TOP
  • Home
  • Amawulire
  • Mmengo yeetonze ku ky'abaserikale abakuuma Kabaka abaakubye bannamawulire

Mmengo yeetonze ku ky'abaserikale abakuuma Kabaka abaakubye bannamawulire

By Dickson Kulumba

Added 9th April 2018

MMENGO evuddeyo ne yeetonda ku ngeri abaserikale abakuuma Kabaka gye baakuttemu bannamawulire mu Lubiri Obuganda bwe bwabadde bwetabye mu misinde gy’amazaalibwa ge ku lw'e Ssande mwe baabakubidde n’okubasikaasikanya nga bakola emirimu gyabwe.

Whatsappimage20180408at93605pm 703x422

Kino kiddiridde ebifaananyi ebyafulumye ku mitimbagano gya yintanenti nga biraga engeri munnamawulire Denis Kabugo akolera ttivvi emu bwe yabadde agezaako okukwata Kabaka eyabadde ayambuka waggulu mu weema ye oluvannyuma lw’okusimbula abaddusi.

Minisita w’amawulire era omwogezi w’Obwakabaka, Noah Kiyimba mu kiwandiiko kye yafulumizza ku Ssande olw’eggulo yategeezezza nti enkola eno ey'okutulugunya bannamawulire si nkola ya Bwakabaka era evumirirwa, n'asuubiza nti waliwo ekigenda okukolebwawo okugonjoola embeera eno.

“Tufunye amawulire agatali malungi n’akamu nti abamu ku bannamawulire omuli n’abo abakolera ebitongole by’Obwakabaka eby’enjawulo baakubiddwa oba ne basindikibwasindikibwa abakuumi abamu nga basaka amawulire mu misinde gino.

Enkola ey’okubonyabonya bannamawulire nga bamalibwako eddebe lyabwe si nkola ntongole ya Bwakabaka era tugivumirira ne ssekuvumirira yenna. Abakuumi bano abakoze empisa eyo etali yaabugunjufu baagikoze nga bbo so si ku lwa Bwakabaka, Ssaabasajja Kabaka oba Katikkiro,” Ekiwandiiko kya Minisita Kiyimba bwe kyasomye.

Kiyimba yayongedde n'asaba bannamawulire okubategeezaanga mu bwangu kyonna ekibeera kibatuuseeko nga baakafuna obuzibu okusobola okubusalira amagezi kubanga Obwakabaka bussa ekitiibwa mu mirimu egikolebwa bannamawulire mu kutwala Obwakabaka ku ntikko.

“Tugenda kukola okunoonyereza ku nsonga eno era twongere okulambika abakuumi engeri gye basobola okukola omulimo gwabe ng’ate tebalinnyiridde ddembe lya bannamawulire. Twetondera abo bonna abaakoseddwa leero era tugenda kukola ekyo kyonna ekisoboka okulaba nti tumalawo obuzibu buno. Tukubirizza bannamawulire bonna baatutegeezenga mu bwangu bwe wabaawo ensonga yonna etateredde oba ebalemesa okola emirimu gyaabwe obulungi,” Kiyimba bweyagaseeko ng’ayogera ku kikolwa kino ekyalabiza Obwakabaka obubi.

Ku lwa June 17,2017 Kabaka Ronald Mutebi II bweyali ku Beatrice SS e Kyankwanzi yalagira abakuumi be bano bakomye eky’okutulugunya abantu be ababeera bazze ku mikolo okumulaba nga bwebabeera tebasobola kukyebeera, babakwate mpola.

Kino kyaddirira abakuumi bano okukasukka Ssentebe wa Disitulikiti y’e Kiboga saako n’abaami ba Kabaka mu mbeera eyatyoboola ekitiibwa kyaabwe era bano bwebafuna omukisa ogusisinkana Kabaka bakimunyonyola.

More From The Author

Emboozi z’omuwandiisi endala

Emboozi endala

Bajjo13 220x290

Bajjo asindikiddwa Luzira.

pulomota Bajjo bamusindise mu kkomera e Luzira okutuusa wiiki ejja.

Deb2 220x290

Ebbakuli enfunda ewa omusajja amaanyi...

Ebbakuli enfunda ewa omusajja amaanyi

Deb2 220x290

Ebbakuli enfunda ewa omusajja amaanyi...

Ebbakuli enfunda ewa omusajja amaanyi

Sab2 220x290

Yinginiya basanze afiiridde ku...

Yinginiya basanze afiiridde ku ‘sayiti’

Tip2 220x290

bakitammweEyalumbye owa difensi...

bakitammweEyalumbye owa difensi akwatiddwaBasonze