TOP

Lukwago atutte Beti Kamya mu kkooti battunke

By Hannington Nkalubo

Added 12th February 2018

LOODI meeya Erias Lukwago aggudde emisango ku minisita wa Kampala Beti Namisango Kamya ng’amuvunaana kumenya mateeka ne yeeyingiza mu mirimu egitali gigye n’atuuka n’okuyimiriza entuula z’olukiiko lwa KCCA mu bukyamu.

Wata 703x422

Lukwago (wakati) ng’atwala empapula mu kkoot

Eggulo Lukwago yagenze mu kkooti Enkulu etuula ku Twed n’aggulawo emisango ku Beti Kamya.

Yamuwawaabidde ne Ssaabawolereza wa Gavumenti. Lukwago yabadde ne balooya be babiri okuli Nathan Mpenja ne Abubaker Ssekanjakko okuva mu kkampuni ye eya Lukwago and Co. Advocates.

EMISANGO

Mu kiwandiiko Lukwaago ky’awaddeyo mu kkooti, alaze nti minisita Beti Kamya yamenya amateeka ne yeeyingiza mu mirimu egitali gigye. Yagambye nti Beti Kamya yawandiika ebbaluwa nga January 23 2018 eyimiriza enkiiko za KCCA n’agaana n’abakozi ba KCCA ku ludda lw’ekikugu okuzeetabamu nti zimenya mateeka era yasabye kkooti emusseeko ekiragiro.

Ebbaluwa ya Beti Kamya yali egamba nti enkiiko ezisuzibwa ne ziddibwaamu ku lunaku oluddako teziri mu mateeka kubanga teziwezezza nnaku 14 ng’etteeka erifuga Kampala bwe liragira. Kino Lukwago akiwakanya era ebbaluwa za minisita z’azze awandiika azitaddeyo okumulumiriza nti amulemesa emirimu.

Ekiwandiiko kiraga nti Beti Kamya by’akola yeefudde Loodi meeya oba omukulembeze omulonde akulira Kampala ate nga talondebwangako.

Amulumiriza nti atuuza enkiiko za bakansala mu munisipaali n’awa n’ebiragiro ate ng’omulimu gwa minisita gulambikiddwa bulungi mu tteeka lya Kampala nti ateekwa kulondoola ebikolebwa abakulembeze abalonde mu Kampala naye ye takkirizibwa kukola era yasabye kkooti emusseeko ekiragiro.

Avunaana minisita okulemererwa okukola emirimu gye ate nadda ku gy’abakulembeze abalonde egitamukwatako.

Mu kiwandiiko yataddemu nti minisita agaanye okulonda olukiiko olunene olutegekera Kampala n’ebitundu ebigyetoolodde oluyitibwa Metropolitan Physical Planning Authority era asaba kkooti emusseeko ekiragiro kimuwalirize okululonda.

Alumiriza minisita obutamanya waakoma n’atuuka n’okuwandiika ebbaluwa eyimiriza Loodi meeya okutambula okugenda e Malaysia okukola emirimu gy’abalonzi ng’omukulembeze omulonde akulira Kampala.

Lukwago ayagala kkooti eragire minisita okukomya okweyingiza mu mirimu egitamukwatako era asaba kkooti emusseeko ekiragiro.

Emisango gyonna Lukwaago asabiddeko engassi singa minisita ne Ssaabawolereza wa Gavumenti gibakka mu vvi.

Lukwago mu kirayiro kye yataddemu nti ye mukulembeze omulonde afuga Kampala eyalondebwa nga February 23/ 2016 era nti mu bizibu ebingi byeyayitamu ng’anoonya akalulu.

Yawangula bonna abaali bamuvuganya ku bitundu 80 ku buli 100.

More From The Author

Emboozi z’omuwandiisi endala

Emboozi endala

St1buk250518 220x290

BUKEDDE W’OLWOKUTAANO YAFULUMYE...

Mulimu ebipya ku batta abawala omuli obujulizi obubalumiriza kyokka nga butiisa.

Save 220x290

Museveni ayogedde ku bawamba abawala...

Pulezidenti agambye nti abatemu abawamba abawala ne babatta babafunzizza era gwe basembyeyo okukwata yabadde n’emirambo...

Whatsappimage20180524at20027pm 220x290

Abadde alimbalimba omuyizi wa S.4...

Emirimu gisannyaladde okumala akaseera mu ppaaka enkadde mu kibuga Kampala abagoba ba takisi abakolera ku siteegi...

Isabeti4 220x290

Yeemulugunyizza ku mutindo gwa...

OMUTEDENSI wa KIU Henry Kyobe akukkulumidde akakiiko akaddukanya omuzannyo gwa Beach Soccer olw’enzirukanya etamatiza...

Kasangati 220x290

Bawambye omuwala omulala e Kasangati...

ABAWAMBA abantu beesomye luno, bawambye omukazi omulala e Kasangati ne basaba obukadde 10, kyokka olubaweerezzaako...