TOP
  • Home
  • Amawulire
  • Pulezidenti Museveni annyonnyodde lwaki Bobi Wine ne Zaake baakubwa

Pulezidenti Museveni annyonnyodde lwaki Bobi Wine ne Zaake baakubwa

By Ahmed Mukiibi

Added 29th August 2018

Pulezidenti Museveni annyonnyodde lwaki Bobi Wine ne Zaake baakubwa

Lip2 703x422

Barbie mu ambyulensi eyaleese Bobi Wine e Lubaga.

PULEZIDENTI asisinkanye ababaka ba NRM mu palamenti n’agamba nti ababaka Bobi Wine ne Francis Zaake baakubwa lwa kulwana n’abebyokwerinda abaabakwata mu Arua. Museveni yagambye nti Zaake ye yasinga okulwana era yagezaako okukuba abaserikale kyokka ne bamukkakkanya.

Ate Bobi Wine yasooka kwekweka olwo abaserikale ne bamala kumpi ekiro kyonna nga bamunoonya okutuusa lwe baamukwata nga yeekukumye mu siiringi kyokka naye ne yeereega ku baserikale nabo ne bamukuba okutuusa lwebaamugonza. Ababaka yabasisinkanye mu maka g’Obwapulezidenti e Ntebe ku Mmande ekiro. N’agamba nti yayita abaserikale abaali mu Arua ne bamunnyonnyola ebyaliwo.

Museveni yagambye nti wadde emmotoka ye emu yakubwa amayinja, kyokka abaserikale baasobola okukuuma obukkakkamu ne basooka bamutuusa ku nnyonyi ne yeeyongerayo. Ku bya ddereeva wa Bobi Wine ayitibwa Yasin Kawuma eyattibwa essasi, yagambye nti essasi lyamukubwa mu butanwa, kyokka ensonga eno akyaginoonyerezaako.

BOBI WINE YEEKWEKA MU SIIRINGI

Museveni yagambye nti abaserikale baakwata abantu bangi, kyokka Bobi Wine yasooka kubabula okutuusa lwe baamusanga nga yeekwese mu siiringi.

Ate ye Zaake yagaana okumukwata mu ddembe n’alwanyisa abaserikale. Embeera eno yawaliriza abaserikale okukozesa amaanyi agasingako okutuusa lwe baamugonza. Zaake bwe baamuteeka mu mmotoka ya poliisi, yasigala alwana era kino nakyo kyamuleetera okufuna obuvune kuba yali alaga nti tannakkiriza nti yali akwatiddwa. Eno y’embeera eyamuleetera okukosebwa.

MUSEVENI AWAKANYA AKAKIIKO KA PALAMENTI AKABUULIRIZA

Pulezidenti yagambye nti kyali tekyetaagisa palamenti kussaawo kakiiko okulondoola ensonga z’ababaka abaakubwa. N’agamba nti tekyetaagisa palamenti kussaawo kakiiko kumpi ku buli nsonga eba eguddewo.

Ekirala okubuuliriza kwayo kujungululwa ababaka nga Medard Seggona eyasindikibwa okuzuula ekituufu ate yafundikira afuuse munnamateeka w’abasibe, ekintu ekitaali kituufu. N’alabula ababaka obuteetwala ng’abeekitalo.

Eggwanga liyinza okutambula nga tebaliiwo kubanga ebiseera ebisinga babibamala mu bintu ebitali bikulu. Yasuubizza okwongera abavubuka ssente okwekulaakulanya. Kyokka yavumiridde akakiiko k’ebyokulonda olw’engeri gye kakolamu emirimu n’asuubiza okugogola akakiiko ako

More From The Author

Emboozi z’omuwandiisi endala

Emboozi endala

Malawo 220x290

Agula emmaali y’omufu mu bukyamu...

WADDE okufa tteeka naye kino tekikugaana kukola nnyo obeereko ebyobugagga by’olekera abantu bo ssinga Katonda abeera...

Ssenga1 220x290

Njagala kutandika bulamu

NNINA siriimu era mmaze naye emyaka egiwera. Baze yafa ne nsigala n’abaana naye kati mpulira nnina okufuna omusajja...

Img20190117wa0028 220x290

Sipiika alagidde Katuntu okuyimiriza...

SIPIIKA wa Palamenti Rebecca Kadaga alagidde akakiiko ka COSASE akakubirizibwa Katuntu akabuuliriza ku mivuyo egyetobeka...

Soma 220x290

Abatuuze katono batte be balumiriza...

ABATUUZE ku kyalo Kiryamuli mu Ggombolola y’e Gombe mu disitulikiti y’e Wakiso bakkakkanye ku basajja babiri abagambibwa...

Panda 220x290

Maneja Kavuma ayagala Abtex amuliyirire...

Olutalo lw’abategesi b’ebivvulu, Musa Kavuma (KT Events) ne Abby Musinguzi amanyiddwa nga Abtex lusituse buto....