatu nnamba.

Wadde baali babasiba ebigoye ku maaso nga tebakkirizibwa kutunula, yebbiriranga olumu n’abiwenjulako katono okulaba embeera mukama waabwe gye yalimu.

Kino yakikolanga mu budakiika butono naddala wakati mu ttumbi ng’abaserikale tebalawuna nnyo mu kisenge.

Yattottodde nti: Abaakwatibwa ffenna baatwawulamu emirundi esatu abamu ne babasibira wansi mu ‘Go down’ Kitatta n’abalala ne batusibira mu gusenge ogunene ennyo ate abalala ne batwalibwa e Kireka.

Kitatta baamukolera oguntu ogulinga ogubookisi mwe babadde bamukuumira era nga bamussaako eryanyi ery’enjawulo ku basibe abalala.

Olumu babadde batuzunza ne batuggya e Mbuya ne batutwalako e Kireka, kyokka Kitatta nga tebamutwalirako era ebbanga lyonna abadde asigala mu kaduukulu ke e Mbuya nga bwe batuzza era tumusangamu nga bwe twamulese.

Tewabadde kwogera okuggyako ng’oyanukula ebyo byokka ebiba bikubuuziddwa.

Nze babadde bambuuza lwaki nneetaba mu kukuba emmotoka y’amagye amayinja n’eyatika endabirwamu nga mulimu omwana w’omukulu! Buli lwe babadde bambuuza nga mbategeeza nti seetabangako mu kikolwa ekyo.

Mu kuyimbulwa baatulaalise obutaggulawo misango era omu ku bajaasi yatutunuulidde ffenna n’atulaalika nti: Mugende ate tuwulire nti mututte emisango mu kkooti nti twabatulugunyizza, tujja kubakima.

More From The Author

Emboozi z’omuwandiisi endala

Emboozi endala

Abr1 220x290

Empaka za ASFAs bazongeddemu ebirungo...

Basereebu beesunga kuwangula ngule mu mpaka z'emisono eza Abryanz Style and Fashion Awards (ASFAs)

Siba 220x290

Leero mu mboozi z'omukenkufu, tukulaze...

EMMWAANYI kyabugagga era bajjajjaffe baazitunda ne bakolamu ebintu eby’enjawulo omwali okusomesa abaana, okugulanga...

Kusasiraserenandijjo32 220x290

Ekyabade mu kivvulu kya Kusaasira...

Ekyabade mu kivvulu kya Kusaasira ku Serena: Museveni ayanukudde Mayinja ku by'oluyimba lwa 'Ebintu bizzeemu'

Cf67bb0a32be4b27bedf0076e8e46208 220x290

Bazannye ffirimu ku ngeri abavubuka...

Ekitongole kya Reach a hand nga kiri wamu n'Omunigeria kafulu mu kuzannya ffirimu Emmanuel Ikubese basabuukuludde...

Teekamu 220x290

Eyanzigya mu ssomero yeegaanye...

NKIZUDDE kati nti eyannimbalimba n’annemesa emisomo yali ayagala kunkozesa nga tanjagala bya ddala.