TOP
  • Home
  • Amawulire
  • Bamugemereire ne Maj. Nakalema bagumizza abaagobwa ku ttaka e Mukono

Bamugemereire ne Maj. Nakalema bagumizza abaagobwa ku ttaka e Mukono

By Henry Nsubuga

Added 13th October 2018

Akakiiko akakola ku gw’okubuuliriza ku ndoliito z’ettaka mu ggwanga akakulirwa omulamuzi Catherine Bamugemereire ssaako omukozi ku maka g’obwapulezidenti, Maj. Edith Nakalema basambye ensiko nga balambula ebintu by’abantu ebibalirirwamu obuwumbi bw’ensimbi ebyayonoonebwa omugagga Dick Banoba ng’abagoba ab’ebibvanja abakunukkiriza mu 300 ku ttaka lye.

Mknkira16 703x422

Kato ng'annyonnyola engeri ennyumba ye n'ebintu gye byayonoonebwamu eri ab'akakiiko.

Okuva mu mwezi gwa May, Banoba nga yeeyambisa abavubuka be yaggyanga mu kibuga Kampala nga babagalidde ebissi omuli amajambiya, embazzi, ensuluulu, emiggo n’ebirala yatandika okulimba abatuuze ku kyalo Kirangira ekisangibwa mu ggombolola y’e Nama mu disitulikiti y’e Mukono n’asanyaawo amayumba g’abantu, n’okusaawa emisiri gy’emmere n’agireka ku ttaka.

 Wakati mu maziga n’okwaziirana, abatuuze beekokkola olw’ekikolwa kya Banoba nga n’eby’embi, na buli kati bakyekokkola eky’okuba ng’ate Banoba yali akuumirwa basirikale ba poliisi mu kiseera ekyo abaali baduumirwa eyali akola nga DPC, Henry Abaho.

Abatuuze nga bakulembeddwamu ssentebe w’ekyalo Kirangira, Deogratias Golooba ku Lwokutaano baakedde kwaniriza oluseregende lw’emmotoka z’abakakiiko ssaako Maj. Nakyobe ne babalambuza okutandikira ku malaalo ga bannaabwe abaafa emyaka egisoba ne mu 30 ne babaziika ku ttaka Banoba kwe yabagoba nga tebeesiikidde na kanyeebwa.

 mulamuzi amugemereire ngakwatidde sonko akazindaalo ngayogera Omulamuzi Bamugemereire ng'akwatidde Ssonko akazindaalo ng'ayogera.

Aba’akakiiko era baalambudde amayumba g’abantu agaamenyebwa, ennimiro ezaasaayibwa ssaako ekidiba ky’ebyennyanja Wilberforce Idewa ekibadde kyakonoonebwa abasajja ba Banoba bwe baakizinzeeko ne bata amazzi n’ebyennyanja ne bigenda.

Hosea Ssonko agamba nti akaddiyidde ku ttaka lino nga kati n’amaaso tegakyalaba, kyokka ng’emyaka gye egisinga obungi abadde mu kulwana ku nsonga za ttaka lino okulaba nga tebagobaganyizibwa mu bukyamu yattottoledde ab’akakiiko engeri Banoba gy’azze abatulugunya nga yeeyambisa woofiisi ez’amaanyi n’ebikonge mu gavumenti ssaako abakulu mu bitongole by’eby’okwerinda.

Ssonko yategeezezza nti oluvannyuma lwa Banoba okuvaayo n’abategeeza nti ye yali nnanyini ttaka kwe bali, yagenda okweyanjula gy’ali ng’amutwalidde n’obusuulu kyokka kyokka n’abugaana ng’agamba nti ye yali mugagga ng’ensimbi akyalya na ku za jjajjaawe.

 mulamuzi amugemereire nabakakiko nga balambula ebikande ezaali ennimiro zabatuuze ezasaayibwa nemmere nebbibwa Omulamuzi Bamugemereire n’abakakiko nga balambula ebikande ezaali ennimiro z’abatuuze ezasaayibwa n’emmere n’ebbibwa.

“Okuva kw’olwo azzenga atutulugunya mu ngeri ez’enjawulo ssaako okutusibisa mu makomera nga ne bannaffe nga basatu bafiira mu makomera. Eby’embi Banoba yagenda mu maaso n’okugobaganya ffamire zaabwe nga ne gye buli kati bali mu kubundabunda tebalina we babeera. Twekubidde enduulu mu wofiisi nnyingi naye kati tufunye ku ssuubi bwe tulabye omulamuzi Bamugemereire n’ab’akakiiko ke ssaako Maj. Nakalema, katusuubire nti munaatusangula ku maziga ge tufumbekeddemu emyaka emingi,” SSonko bwe yannyonnyodde.

Ye Umar Ssebuyungo yagambye nti abayaaye Banoba be yakozesa okwonoona ebintu by’abantu bafuuka eky’obulabe eri eby’okwerinda by’ekitundu ne disitulikiti y’e Mukono okutwalira awamu.

Ssebuyungo yagambye nti bano wakati nga bonoona ebintu by’abantu ate bakkakkananga ku baavangayo okutaakiriza ebintu byabwe nga babakuba kye yagambye nti kyali kikolwa kyattima nnyo.

Mu beekokkola Banoba ye DPC w’e Mukono, Rogers Sseguya olw’ensonga nti ye yagaana okumuyamba mu bikolwa eby’okwonoona ebintu by’abantu ng’era bwatyo yakozesa omukisa bwe yali agenze okutendekebwa okumala emyezi 3 olwo ne yeeyambisa eyateekebwa mu woofiisi ng’akola nga DPC Henry Abaho n’amuwa obukuumi n’akola effujjo ku bantu.

 amugemereire ngalambula ebimu ku bintu ebyayonoonebwa namayumba ku kkono ye nnyumba ya ato eyakoonebwa Bamugemereire ng'alambula ebimu ku bintu ebyayonoonebwa n'amayumba, ku kkono ye nnyumba ya Kato eyakoonebwa.

Sseguya agamba nti era olwakomawo n’aziyiza Banoba okugenda mu maaso n’okutulugunya abatuuze ng’era kye yakola kwe kutandikanga okwebbirira obwebbirizi nga basajjabe bazinda ennyumba n’ennimiro eby’omutuuze omu ne babyonoona mu kiseera kitono ne badduka nga poliisi w’etuukira nga basanga miranga nga bbo ababikoze badduse dda.

Agamba nti Banoba azzenga amuggulako emisango egy’enjawulo egy’enjawulo mu kakiiko akakwasisa empisa aka poliisi aka Police Standards Unit (PSU) nga mu kiseera kino alina ffayiro 3 ezaamuggulwako nga baamuyise akole ne siteetimenti empya mu fayiro eyaakaggulwawo.

“Oluvannyuma lw’okulaba ng’ensonga z’okwonoona ebintu by’abantu zongera kugenda mu maaso, nayita aduumira poliisi mu Kampala n’emiriraano Moses Kafeero era yalagira wano wateekebwewo abapoliisi abakuuma abantu ekiseera kyonna. Bano weebali bakola kinnawadda era ekyalo mu kadde kano kirina ku buweerero,” Sseguya bwe yannyonnyodde akakiiko mu kafubo ke baabaddemu nga kye baggye batuuke mu Kirangira.

Ono era yagasseeko nti poliisi yakwata abasajja nga 61 abaalina amajambiya nga basaawa emmere y’abantu ne babatwala mu kkooti kyokka bano bateebwa nga tewali wadde okubasindikako mu kkomera.

 mu ku nnyumba ezaayonoonebwa nga ya avid ato Emu ku nnyumba ezaayonoonebwa nga ya David Kato.

Wabula mu kwanukula, Bamugemereire yagambye nti nabo ng’abakakiiko ensonga z’okubuuliriza ku ttaka lino tezibabeeredde nnyangu nga bazze babawawaabira mu woofiisi enkulu naye n’agamba nti wadde biri bwebityo, tebayinza kulemererwa kubuuliriza ku nsonga zino.

Ono era yalabudde Banoba okwewala okugenda mu maaso n’okwonoona ebintu by’abantu wadde ng’ate akakiiko k’ayisa ekiragiro ekimuyimiriza okutuuka nga bamaze okunoonyereza.

Bamugemereire yategeezezza nti ssinga anaddamu okuwulira ebikolwa bino ate mu kadde kano, tajja kulonzalonza kulagira akwatibwe aggulweko ogw’okunyomoola ebiragiro by’akakiiko.

Ye Maj. Nakalema yagambye nti oluvannyuma lw’abatuuze omuli ne Ssonko okumukubira essimu nga balaajana olw’embeera Banoba gy’abayisizzaamu, yategeeza Pulezidenti Museveni ku nsonga zaabwe era n’amulagira asabe ab’akakiiko bagendeyo m bwangu.

More From The Author

Emboozi z’omuwandiisi endala

Emboozi endala

Drssempangieyasingaanidwamumakagenanyonyolawebuse 220x290

Abaana Abakaramoja basomesebwe...

Ssempangi awabudde gavumenti ku baana b’e Karamoja abasibira ku nguudo n’ategeeza nga bwe batundibwa abazadde okujja...

Chozenbeckyclearwebuse 220x290

Abayimbi beesunga kusanyusa badigize...

Abayimbi ab'amannya bali mu kuwawula maloboozi olw'okwesunga okuyimba mu Kyepukulu ekiwagiddwa Vision Group ne...

Lukiikombalirira7 220x290

Buganda eyisizza embalirira yaayo...

OBWAKABAKA bwa Buganda buyisizza embalirira y’Omwaka 2019/2020 ng’eno ya nsimbi 121,079,490,880/- nga kweyongera...

Samba 220x290

Omusika atunze ebiggya ku 1500/=!...

PULOFEESA Kiwanuka Ssemakula amaziga gaamuyunguse bwe yatuuse ku butaka gy’asibuka ng’amalaalo ga kitaawe gaatundibwa...

Kub2 220x290

Gavt. esiimye ebitongole ebisikiriza...

Gavt. esiimye ebitongole ebisikiriza abavubuka okuyingira obulimi n’obulunzi