TOP
  • Home
  • Amawulire
  • Stella Nyanzi agobye abamweyimirira: 'Mundeke nfiire mu kkomera'

Stella Nyanzi agobye abamweyimirira: 'Mundeke nfiire mu kkomera'

By Hannington Nkalubo

Added 24th April 2019

STELLA Nyanzi yeecwacwanidde ku kkooti ya Buganda Road n’agaana mikwano gye n’aba famire ye okuddamu okumweyimirira nti ave mu kkomera e Luzira ku misango gy'ayise emijingirire egimussiddwaako.

Stella 703x422

Stella Nyanzi (wakati) n'abaserikale nga baddayo mu kkomera e Luzira.

Eggulo yazziddwaayo e Luzira okutuusa nga May 11 omwaka guno. Nga tannaba kulinnya bbaasi, yategeezezza omubaka Betty Nambooze Bakireke eyabadde n’aba FDC nga beetisse obubaka okuva mu Gavumenti ya Dr. Kizza Besigye eya Peoples Government nti tayagala kumweyimirira.

Yategeezezza Nambooze nti emisango gy’okuwandiika obubaka ku mikutu gya kompyuta mijingirire era talaba ngeri Gavumenti gy'esobola kugyesigamako kumuvunaana ate naye tasobola kukoma kuwandiika era atayagala bubaka bwe waddembe okugaana okubusoma kubanga kompyuta oba ssimu erina akapeesa akagaana okusoma obubaka bw’omuntu.

Yagambye nti, ayagala omulamuzi awulirize omusango gwe agusalewo ng’akolera ku mazima naye nga tassiddwaako bukwakkulizo bwa kweyimirirwa awatali musango gwonna gwe yazza.

Yamugambye nti ne bwe banaamweyimirira wagenda kuyitawo olunaku lumu addemu awandiike ate baddemu bamukwate.

Ayagala kkooti esalewo ekyenkomeredde oba okuwandiika ku mukutu gwa kompyuta musango oba si musango kiggwe.

Nambooze mu busungu yagambye nti, bagenda kuwandiikira abakulu mu kitongole ekiramuzi n’amakomera bayambe omuntu waabwe bawulirize omusango guno mangu kubanga eby'okweyimirirwa abigaanye.Nambooze yategeezezza nti, Gavumenti yeeyambisa obukwakkulizo obussibwa ku muntu okweyimirirwa n’etyoboola eddembe lye.

“Nze nnina emisango mingi naye tegiggwa. Gavumenti w'eyagalira weegizuukusiriza ekitali kituufu. Tusaba abalamuzi bawulirize omusango gwa Nyanzi mangu bagusalewo” Nambooze bwe yagambye.

Nyanzi avunaanibwa emisango ebiri gyonna nga gikwata ku kukozesa bubi emikutu gya kompyuta n’atyoboola ekitiibwa ky’abakulembeze.

Ng’abaserikale tebannaba kukkiriza bagenyi ba Nyanzi ku mulaba, abawagizi ba FDC n’abamu ku ba famire ye baasoose kwekalakaasa ne balangira abaserikale okutulugunya omuntu waabwe nga bamugaana okulaba abagenyi be kyokka oluvannyuma kyatereezeddwa bonna ne bakkirizibwa.

Aba famire beewuunyizza omusango bwe gwayongezeddwaayo amangu nti ekizimbe kya kkooti ya Buganda Road emisango mwe gyabadde giteekeddwa okuwulirizibwa kiddaabirizibwa era abawagizi beecwacwanye nti kyewuunyisa ne kaabuyonjo tezikyaliwo zaazibiddwa.

Nambooze yagambye nti bagenda kussaawo embeera ey'enjawulo okulaba ng'omusango gw’omuntu waabwe guwulirwa era gusalibwa mu budde.

More From The Author

Emboozi z’omuwandiisi endala

Emboozi endala

Sab1 220x290

Ababadde bagufudde omuze okubba...

Ababadde bagufudde omuze okubba mukama waabwe kkamera zibakutte

Pp 220x290

Abayimbi Bannayuganda battunse...

Abajamaica;Christopher Martin ne D-Major bakubye Bannayuganda emiziki egibaccamudde

Hse1 220x290

By’olina okumanya ng’ogula ennyumba...

Kya makulu omuntu akuguza ennyumba okukuwa ppulaani yaayo n’ogiwa omukugu nagyetegereza okukakasa nti ebiriko byagobererwa...

Ssenyonjo 220x290

Poliisi ezudde ebipya ku yatema...

POLIISI ezudde ebipya ku musajja Hamidu Ssennyonjo amanyiddwa nga Munomuno omu ku bagambibwa okuyingirira omugagga...

Mayiga 220x290

Katikkiro alaze engeri ebbula ly’amazzi...

KATIKKIRO wa Buganda, Charles Peter Mayiga ayongedde okukkaatiriza obukulu bw’amazzi mu bulamu bw’abantu n’agamba...