TOP
  • Home
  • Amawulire
  • Abaserikale batulugunya batya abantu nga balinga abatalaba kkoligo lya Gen. Kale Kayihura?

Abaserikale batulugunya batya abantu nga balinga abatalaba kkoligo lya Gen. Kale Kayihura?

By Musasi wa Bukedde

Added 22nd September 2019

AMERIKA olwatadde ekkoligo ku Kayihura, n’atandikirawo okulaajana nti: Baagala kunzita, baagala kunsaanyaawo….. Simanyi oba ka ffaamu k’embuzi kano ke bannanga….!

Kalekayihuraindeepthoughts 703x422

Okulaajana kwa Kayihura kwawulikise ng’okw’omusajja eyali nnantameggwa, wabula nga bamuggunze ku ttaka batandise okumuliisa ebisubi.

Amerika yasinze kwesigama ku kya kutulugunya bantu n’okulinnyirira eddembe ly’obuntu okuteeka ekkoligo ku Gen. Edward Muhwezi Kale Kayihura n’aba famire ye.

Okulinnyirira eddembe ly’obuntu okwakolebwa aba Flying Squad nga Kayihura abukadde mu ntebe y’Omuduumizi wa poliisi bye byamuzaalidde ebitukula Makaayi by’azaala ku nsiko, ne bamulagira obutaddayo kulinnya kigere kye ku ttaka lya Amerika ate ne mukazi we n’abaana nabo tebabalabayo!

Nga Kayihura alaajanira ku ffaamu ye e Kashagama gye yeewogomye, ate abaserikale ba poliisi baatanudde buto okutulugunya nga n’omuvubuka eyabadde ateeberezebwa okwenyigira mu kubba amasannyalaze, baamukubye ng’abakuba eky’oku ttale.

Ekibinja ky’abaserikale ekirala ekyasindikiddwa okukkakkaanya enkaayana za siteegi ya takisi y’e Ntebe, nakyo be kyakutte baakubiddwa obukongovule bwonna ne basigala nga mu nsi beegomba abantu ba kika kimu kyokka - abatambula nga tebawonyera!

Kyogerwa lunye nti ensi ng’enaagwa eddalu, abalina okukwasisa amateeka be basooka okugamenya, oluvannyuma ne bawa ensonga ezitamatiza nti – ate oba ne be twabadde tukwata nabo tebaatutaddemu kitiibwa!

Eddalu lyeyongera okukula ng’abantu abo balemeddwa okulabira ku bituuse ku bannaabwe ne balinda bimale kutuuka ku bbo bennyini balyoke beekube mu kifuba nti “Gunsinze, Gunsinze, Gunsingidde ddala……..”

Okutulugunya okwo okulabibwa mu kkamera, kwegattibwako okw’ebiyumba eby’ekyama (Safe Houses) bye baagaanye ababaka ba Palamenti okulambula; eddalu ne liva mu kukula ne likaddiwa okutuuka okukootakoota nnyini.

Naye nga lwaki abaserikale abalina okukuuma emirembe ate be bayisaako ebiwandiiko ebibateeka ku ggwagi mu kutyoboola eddembe ly’obuntu! Ne bwe beegaana era abaatulugunyizibwa bavaayo bukuukuubira ne balaalika okulumiriza ba Afande abo ku kutyoboola eddembe ly’abantu e Nalufenya ne badda ne mu kati ne beewogoma.

Baganda baffe mututaase muleme kusindika nsi yaffe mu ddalu liri lyennyini ekkankada lye twalaba ku mulembe gwa Iddi Amin ng’eyali omuduumizi wa poliisi Kassim Obura akwata omusibe eyali ayimbuddwa kkooti emisana ttuku n’amutwala ne bamutta nga bakozesa piisito ya Obura yennyini.

Bwe munaaleka ensi n’eraluka etyo, eddalu eryo nammwe mujja kulirozaako nga batandise okubateekako nnatti, ensi ebafundirire nnyaabula!

Obura eyatta omusibe mu 1973 nga n’okuwaga bw’awaga nti, “Ate ababo banankola ki?” yawanikibwa ku kalabba oluvannyuma lw’emyaka 16 nga gavumenti mwe yali akolera effujjo evuddewo.

Yalaajana asonyiyibwe., naye eddalu lye yaleka okuwanika amatanga lyamutwaliramu dda!

More From The Author

Emboozi z’omuwandiisi endala

Emboozi endala

Uneb3 220x290

Ebigezo by'e Mbarara byatuukidde...

Ebigezo bya S4 ebya UCE byatuusidwa ku Poliisi y'e Mbarara nga bikuumibwa butiribiri abaserikale ba miritale...

Exams3 220x290

Ebibuuzo bya UCE 2019 bitandise...

Ebibuuzo bya S4 bitandise na kigezo kya Physics Practicals.

Buku1 220x290

Magogo azzeeyo ku butaka gy'azaalibwa...

FIFA olwamaze okumukaliga emyezi ebiri nga teyeenyigira mu mupiira, Moses Magogo, abadde pulezindeti wa FUFA, yasibidde...

Goat46 220x290

Abantu basalawo batya okwambulira...

NAYE nga ddala lwaki Bannayuganda balemwa okwambalira emikolo gy’abantu ne basalawo okwambalira embuzi obubuzi...

Kol0 220x290

Katikkiro akubirizza Bannamawokota...

KATIKKIRO Charles Peter Mayiga agambye nti ebyenjigiriza ensangi zino byetaaga okutumbula ebitone by'abaana, okubateekamu...