TOP

Ebyabadde mu kuziika Mukwano

By Joseph Makumbi

Added 14th July 2019

NAGGAGGA Amirali Karmali Mukwano yaziikiddwa e Kololo mu limbo, kyokka bannaddiini mu Busiraamu ne bawakanya eky’okumenya obulombolombo bw’eddiini y’Obusiraamu ng’okumaza omulambo ennaku ssatu nga tegunnaziikibwa wamu n’okugubikkulira abantu okugulabako.

Wuli 703x422

Mukwano yafa Lwakusatu lwa wiiki eno ng’amaze ennaku ssatu nga tannaziikibwa.

Mu nteekateeka eyakoleddwa be kikwatako, omugenzi baamututte ku kisaawe e Kololo abantu baabulijjo okwabadde ab’emikwano, abakungu mu gavumenti ne bamukubako eriiso evvanyuma.

Wabula Sheikh Muharim Kasujja abadde akolanga Amir w’ekiwayi ky’Abatabbuliiki e Nakasero, yannyonnyodde nti byonna ebyakoleddwa bikontana n’amateeka g’Obusiraamu ku muntu afudde. Yakiraze nti mu Busiraamu omuntu bw’afa, ateekeddwa kuziikirwawo.

Yayongeddeko nti omuntu olukutuka bwati, anaazibwa, n’azingibwa bulungi okumuteekateeka okutwalibwa okuziikibwa.

Abantu bokka abakkirizibwa okutunula ku muntu oyo be b’eng’anda nga abaana, abazadde nti kyokka nabo bwe basanga ng’omuntu amaze okunaazibwa azingiddwa, tebakkirizibwa kumubikkula.

Ku kisaawe e Kololo, abantu baagumidde enkuba eyakedde okutonnya ne bagendayo okukuba eriiso evvannyuma ku mugenzi era bangi baamwogeddeko ebirungi bingi okumala ebbanga lye bamulabidde.

Gavumenti yakiikiriddwa omumyuka wa Pulezidenti Edward Kiwanuka Ssekandi eyeetisse obubaka bwa Pulezidenti Museveni.

Mu bubaka bwe, pulezidenti yagambye nti Mukwano abadde musajja eyeenyigira mu buli kintu omuli obulimi, eby’ensimbi, munnamakolero, eby’entambula n’ebirala bingi.

Mukwano yayamba nnyo okumalawo ebbula ly’ebintu ebikozesebwa mu bulamu obwabulijjo nga sabbuuni n’ebirala.

Ayigirizza bangi okukola n’awa eky’okulabirako nti ayigirizza bangi obusuubuzi mu kibuga.

Okuba nti omugenzi abadde akozesa abantu abasukka mu 4,000 kiraga nti abadde mwoyo gwa ggwanga yennyini.

Ssaabawolereza wa gavumenti William Byaruhanga yagambye nti bulijjo pulezidenti abaddenga abanyumiza nti bambega be baamuleetera amawulire agagamba nti Mukwano yeenyigira ku kusuubula zaabu n’okutunda ensimbi z’amawanga ag’ebweru mu bukyamu nga baagala bamukwate.

Wabula yabagaana okumukwata n’amuyita n’ayogera naye n’amubuuza ku bye baali bamulumiriza.

Mukwano n’agamba nti yali akola ebintu bingi okweyimirizaawo nti kyokka nga bwe yali asisinkanye pulezidenti, yali asaba aweebwe ssente akole ekkolero.

Museveni yakkiriza okusaba kwa Mukwano n’alagira banka enkulu eya Uganda n’emuwa ssente ze yatandisa okuzimba ekkolero lya sabbuuni era okuva olwo, teyadda mabega okutuusa w’afi iridde.

Omusuubuzi Patrick Bitature yagambye nti ajjukira omugenzi lwe baamusiba e Luzira omwezi mulamba nga bamulumiriza nti yali atunda ebyambalo by’amagye wabula bwe yavaayo, yagamba nti okumusiba kimuyambye okuwummulamu era bwe yavaayo, yatandikira awo n’akola n’amaanyi.

Mutabani w’omugenzi, Alykhan Karmali yagambye nti kitaawe abadde musajja atali wa bulijjo n’akiraga nti abalekedde okusoomoozebwa okw’amaanyi okudda mu bigere bye.

Yagambye nti pulezidenti yamukubidde essimu n’amutegeeza nti ali bweru wa ggwanga kyokka n’amukuutira okukuuma famire ng’eri wamu okusobola okutwala mu maaso ebintu bya kitaabwe.

Yagambye nti bajja kufuba okutwala ebya kitaabwe mu maaso ng’okukulaakulanya Bannayuganda n’amaliriza ng’agamba nti ‘empologoma yeebase ekiro kya leero’.

Katikkiro wa Tooro, Bernard Tungwaho eyeetisse obubaka bwa Oyo Nyimba Kabamba Iguru , yagambye nti omugenzi yali yaweebwa empaaho ya Amooti n’agamba nti awadde Tooro ekifaananyi ekirungi.

More From The Author

Emboozi z’omuwandiisi endala

Emboozi endala

Afrigo 220x290

Lutalo ekintu akyekwatiddemu

OMUYIMBI w’ennyimba za laavu, David Lutalo (ku ddyo) kirabika akooye bapulomoota okumulyako ssente.

Tege 220x290

Kyokka mwana ggwe Lydia Jazmine!...

MWANAMUWALA Lydia Jazmine abamu gwe bayita muninkini wa gundi yamalayo. Akola bimusanyusa nga tafuddeyo ku bantu...

Kuba 220x290

Eyagaba abalongo bange yantamya...

NZE Charles Adwor, mbeera Mukono. Nasisinkana munnange mu 2014 nga nkyabeera e Jinja. Ebiseera ebyo nalina omulimu...

Melon1 220x290

Weyune enkola ya kontulakiti ofunemu...

OKUKOLA kontulakiti n’omuguzi y’emu ku ngeri omulimi n’omulunzi mw’asobola okuyita okufuna akatale k’ebintu bye...

Remagrad2 220x290

Rema alangiridde bw’addayo ku yunivasite...

REMA Namakula alangiridde nga bw’agenda okuddayo ku yunivasite e Kyambogo amalirize diguli ye omwaka guno oluvannyuma...