TOP
  • Home
  • Amawulire
  • Battottode engeri gye battamu Nagirinnya ne ddereeva we boogedde: Omulimu gw'omugagga twagukolera kaasi wa 1,500,000/-

Battottode engeri gye battamu Nagirinnya ne ddereeva we boogedde: Omulimu gw'omugagga twagukolera kaasi wa 1,500,000/-

By Musasi wa Bukedde

Added 10th September 2019

Omutemu bamukutte n’agamba: Amannya nze Kasolo. Ffe twasse omuwala Maria Nagirinya. Ddereeva we Ronald Kitayimbwa Ssaalongo ye twamuttiddewo, omulambo ne tugussa mu bbuutu y’emmotoka. Agattako: Okutta Nagirinya twabadde ku mulimu gwa mugagga waffe. Yatusasudde kaasi 1,500,000/- (akakadde kamu n’ekitundu). Omulimu gwe twagukoze tatubanja. Naffe tetumubanja.

Loota1 703x422

Kasolo agambibwa okuvuga mmotoka ya Nagirinya (waggulu).

Kasolo asinga kumanyibwa nga “Arsenal”. Kyokka oluusi yeeyita Hussain oba Kopian.

Ye ne banne okuli Johnson Lubega (alina enviiri z’abaraasi) ne Hussein Kisekka baakukunuddwa mu kifo kya Mabiito e Nateete okumpi n’e poliisi, ekimanyiddwa olwa bamalaaya abeetundirawo.

Okubakwata kyaddiridde omuyiggo gw’abeebyokwerinda okuli bambega b’amagye aba CMI.

Okubafuna, waabaddewo okwekenneenya essimu ya Nagirinya ne kizuulwa nga bwe yamala okuwambibwa ku Lwokusatu nga August 28, 2019, enkeera ku Lwokuna essimu ye eraga nga baagiggyako ssente emitwalo 50 ku Mobile Money e Nateete.

Nagirinya yawambibwa e Lungujja mu kiro kya August 28, ng’ali ne Kitayimbwa eyali amuvuga.

 ngoye ezaasangiddwa mu nnyumba yabagambibwa okuba abatemu Engoye ezaasangiddwa mu nnyumba y’abagambibwa okuba abatemu.

Emirambo gyabwe gyazuulwa ku Lwokutaano nga August 30, e Nakitutuli-Nama mu Mukono. Essimu ya Nagirinya yalaze nga ssente zaggyibwayo ku Mobile Money e Nateete.

Bambega baagenze mu kifo ekyo ne bakwata addukanya Mobile Money ayitibwa Nakubulwa. Ono ye yabategeezezza nti ssente tezaggyiddwaako mukazi.

Zaggyiddwaako basajja era abamanyi bulungi bavubuka b’e Nateete. Yabuulidde abaserikale nti bannannyini ssimu atera okubalaba ku Mabiito-Nateete.

Ku Ssande ekiro, abeebyokwerinda baazinze ekitundu ne bakwata abavubuka bano. Eggulo abaakwatiddwa baabazzizzaayo okulaga gye babadde basula ne gye bassa essimu ya Nagirinya.

 asolo ku kkono ne ohnson ubega Kasolo (ku kkono) ne Johnson Lubega.

Baafunyeeko essimu emu endala yabadde tennazuuka we bwazibidde eggulo. Nga babakutte, Kasolo yattottodde ebyaliwo.

Agamba: Nze Kasolo era bwe twawamba Nagirinya nze nnavuga emmotoka ye. Kitayimbwa eyali avuga Nagirinya ye olwamuggya ku siteeringi, twamukubirawo jjeeke y’emmotoka ku kawompo n’afiirawo, omulambo ne tugussa mu bbuutu.

Bwe twava e Lungujja, emmotoka twagitwala mu Kitooro e Nateete emabega wa poliisi.

Awo we twaggyira omulambo gwa Kitayimbwa mu mmotoka ya Nagirinya ne tugussa mu ndala Prado eyalimu omukazi n’abantu abalala.

Nagirinya naye twamussa mu Prado nga mulamu. Kasolo yavuga emmotoka ya Nagirinya n’agenda nayo e Kireka (bye baakolayo tannabyogera).

 bantu nga bakuhhaanye okulaba abagambibwa okuba abatemu Abantu nga bakuhhaanye okulaba abagambibwa okuba abatemu.

Oluvannyuma n’agizzaayo e Nateete we yagisuula. Aba Prado baavuga omulambo gwa Kitayimbwa ne Nagirinya (nga mulamu) ne bagenda e Nama- Mukono, we battira Nagirinya olwo emirambo gyombi ne bagisuula mu mwala ne bagibikkako ebisubi. Mu mmotoka ya Nagirinya baanyagamu emitwalo 17 n’essimu ze bbiri.

Mu kumutulugunya baamusaba “PIN” gye baakozesa enkeera okuggyayo ssente emitwalo 50 ku Mobile Money.

Bambega baategeezezza nti abaakwatiddwa bakyalina bingi bye bababuuza okuli okwogera omugagga eyabatuma.

 ortune yebare Fortune Ayebare

 

Kasolo abadde yaakayimbulwa okuva e Luzira kyokka emisango egyamusibya gyabadde teginnamanyika.

Abatemu mu kutta Nagirinya n’okuggya omulambo gwa Kitayimbwa mu mmotoka, omusaayi gwabasammukira.

Omu ku batemu ekikooti kye yalimu yakirekawo e Nama ate abalala abaali mu Prado engoye ne bazisuula e Namanve.

Bambega nayo baagenzeeyo n’abatemu babalage we baasuula engoye. Nakubulwa addukanya Mobile Money yategeezezza nti bizinensi agikola ne bba Disan.

Edduuka lyabwe liri mu Musoke zooni. Adam Ssozi, akulira ebyokwerinda mu Musoke Zooni yategeezezza nti Nakubulwa yakwatiddwa Lwakutaano.

“Abatuuze bankubidde essimu nga bambuulira bwe waliwo abasajja b’emmundu abasazeeko Mobile Money.

Nnayanguye okutuuka ne ndaba abatuuze bange Nakubulwa ne bba nga babassa mu mmotoka Noah ne mbawondera okutuuka ku poliisi e Nateete”, bwe yannyonnyodde. N’agamba nti atwala poliisi yamukakasizza nti baliko bye babeetaaza ku buzzi bw’emisango.

James Kiganda, muliraanwa wa Disan agamba; Disan alina obuyumba bubiri obwa Mobile money, ng’akamu (akali mu langi za Airtel emmyuufu) n’akalala ka MTN.

Nakubulwa akola emisana ate bba n’akola ekiro okukeesa. Ekifo we bakolera, waliwo ebbaala nnyingi ezikola okukeesa.

 

More From The Author

Emboozi z’omuwandiisi endala

Emboozi endala

Kkooti1 220x290

Poliisi eremeddwa okutwala fayiro...

POLIISI eremeddwa okutwala fayiro eriko omusango gw’okutemula eyali omwogezi wa poliisi, Andrew Felix Kaweesi mu...

Luwum 220x290

Abattakisi beegugunze olw’okuggala...

ABAGOBA ba takisi mu ppaaka enkadde abakozesa omulyango oguli ku Luwum Street bavudde mu mbeera ne bateeka akaziko...

Namanve 220x290

Ab’e Namanve balaajanidde ab’ekitongole...

ABATUUZE b’e Namanve (Kireku leerwe) abali ku ttaka ly’ekitebe ky’eggaali y’omukka, balaajana oluvannyuma lw’ekitongole...

Remassebunnya 220x290

Eyeekiika mu bba wa Rema aggyeeyo...

OMUSAJJA eyavaayo ne yeesimba mu bba wa Rema, abamu kye baataputa ng’ayagala okugootaanya emikolo gy’okwanjula,...

Brian 220x290

Mukula atutte Bryan White mu kkooti...

BRYAN White, ebibye bibi. Kkampuni ya Capt. Mike Mukula emututte mu kkooti lwa kumuguza mmotoka ku doola 120,000...