TOP
  • Home
  • Amawulire
  • Aba Flying Squad bakutte omulala ku by’okubba bodaboda

Aba Flying Squad bakutte omulala ku by’okubba bodaboda

By Musasi wa Bukedde

Added 23rd July 2019

AB’EKITONGOLE kya poliisi ekya Flying Squad Unit bongedde okukwata abagambibwa okutta ababodaboda n’okubabba. Ku luno baayodde omuvubuka Dan Mukasa, ow’omu Lukanga Zooni e Najjanankumbi.

Yomba1 703x422

Dan Mukasa

Ono agambibwa okuba nga y’akulira ekibinja kino mu disitulikiti ssatu; Mpigi, Butambala ne Gomba.

Okunoonyereza kwa poliisi kulaga nti Mukasa okusinga abadde abba bodaboda mu bitundu by’e Kyambalo, Kawuula, Kijonjo, Maddu, Kifamba, Buyinja - Butooro, Kanoni, Mpigi ne Butambala, oluvannyuma n’azitunda mu bagagga e Kampala.

Omwogezi wa poliisi mu Kampala n’emiriraano Patrick Onyango, yagambye nti n’abalala bangi be basuubira okukwata.

“Waliwo abalala be tunoonya era nga tulina essuubi nti tujja kubakwata kubanga abantu kati batandise okutuwa amawulire mu ngeri ya kyeyagalire.

Kino kigenda kutwanguyiza emirimu gyaffe,”Onyango bwe yategeezezza.

Okunoonyereza kwa poliisi kulaga nti waliwo ne pikipiki z’abadde abba mu Kampala okusinga mu bitundu by’e Makindye, Najjanankumbi, Namasuba, n’ebitundu ebiriraanyewo wabula ng’akatale akafuna mu bitundu by’e Mpigi, Butambala ne Gomba.

Kino kitegeeza nti pikipiki z’abadde abba mu Kampala ng’azitunda mu bitundu by’ebyalo ebirala, ate zabba mu byalo azireeta Kampala.

Ow’e Namasuba amulumirizza Poliisi yabadde yaakamukwata ne wabaawo omuvubuka Cosma Kiyimba, ow’e Namasuba n’agenda ku poliisi n’amulumiriza.

Kiyimba yategeezezza nti lumu yamuyingiza mu ddiiru ya bodaboda n’amutwala e Gomba, nti kyokka baali bakyali eyo, n’abaako akafo we yamuleka n’amugamba amulindire awo.

“Yakomawo oluvannyuma nga wayise akabanga katono ng’alina bodaboda gy’avuga n’ahhamba ntuule tugende.

Tuba twakatambulako olugendo lutono ddala n’ayimirira ng’ahhamba nti yali yeerabidde essimu ye e Gomba bwatyo n’ansaba ku ssimu yange agende nayo bw’atuukayo akube ku yiye asobole okugifuna,” Kiyimba bw’agamba.

Ayongerako nti bodaboda kwe baali batambulira yagimulekera n’atamanya lwaki yali yeewala okugenda nayo e Gomba gye yali alese essimu ate n’asalawo n’apangisa endala kwe yagendera.

“Nnali nnyimiridde nkyamulinda kye ssaamanya nti waaliwo abantu abaali bawondera pikipiki gye yali andekedde. Abantu bansalako okwali n’abaana abato nga ndaba basitudde emiggo eno nga bwe bakuba enduulu nga bagamba nti,… ”Omubbi…bannange omubbi wa bodaboda wuuno,” Kiyimba, bwe yategeezezza abaserikale.

Yayongeddeko nti bwe yalaba ng’obulamu bwe buli mu matigga yasalawo n’adduka emisinde kyokka amagulu ne gagaana okumweyimirira bw’atyo n’akwatibwa abatuuze ne bamukuba emiggo egyabula okumutta.

Agamba nti oluvannyuma poliisi okuva e Kanoni y’ajja n’emutaasa ku bantu abaali bataamye okukira ennumba, era ne bamuyingiza ekkomera.

Kigambibwa nti mu kiseera ekyo, Mukasa yafuna amawulire g’okukwatibwa kwa munne era bwatyo n’ayitira eyo n’adduka.

Kiyimba agamba nti oluvannyuma yatwalibwa mu kkomera ly’e Kanoni gye yamala emyezi esatu nga musibe.

Bino bigenze okubaawo nga poliisi yaakakwata abavubuka babiri okuli John Bosco Mugisha eyeeyita Mukiga, ne Alloysius Tamale, eyeeyita Patrick Ssekyewa, oluusi eyeeyita Young Mulo.

Bano kigambibwa nti be baalabikira mu katambi akasaasaana ku mikutu gya yintanenti egy’enjawulo, nga batemula owa bodaboda Derrick Mulindwa, e Kakeeka, mu Lubaga.

More From The Author

Emboozi z’omuwandiisi endala

Emboozi endala

Awar 220x290

Owa Bukedde awangudde engule

Bannamawulire n’abayimbi bawangudde engule mu mpaka za Rising Star Awards

6 220x290

Yiga bwe bafumba enkoko erimu enniimu...

Yiga bwe bafumba enkoko erimu enniimu

Omumyuka 220x290

Pulezidenti Museveni teyeeyibaala...

OMUBAKA wa Busiro East mu palamenti, Medard Lubega Sseggona ategeezezza Pulezidenti Museveni nti teyeeyibaala nti,...

Kutte1 220x290

Nakibinge akunyizza Haruna Kitooke...

JJAJJA w’Obusiraamu, Omulangira Kassim Nakibinge, Omulangira Kakungulu Kalifaani, Sheikh Nuuhu Muzaata ne bamaseeka...

And 220x290

Tondaba akanyiriro embeera mbi...

HARUNA alombojjedde Sipapa ebizibu by’ensimbi byatubiddemu olw’okwenyigira mu by’obufuzi.