TOP
  • Home
  • Amawulire
  • Abapoliisi balondodde emmotoka ya Kkampuni ya BIDCO ne babba bukadde

Abapoliisi balondodde emmotoka ya Kkampuni ya BIDCO ne babba bukadde

By Stuart Yiga

Added 19th May 2018

Abaserikale ba Poliisi basatu balondodde mmotoka ya kkampuni ya Bidco, ekola butto ne ssabbuuni, okuva e Kampala oluvannyuma ne babateeka ku mudumu gw’emmundu, e Naluvule ne ba babba obukadde bw’ensimbi 2.

Paulkangaveayogererapoliisimubitundubyasavannah 703x422

Paul Kangave, ayogerera Poliisi mu bitundu bya Savannah.

Omwogezi wa Poliisi mu bbendobendo lya Savannah, ASP Paul Kangavve, yategeezezza Bukedde nti, abaabadde mu mmotoka ya BIDCO, ey’ekika kya Toyota Canter, nnamba UAM 846Q, baakubye enduulu  oluvannyuma lw’okussibwa ku mudumu gw’emmundu, ekyaleetedde abatuuze abaliranyeewo nabo okutaayiza abazigu.

Kangavve yategeezezza nti, omuserikale waabwe ng’akolera ku Poliisi y’e Bweyogerere, ayitibwa detective Constable nnamba 36159 Ali Kubala, abatuuze baamutaayizza era ne bamukwata, ate banne ababiri be yabadde nabo, ne bassaako kakokola tondeka nnyuma.

“Kubala tumulina ku Poliisi yaffe e Luweero, era nga tunoonya banne be yabadde nabo. Newankubadde akyagaanye okutubuulira banne be yabadde nabo, tulina essuubi nti, tujja kubafuna era bavunaanibwe,” Bw’atyo Kangavve bwe yagambye.

Mu kiseera ky’ekimu, Poliisi yasobodde okutaasa ssente obukadde obulala, 25, ababbi  baalemeddwa okutwala olw’ensonga nti bwabadde mu seefu, ate nga yabalemye okusitula  n’okugiggulawo.

Okusinziira ku byakanoonyezebwaawo, abapoliisi bano, baabadde batambulira mu mmotoka ey’ekika kya Super Custom, wabula nga nnamba z’emmotoka eno, tezaategeerekese bulungi, okusinziira ku batuuze.

Guno si gwe mulundi ogusoose ng’abaserikale ba Poliisi beenyigira mu bubbi.

Mu April, 2018, omupoliisi James Ogwal, okuva ku Poliisi y’e Kabalagala, yakwatibwa oluvannyuma lwa banne okumulokooma nti baali naye nga babba.

Oluvannyuma Ogwal, yasangibwa nga yeetugidde munda mu kaduukulu ka Poliisi y'oku luguudo lwa Mawanda.

Waliwo abapoliisi abalala babiri nabo abanoonyerezebwako ku ntandikwa y’omwaka guno, nga bateeberezebwa okwenyigira mu bubbi obwali mu disitulikiti y’e Masindi,  nga beeyambisa emmundu.

Bino we bijjidde nga eyali aduumira Poliisi mu bitundu bya Kampala Metropolitan South, ACP Siraje Bakaleke, akyanoonyerezebwako olw’ebigambibwa nti, ye n’abalala bana, banyaga ku bannansi ba Korea, ssente ezikunukkiriza mu kawumbi kamu n’ekitundu.

Bakaleke avunaanibwa n’abaserikale abalala okuli; George Kayongo, Patrick Ochen, ne Kenneth Zirintuusa.

More From The Author

Emboozi z’omuwandiisi endala

Emboozi endala

Kalendeweds1 220x290

Obunkenke e Namirembe nga Reverand...

Abooluganda n’emikwano gya bagole ababadde mu lutikko baasirikiridde buli omu nga bwatunuulira munne okutuusa Rev....

Saba 220x290

‘Muggya wange apangisizza abasajja...

AMALOBOOZI g’enkoko ezikookolima ge gaamuyambye okwewalula okuva mu kibira kya Mabira wakati okutuuka ku bantu...

Nakalembe1 220x290

‘Muggya wange apangisizza abasajja...

AMALOBOOZI g’enkoko ezikookolima ge gaamuyambye okwewalula okuva mu kibira kya Mabira wakati okutuuka ku bantu...

Sebulime1 220x290

Famire ya Ssebulime ekukkuluma...

FAMIRE y’omugenzi Ronald Ssebulime eyakubwa poliisi amasasi ng’ateeberezebwa okuba mu lukwe lw’okwagala okutta...

War1 220x290

Tekinologiya wa Iran asannyalazza...

TRUMP yabadde takisuubira nti Iran erina tekinologiya asobola okusannyalaza ennyonyi za America! Kyamukubye wala...