TOP
  • Home
  • Amawulire
  • Abaakwatibwa ku gw'okutta Kirumira beemulugunya olw'okutulugunyizibwa okususse

Abaakwatibwa ku gw'okutta Kirumira beemulugunya olw'okutulugunyizibwa okususse

By Eria Luyimbazi

Added 13th March 2019

Okunoonyereza mu musango gw'okutta Kirumira kuwedde omu ku baakwatibwa yeemulugunyizza ku by'okumutulugunya

Mwebe6web 703x422

Mwebe ng’alaga enkovu ku bukokola z’agamba nti zaava mu kutulugunyizibwa abasirikale abaamukwata . Mu ddyo ye Kalungi.

Bya Eria Luyimbazi 

ne Steven Kiragga

 

 

OMUSAJJA owookubiri eyakwatibwa ku by’okutta omusirikale wa poliisi, Muhammad Kirumira n’omukazi Resty Nalinnya Mbabazi, Hamza Mwebe akukkulumye olw’ebitongole byokwerinda ebyamukwata ne bimutulugunya n’afuna ebisago.

 Bwe yabadde aleeteddwa ku kkooti ewa Wakiso okuddamu okuwulira omusango ogubavunaanibwa ne munne Abubaker Kalungi,  Mwebe yagambye nti abajaasi n’ekitongole kya CMI abaamukwata baamutulugunya bya nsusso n’afuna amabwa mu  bitundu eby’enjawulo  ku mubiri.

“Nakosebwa ekisusse abasajja abankwata bantulugunya era kati ndi mu bulumi obutagambika, sisobola kusitama nga n’emisango gye banvunaana sigimwanyi,” Mwebe bwe yategeezezza.

Okukakasa Mwebe bye yabadde ayogera ku ky’okumutulugunya yasitudde ekkanzu ye n’alaga nkovu z’amabwa ku maviizi ne ku bigere ssaako n’okulaga obukokola nga bwonna buliko enkovu nga zonna agamba zaamutuusibwako abaserikale abaamukwata.

Ensonga eno ne munne Kalungi gye yeemulugunyaako. 

Omulamuzi Hillary Kirya, ye yasooka okuwulira omusango guno n’awa ekiragiro aweebwe obujjanjabi mu kkomera e Kigo.

Nga baasimbiddwa mu maaso g’omulamuzi Noah Ssajjabi omuwaabi wa gavumenti,  Ameria Kamushabe yetegeezezza nti okunoonyereza mu musango oguvunaanibwa Kalungi ne Mwebe  g’owokutta Kirumira ne Nalinnya bwe kufundikiddwa nga beetegefu okugenda mu maaso n’omusango.

“Oweekitiibwa Omulamuzi okunoonyereza mu musango gw’okutta Kirumira kuwedde era nsaba bampeeyo olunaku olulala basobole okubasindika mu kkooti enkulu beewozeeko,”  Kamushabe bwe yategeezezza.

Omulamuzi Ssajjabi yayongeddeyo omusango okutuusa nga March 27, 2019 nga Kalungi ne Mwebe lwe basuubirwa okusindikibwa mu kkooti enkulu okusobola okutandika okwewoozaako.

More From The Author

Emboozi z’omuwandiisi endala

Emboozi endala

Funa1 220x290

Engeri abakola mu bbanka gye babba...

POLIISI mu kubuuliriza kwayo ku mukozi wa Barclays Bank, Nashiba Naiga agambibwa okubba obukadde 190 ku akawunta...

Sula 220x290

Abadde yeefudde mmo okubba abagagga...

POLIISI ekutte omukazi agenda mu bbaala ne wooteeeri ez’ebbeeyi okusikiriza abasajja okumukwana oluvannyuma n’abakuba...

Theresamay 220x290

Katikkiro wa Bungereza bamukase...

KATIKKIRO wa Bungereza Theresa May ofiisi emutudde mu kifuba n’alekulira. Alangiridde nti agenda kuwaayo ofiisi...

Temya 220x290

Bba wa muwala w'omugagga Ntakke...

BBA wa muwala w’omugagga Gaster Lule Ntakke ayitibwa Arthur Kizito 44, akubye abooluganda n’emikwano encukwe bw'asangiddwa...

Genda 220x290

Maneja mu wooteeri e Seeta attiddwa...

ABANTU abatannaba kutegeerekeka bawambye abadde maneja avunaanyizibwa ku bayimbi mu kifo ekisanyukirwamu ekya MURS...