TOP

Abaayimbuddwa ne bobi wine balojja

By Kizito Musoke

Added 29th August 2018

Abaayimbuddwa ne bobi wine balojja

Kak1 703x422

Kenneth Paul Kakande owa DP (ku ddyo) ng’akulisa Mabikke ekkomera.

ABAMU ku bannabyabufuzi abaayimbuddwa ne Bobi Wine battottodde engeri gye baatulugunyiziddwa ne bategeeza nti bateekateeka okuwawaabira gavumenti olw’okutulunyizibwa obwereere n’okutyoboola eddembe lyabwe. Baagambye nti, baayise mu kaseera akazibu mu bbanga ery’ennaku 14 ze bamaze mu kaduukulu e Gulu gye baggalirwa nga baggyiddwa mu Arua gye baabakwatira nga August 13, 2018.

MWIRU AKYALOJJA Omubaka Paul Mwiru, yategeezezza nti abaserikale ab’eggye erikuuma Pulezidenti baamukuba nnyo nga bamubuuza amayitire ga Bobi Wine ne bamumenya n’omukono ogwa kkono.

Mwiru yagambye nti, akyebuuza ku balooya be ku ky’okutwala gavumenti mu kkooti kubanga baamutulugunyiza bwereere era alina obuvune ne munda mu lubuto n’ebitundu by’omubiri ebirala.

MABIKKE ALAZE EBIWUNDU Michael Mabikke yategeezezza nti, abajaasi baabasalako ku ssaawa nga 1:30 ez’olweggulo ne batandika okubakuba nga bababuuza ekyabaggye e Kampala okugenda okutabula akalulu mu Arua.

Olwo amasasi gaali gayiika ng’enkuba wakati mu kibooko okunyooka era Mabikke yannyonnyodde nti, yadduka ne yeekukuma wansi w’emmeeza kyokka ne bamukukunulayo.

Yategeezezza nti, ajjukira ng’akwatibwa we baamukubira bbatuuni omubiri gwonna, kibooko n’ebigala by’emmundu era bwe yayimbuddwa yatuukidde mu ddwaaliro abasawo ne bamutegeeza nti alina obuvune obw’amaanyi munda mu mubiri.

Mabikke yategeezezza nti, ku ssaawa nga 6:00 ez’ekiro bonna baakuh− haanyizibwa ne babavuga okubatwala e Gulu kyokka tagenda kwerabira kaseera ke baayitamunga babavuga mu ttumbi. “Ka bbaasi kaawaba ne kayingira ekisiko era Katonda yazza bibye. Jjukira nti twali twakubiddwa dda nga tewali atalina bulumi ku mubiri naye twatuuka e Gulu buli omu n’assa ekikkowe nti tuvudde magombe. Twali tukyali e Gulu ne baleeta omubaka Zaake nga yenna atonnya musaayi. Ono ffenna ye yatusinga okutulugunyizibwa.

Twasaba tutwalibwe mu ddwaaliro. Bwe bankebedde ne bazuula nti nafunye ekizibu mu bbunwe era ndi ku ddaggala wano w’ondabira lwakuba nneegumya,” Mabikke bwe yagambye.

Yategeezezza nti, ennaku 14 z’amaze e Gulu wadde famire ya byabufuzi naye zibakosezza era beeyongedde obuvumu. Yagambye nti, “Ate Gavumenti yeeyongedde kutusaanuula okukakasa nti ebikolwa eby’okutulugunya n’ekko byonna tubikomya.”

SSEBUWUFU AKAABA OBULUMI John mary ssebuwufu yagambye nti, yatwaliddwa mu kyuma ne bamukebera ng’awulira obulumi bumutta era ebyavuddeyo byamwewanisizza omutima. “Abasawo bahhambye nti, eggumba lyange erigatta ku mugongo lyakoseddwa era ssinga sifuna bujjanjabi bwanjawulo amangu ddala nkyayinza okufuna obulema bwennyini,” Ssebuwufu bwe yagambye.

Yannyonnyodde nti, ye yakwatibwa emirundi ebiri; “Nasooka ne nkwatibwa ne Fred Nyanzi ng’obudde bukyali bwa ku makya kyokka olw’okuba twali tukwatiddwa bubi ne tusaba okugenda mu ddwaaliro era awo Nyanzi ye naddayo e Kampala. Nze nali namuziga y’okukwanaganya ebyokulonda byonna mu ‘kkampu’ ya Kas-siano Wadri era nga nvunaanyizibwa mu kusindika buli muntu w’agenda okukolera. Nali sisobola kudduka mu kalulu wadde nkubiddwa.

Ku ssaawa nga 4 :00 ez’ekiro enkeera ku lunaku lw’okulonda nga bannaffe baasuze mu kaduukulu era ng’akulira ebyokulonda amalirizza okulangirira akalulu, abaserikale bansalako ne bagamba nti nabadduseeko.

Abasajja bankwata bubi era baasooka kunteeka ku poliisi ye Arua. Bwe zaawera essaawa nga munaana ez’ekiro ne bankozesa sitaatimenti era ne banzisa mu kamotoka okuntwala e Ggulu.

Twatuuka ku ssaawa 12:00 ez’oku makya era essaawa za kkooti bwe zaatuuka ne bangatta ku bannange ne batutwala lumu ffenna mu kkooti, kyokka nzijukira nali mu bulumi obutagambika,” Ssebuwufu bwe yagambye.

POLIISI YE YAMPONYA - WADRI Kassiano Wadri yalombozze engeri gye yakwatibwamu n'engeri gye yawonamu okutulugunyizibwa obutafaanana nga Francis Zaake ne Robert Kyagulanyi (Bobi Wine) abali ku bitanda.

Wadri eyazze ku Palamenti eggulo ku Lwokubiri okukola ku by’okulayizibwa obwedda buli mubaka amulabako ng’amugwa mu kifuba n’okumuyozaayoza okutuuka ku buwanguzi.

Obwedda ababaka ab’enjawulo babuuza Wadri engeri gye yawonamu kuba banne abamu nga Zaake ne Bobi Wine bakyali mu malwaliro. “Omukisa nnina gumu gwokka nti, abaserikale ba poliisi be bankwata, naye ssinga abakuuma Pulezidenti aba SFC be bankwatako ssinga nange ndi mu ddwaaliro kuba baatunoonyanga babiri ne Bobi Wine,” Wadri bwe yatandise okunyumya.

Yagambye nti, olunaku lwa Mmande olwalimu akavuyo lwamusanga ku Royal Hotel eri okumpi ne Pacific Hotel ababaka abasinga nga Bobi Wine gye baali bapangisa.

More From The Author

Emboozi z’omuwandiisi endala

Emboozi endala

Baby 220x290

Eyanzaalamu n'annemya emisomo anneefuulidde...

NZE Judith Kyampiire 22, mbeera mu Good Hope Makerere Kavule mu Munisipaali y’e Kawempe.

Ssenga1 220x290

Maze omwaka mulamba sirwala

NNINA emyaka 27 naye maze omwaka gumu nga sirwala era sifuna lubuto. Osobola okunfunira ku ddagala ne ntandika...

Ronaldo 220x290

Ronaldo yandikomawo ku mupiira...

Ronaldo okutuula ogwa Young Boys olwo akomewo ku gwa ManU.

Pavon 220x290

Arsenal etandise enteeseganya ne...

Pavon yazannyira Argentina mu World cup mu June omutindo gwe ne gucamula ttiimu nnyingi.

Twala 220x290

Engeri omusuubuzi w’ewa Kisekka...

ABAZIGU abeebijambiya balondodde omusuubuzi ow’amaanyi ne bamutemula. Bamuttidde ku ggeeti y’amaka ge nga yeggulira...