TOP
  • Home
  • Agookya
  • Ebipya ku Kaweesi: Makanika eyalaba nga bamutta baamunoonya ne bamusalako omutwe

Ebipya ku Kaweesi: Makanika eyalaba nga bamutta baamunoonya ne bamusalako omutwe

By Musasi wa Bukedde

Added 27th June 2018

Okumpi ne we battira Andrew Felix Kaweesi, waaliwo emmotoka eyali efiiridde ku kkubo nga bamakanika babiri bagikanika. Ebyaliwo byonna baabiraba era ne bakuba ebifaananyi ebyakwatiramu n’abatemu.

Pamba 703x422

Omugenzi Andrew Felix Kaweesi. Ku ddyo ye muvubuka eyattibwa.

Okumpi ne we battira Andrew Felix Kaweesi, waaliwo emmotoka eyali efiiridde ku kkubo nga bamakanika babiri bagikanika.

Ebyaliwo byonna baabiraba era ne bakuba ebifaananyi ebyakwatiramu n’abatemu.

Wabula oluvannyuma baali badduka baveewo, abatemu ne babalaba kyokka ne batasobola kubakwata.

Bamakanika bano baalondoolwa era omu n’asalibwako omutwe, omulambo gwe ne bagusuula e Masaka.

Obujulizi buno bwazuuliddwa bambega ba ISO ne CMI abeefunyiridde okuzuula ekituufu ku nfa ya Kaweesi. Kaweesi yatemulwa nga March 17, 2017 e Kulambiro okumpi n’amaka ge.

Yatemulwa ne ddereeva we Godfrey Mambewa n’omukuumi we Kenneth Erau. Bamakanika okuli eyakazibwako erya Mukwasi baali bakolera ku galagi emu e Kabowa - Ndeeba.

Waliwo kasitoma eyakuba essimu ku galagi ku Lwokuna nga March 16, ekiro ng’ayita bamakanika kubanga emmotoka ye Toyota Harrier yali efiiridde ku kkubo e Kulambiro.

Baakeera ku Lwokutaano, Kaweesi lwe yattibwa, okukanika emmotoka eyo. Bano baalaba buli kintu okuva ku muserikale wa poliisi agambibwa okuba Abel Kitagenda (yakwatibwa) eyavuga pipikipi okugenda ku geeti ewa Kaweesi n’alabibwa ng’ayogera n’abaserikale.

Baakozesa essimu ne bakuba ebifaananyi, era abatemu oluvannyuma baalaba bamakanika kyokka ne batasobola kubakwata.

Ebintu byaboonoonekera luvannyuma lwa poliisi kussaawo kirabo kya bukadde 100 eri oyo anaawa amawulire amatuufu agatuusa poliisi ku kukwata abatemu.

Abavubuka beetwala ku kitebe kya poliisi e Naguru era baasobola okulaba omu ku boofiisa.

Ofiisa yalagira omuyambi we ayitibwa Silas abatwale mu woteeri emu baweebwe obukuumi. Kyokka bamakanika byabasobera abaserikale bwe baatandika okubatulugunya nga babuuza gye baggye obujulizi.

Baabaggyako essimu zaabwe okuli ebifaananyi. Makanika omu Mukwasi yafuna omwagaanya w’atolokera n’agenda yeekukuma mu kyalo e Mbale.

Wabula we yaddukira yali amaze okuwa abaserikale byonna ebimukwatako okuli ne gy’akolera (Kabowa), gy’asula e Kawaala – Kasubi ne gy’ava e Mbale.

Abaserikale baamunoonya okutuuka e Mbale mu Bugisu gye baamuggya. Okuddayo okuwuliza Mukwasi ng’attiddwa omulambo gwe ne gusuulibwa e Masaka.

Gwasangibwa gusaliddwaako omutwe. Munne (amannya galekeddwa) yatulugunyizibwa nnyo kyokka ng’akyaliyo mulamu.

ISO NE CMI BAFUNA EBIFAANANYI

Amagye gaayazizza amaka g’omu ku baserikale abaakwatiddwa ku by’okutemula Kaweesi.

Mu bye baasanzeeyo kwabaddeko essimu bbiri okuli eya Mukwasi ne munne. Ku ssimu kuno munne wa Mukwasi yabadde amaze okutegeeza bambega nti kuliko ebifaananyi ebyakubwa abatemu nga batta Kaweesi ne byonna ebyaliwo.

Kyokka ebifaananyi byali byasangulwako. Bambega baatutte essimu ne bakozesa tekinologiya okukomyawo byonna ebyali ku ssimu.

Ebifaananyi byonna ne baddamu okubifuna. Kyategeezeddwa nti ebifaananyi byalaze abamu ku baserikale abaakwatibwa kyokka birimu n’abantu abalala abatannakwatibwa.

Munne wa Mukwasi ali mu mikono gy’abebyokwerinda ajja kukozesebwa ng’omu ku bajulizi mu musango guno.

More From The Author

Emboozi z’omuwandiisi endala

Emboozi endala

Unit8 220x290

Enjawulo etabudde Aganaga ne Chris...

NGA tegunnawera mwaka ng’abayimbi Aganaga ne Chris Johnz batadde emikono ku ndagaano ey’okukolera awamu, baawukanye...

Gd1 220x290

Omugagga Ham ne Kirumira banaazizzaako...

Omugagga Ham ne Kirumira banaazizzaako Sheikh Muzaata ennaku ya January

Kanta 220x290

‘Muntaase ku baana bange abanzibako...

OMUKADDE ow’emyaka 93 atabuse n’abaana be ng’abalumiriza okubeera mu kkobaane erimugoba ku ttaka lye balyeddize....

Bonnyjpgweb 220x290

Abadde ayanula engoye z'abatuuze...

Bonny Tamale omutuuze w'oku Kalerwe Kiggundu Zooni y'asimattuse okuttibwa abatuuze b'e Bwaise oluvannyuma lw’okumusanga...

Agende 220x290

Kkooti egobye egimu ku misango...

KKOOTI y’e Nakawa egobye omusango gw’obuyeekera ogwali gwaggulwa ku basajja 14 abagam- bibwa nti beenyigira mu...