TOP
  • Home
  • Amawulire
  • Mutabani wa Dr. Kayiira ayogedde ebikambwe ku mudaali

Mutabani wa Dr. Kayiira ayogedde ebikambwe ku mudaali

By Hannington Nkalubo

Added 13th June 2019

DAVID Kayiira 34, Mutabani wa Dr. Andrew Lutakome Kayiira agambye nti yejjusa ekyamututte ku mikolo gy’Abazira kubanga abategesi baatyobodde n’okulengezza emirimu kitaabwe gye yakola mu lutalo olwanunula Uganda.

Kayiira2 703x422

David Kayiira ne Museveni ku Lunaku lw'abazira.

BYA HANNINGTON NKALUBO
 
DAVID Kayiira 34, Mutabani wa Dr. Andrew Lutakome Kayiira agambye nti yejjusa ekyamututte ku mikolo gy’Abazira kubanga abategesi baatyobodde n’okulengezza emirimu kitaabwe gye yakola mu lutalo olwanunula Uganda.
 
Nga yenna ayogeza busungu yalaze nti omudaali ogwabaweereddwa gugwa mu kiti kya midaali egyo egizze giweebwa abantu abawaddeyo emmere nga muwogo oba lumonde n’okukweka abalwanyi egya 'Luweero Triangle' .
 
Yagambye nti kitaabwe yali mulwanyi nnamige era bye yakola Pulezidenti Museveni abimanyi bulungi nga mulwanyi munne.
 
Yanokoddeyo nti kitaabwe yali ku ddaala lya njawulo eryalimu abalwanyi ab’omutawaana era abaayigga abawaayo ebyokulwanyisa era byeyakola bw'obiyisaamu amaaso n’omussa ku ddaala ly'abawaddeyo muwogo oba omutyobodde nnyo.
 
David Kayiira ye mutabani w’omugenzi Andrew Lutakome Kayiira asembayo.
Ye yakwasiddwa omudaali gwa kitaabwe ku Ssande okumwebaza emirimu emirungi gye yakola mu lutalo.
 
Ono ye yasigalawo mu ggwanga ng’abaana abalala mukaaga baagenda mu America gye babeera olw’okutya embeera y’ebyobufuzi eyaliwo mu ggwanga.
 
Yakwasiddwa omudaali gwa 'Luweero Triangle' era n’afunawo akaseera n’ayogeramu ne Pulezidenti Museveni.
 
Eggulo yatuukiriddwa omusasi ono ku ssimu n’ategeeza nti wadde omudaali gwetaagisa naye abaategese baalibadde basooka ne batunuulira omulimu gw’omuntu gwe bagenda okuwa omudaali ogwo oba ddala gutuukagana n’omulimu gwe yakola mu lutalo.
 
“Omudaali ogwatuweereddwa gwabadde gulaga obunyoomi , okutyoboola n’okulengezza omugenzi.
 
Wadde taata yafa naye ate tosobola kumutyoboola kutuuka ku ddaala eryo’Mutabani w’omugenzi bwe yategeezezza.
 
Yagambye nti famire yaabwe si nsanyufu ku ngeri Gavumenti gye gitwalamu.
 
Yagasseeko nti mu bbanga lya myaka 33 Gavumenti gyemaze mu buyinza tewali lunaku wadde essaawa emu Pulezidenti Museveni gye yali akkirizza okubasisinkana.
 
Yasabye gavumenti ebeeko kyekolera famire. Yategeezezza nti ye muto ku baana ba Kayiira abalala .
 
Omugenzi okuttibwa yalina emyaka ebiri ng’ali ne maama we Ruth Nankanja era amukuzizza mu mbeera y’obugubi n’obulumi obwekitalo nga tewali amukwatirako era baganda be abalala baasalawo okufuluma eggwanga .
 
Yajjukizza nti famire n’okutuusa kati tefunanga lipoota ku nfa eya kitaabwe era oluvannyuma lwa lipoota entuufu, gavumenti esaana erage okusiima emirimu kitaabwe gye yakolera eggwanga.
 
Yagambye nti ebigendererwa bya Kayiira, Pulezidenti Museveni abimanyi bulungi kwali kuzza nfuga entambulira ku mateeka ne Demokulase .
 
Ku Lwokubiri , DP yasabye Pulezidenti Museveni wadde yawadde famire omudaali naye eggwanga kye lyetaaga lipooti ekwata ku batemu abatta Kayiira.
 
Mao yagambye nti bwe giba midaali Kayiira asaana mudaali gwa njawulo egitali gino egiweebwa buli muntu.

More From The Author

Emboozi z’omuwandiisi endala

Emboozi endala

Pp 220x290

Abayimbi Bannayuganda battunse...

Abajamaica;Christopher Martin ne D-Major bakubye Bannayuganda emiziki egibaccamudde

Hse1 220x290

By’olina okumanya ng’ogula ennyumba...

Kya makulu omuntu akuguza ennyumba okukuwa ppulaani yaayo n’ogiwa omukugu nagyetegereza okukakasa nti ebiriko byagobererwa...

Ssenyonjo 220x290

Poliisi ezudde ebipya ku yatema...

POLIISI ezudde ebipya ku musajja Hamidu Ssennyonjo amanyiddwa nga Munomuno omu ku bagambibwa okuyingirira omugagga...

Mayiga 220x290

Katikkiro alaze engeri ebbula ly’amazzi...

KATIKKIRO wa Buganda, Charles Peter Mayiga ayongedde okukkaatiriza obukulu bw’amazzi mu bulamu bw’abantu n’agamba...

Bazigu1 220x290

Abazigu balumbye amaka e Munyonyo...

ABAZIGU balumbye amaka e Munyonyo ne batemaatema omukozi w’awaka Isa Birimusho n’okumusiba akandooya ne bamuleka...