TOP

Museveni asisinkanye bannaddiini ne boogera

By Muwanga Kakooza

Added 16th April 2018

PULEZIDENTI Museveni asisinkanye bannaddiini n’abakunga okumuyambako okulwanyisa omuze gw’okukutulakutula mu ttaka n’okuligabana nga bannannyini lyo bafudde.

Kola 703x422

Omusumba Matte (ku kkono), Dr. Lwanga, Bp. Ntangali n’omusumba Lwere.

Yabasabye n’okweyambisa enzikiriza okukyusa embeera z’abantu naddala okubaggya mu bwavu.

Bannaddiini bano abeegattira mu kakiiko akagatta enzikiriza “Inter Religious Council of Uganda’’ baakulembeddwa Ssaabasumba w’essaza ekkulu erya Klezia ery’e Kampala, Dr. Cyprian Kizito Lwanga.

Kwabaddeko Mufti Sheikh Shaban Ramadhan Mubajje, Ssaabalabirizi w’Ekkanisa ya Uganda Stanley Ntagali, Ssaabalabirizi w’Abadiventi Pastor Daniel Matte ne Bishop Joshua Lwere ow’ekibiina ekigatta amakanisa g’Abalokole ekya Fellowship of Born Again Pentecostal Churches of Uganda.

Pulezidenti yabagabudde ekijjulo mu maka ge e Rwakitura oluvannyuma lw’okubalambuza pulojekiti z’enkulaakulana e Ibanda ne Rwakitura.

Yabakunze okumwegattako okulwanyisa omuze gw’okugabana ettaka ly’abafu kuba abantu basigaza obutundu butono bwe batalina kye bayinza kukolerako kyegasa. N’agamba nti mu mawanga agamu ag’ebweru nga German, kino kimenya mateeka.

Yagambye nti okusoomoozebwa Uganda kw’erina kwe kukyusa endowooza z’abantu okubaggya ku by’okulima emmere ey’okulya badde mu kulunda n’okulima okufuna ssente.

Yagambye nti alwanaganye n’okukyusa embeera z’abantu b’e Kiruhura ne Ibanda okubaggya mu by’okutambulanga n’ente okuva mu kifo ekimu okudda mu kirala n’okubakubiriza okujjumbira okulunda okutambulira ku mulamwa gw’okufuna ssente.

N’agamba musanyufu okulaba ng’enfuna y’abantu etandise okukyuka naddala oluvannyuma lw’okubakunga okutandika okulunda ente Enzungu.

Pulezidenti yagambye nti oluvannyuma lw’okulwanyisa obwavu mu byalo ky’agenda okuzzaako kwe kulwanyisa obwavu mu bibuga.

Era yakunze bannaddiini okukomawo okulambula ekitundu balabe ebituukiddwaako gavumenti ya NRM mu kulwanyisa obwavu.

Ssaabasumba Lwanga yasabye bannaddiini banne okukolerera okwegatta kw’abantu bonna n’agamba nti ebibiina ebitambulira ku musingi gw’eddiini bigenda kufuba okulwanyisa obwavu mu maka.

Lwanga yagambye nti nga Pulezidenti bwe yayingira Kampala (ng’awamba) ayagala agende mu bitundu by’egwanga byonna ng’alwanyisa obwavu.

Mufti Mubajje yagambye nti bajja kubuulira enjiri nga bwe balwanyisa n’obwavu.

Omusumba Matte ow’Abadiventi n’agamba nti musanyufu olw’enkola ya Pulezidenti ey’okulwanyisa obwavu.

More From The Author

Emboozi z’omuwandiisi endala

Emboozi endala

Whatsappimage20181214at173512 220x290

SC Villa etimpudde Express FC n'ennyogoza...

SC Villa etimpudde Express FC n'ennyogoza abawagizi baayo mu kisaawe e Namboole omupiira gye guyindidde!

Mosesmakoyaniowakibogakuddyongattunkaneambrosenaturindaowantinda 220x290

Kiboga ewaga mu Big League

TTIIMU ya Kiboga FC eyaakesogga Big League eremedde ku Proline FC okugisuuza entikko y’ekibinja kya Rwenzori ekitaddewo...

Hib1 220x290

Omulamuzi atabukidde abakakiiko...

Omulamuzi atabukidde abakakiiko k'ebyettaka e Lwengo

Reb2 220x290

Maneja w’ebbaala ya Casablanca...

Maneja w’ebbaala ya Casablanca asindikiddwa ku limanda

Deb1 220x290

Abakola ebimansulo e Kyetora balabuddwa...

Abakola ebimansulo e Kyetora balabuddwa