TOP

Baganda ba Bashir nabo babakutte

By Musasi wa Bukedde

Added 19th April 2019

Bannamagye abaawambye obuyinza e Sudan bakutte baganda ba Omar al-Bashir babiri abagambibwa nti b’abadde akozesa okunyaga ssente za Gavumenti.

Langa 703x422

Bashir

Bashir 75, eyaggyiddwa mu buyinza ku Lwokuna oluwedde alina ssente obuwumbi bwa doola mwenda eziterekeddwa mu bbanka ezenjawulo. Kigambibwa nti zonna yazinyaga mu Gavumenti naddala mu kutunda amafuta.

Abadde azinyaga ng’aziyisa mu bitongole by’ebyokwerinda ebirina enkizo ng’ensaasaanya yaabyo tetunulwamu.

Bwe kituuka ku bitongole ebikessi ebiri wansi w’amaka ga Pulezidenti ne ofiisi ye, Bashir abadde alagira ne ziweebwa baganda be Abdallah Hassan al-Bashir ne Al-Abbas Hassan al-Bashir. Bombi baakwatiddwa ku misango gy’enguzi n’okunyaga ensimbi za Gavumenti.

Bashir alina baganda be abamanyiddwa bataano. Okukwatibwa kwabwe kwalangiriddwa omwogezi wa Gavumenti ey’ekiseera Lieutenant General Shamseddine Kabbashi, ku Lwokusatu ekiro.

“Bavunaanibwa nguzi n’okunyaga ensimbi za Gavumenti okumala emyaka 30. Twagala bakomyewo ssente z’omuwi w’omusolo zonna ze baanyaga,” bwe yategeezezza.

Abeekalakaasi abaavuddeko Bashir okugwa bakyalemeddeko nga baagala bannamagye obuyinza babukwase abantu baabulijjo kubanga nabo (bannamagye) kitundu ku Gavumenti ya Bashir.

Okukwata baganda ba Bashir kitunuuliddwa nga kaweefube wa bannamagye okukkakkanya abeekalakaasi nga bwe bagenda okukola ku nsonga ze baludde nga beemulugunyako naddala enguzi.

Bashir abadde amaze myaka 30 mu buyinza, yaggyiddwa mu kifo gy’abadde akuumirwa n’aggalirwa mu kkomera ery’amaanyi erya Kober mu Khartoum eno nga naye Bashir gye yasibiranga abamuwakanya.

en. Abdel Fattah al-Burhan, akulira Sudan kati yeeyamye nga bw’atagenda kuttira ku liiso muntu yenna eyabba ssente za Gavumenti.

Alagidde ebitongole bya Gavumenti byonna okuwaayo akawunti kwe bitereka ensimbi munda mu Sudan n’ebweru zeetegerezebwe. Era yatuuzizza olukiiko lw’amagye ne lusalawo obubinja bwonna obw’abalina emmundu obwassibwawo Bashir okuyambako okukuuma emirembe, buzzibwe wansi w’amagye.

Kyokka amagye gaasazeewo Bashir kumuwozeseza mu Sudan olw’emisango gy’okutta abantu n’okutyoboola eddembe lyabwe e Darfur.

Wabula ekibiina ekirwanirira eddembe ly’obuntu ekya ‘Amnesty International’ kyawabudde Bashir atwalibwe mu kkooti y’Ensi Yonna eya International Criminal Court etuula mu Hague ekya Nertherlands.

More From The Author

Emboozi z’omuwandiisi endala

Emboozi endala

Thumbnailwalesbalecelebration 220x290

Gareth Bale yeerinde obusunga bw'abawagizi...

Nga tafudde ku bya kunyiiza bawagizi ba Real Madrid, essanyu lya Wales okuyitamu okuzannya empaka za Bulaaya (Euro...

Mourinhowasattractedbythequalityofthespurssquad 220x290

Mourinho alangiriddwa ku gw'okutendeka...

Kyaddaaki ssentebe wa Tottenham (Spurs), Daniel Levy yakutte ku mmanduso n’agoba omutendesi Mauricio Pochettino...

Meddiekaggwa 220x290

Ssentebe w'akakiiko k'eddembe ly'obuntu...

Ssentebe w'akakiiko k'eddembe lyobuntu afudde kikutuko!

Sharifah1 220x290

Sharifah Kateete waakuvuga ddigi...

Wadde ng'olutalo ku ngule ya MX125 luli wakati wa Wazir Omar ne Fortune Ssentamu, Sharifah Kateete alayidde okubalaga...

Kasozi 220x290

Owa KCCA yeesunga kukaabya URA...

Oluvannyuma lwa Allan Okello, Charles Lukwago ne Nicholas Kasozi okukomawo, Mike Mutebi mugumu nti bagenda kulabya...