TOP
  • Home
  • Busoga
  • Museveni ayingidde mu lutalo lwa Kadaga ne Namuganza

Museveni ayingidde mu lutalo lwa Kadaga ne Namuganza

By Musasi wa Bukedde

Added 13th March 2018

PULEZIDENTI Museveni ayingidde mu butakkaanya bwa minisita Namuganza ne Sipiika Rebecca Kadaga obwatuusizza n’ababaka abava e Busoga okuwera Namuganza okugenda e Busoga.

Nam1703422 703x422

Namuganza ne Kadaga

Gaster Mugoya Kyawa (Bukooli North) yagambye nti Pulezidenti yayise ababaka ba Palamenti abava e Busoga okubasisinkana ku Lwokutaano, kyokka ne batasobola kuba baabadde bali mu byalo.

Yagambye nti bw’anaabayita bagenda kumubuuza oba nga y’atuma Namuganza okuvumanga abantu kuba alabika asussizza w’alina okukoma n’agamba nti; “yavuma mubaka munne Mariam Naigaga (mukazi/Namutumba) n’avuma minisita Idah Nantaba, yavuma Sipiika Kadaga, n’avuma Kyabazinga era olw’okuba kabineeti emulemeddwa ffe tulina okumusitukiramu”.

Yategeezezza nti basuubira nti Pulezidenti ajja kuddamu okubayita bamalewo obutakkaanya buno. Ensonda zaategeezezza nti Pulezidenti waakubasisinkana ekiseera kyonna wiiki eno.

Obutakkaanya bwa Namuganza ne Kadaga bwatandika oluvannyuma lwa Kadaga okukuliramu omukolo gw’okutuuza Omulangira w’e Bukono nga February 26, 2018 ekintu Namuganza ky’awakanya.

Embeera eno yawalirizza abayizi Abasoga abeegattira mu kibiina kya Basoga Nseete abasomera mu ttendekero lya Uganda Institute of Information and Communication Technology e Nakawa okusaba minisita w’ebyettaka Persis Namuganza aveeyo yeetondere Kyabazinga, Sipiika Rebecca Kadaga n’Obusoga bwonna.

Abayizi abaakulembeddwa Emmanuel Tubite Singe abaasisinkanye Katuukiro wa Busoga, Dr. Joseph Muvawala mu ofiisi ye mu Kampala eggulo, beemulugunyizza olw’enneeyisa ya Namuganza gye baagambye nti etyoboola ekitiibwa ky’Obwakyabazinga.

Katuukiro Muvawala yagambye nti naye si mumativu ku nneeyisa ya Namuganza era yasazeewo okuyita olukiiko lwa Busoga basalire wamu amagezi.

Yagambye nti oluvannyuma bagenda kuwandiikira pulezidenti Museveni akome ku minisita we.

Yasabye emikutu gy’abaawulire gyonna mu Busoga obutaddamu kuwa mwagaanya muntu yenna avumirira Kyabazinga Gabula kuba aliwo mu butuufu.

NAMUGANZA BAMWONGEDDE OBUKUUMI

Gavumenti eyongedde minisita omubeezi ow’ebyettaka, Persis Namuganza obukuumi mu kiseera ng’ababaka abava e Busoga bamwewerera nga bwe batajja kuddamu kumukkiriza kulinnya kigere Busoga.

Obutafaanana nga bulijjo Namuganza bw’abadde atambula mu mmotoka ng’alinamu omusirikale omu, mu kiseera kino alina kabangali ya poliisi emutambulirako buli w’abeera alaga. Atambula n’abasirikale abawera 10 okuva ku Lwomukaaga.

NAMUGANZA AYOGEDDE KU BUTAKKAANYA BW’ALINA NE KADAGA

Namuganza yatuuzizza olukiiko lwa bannamawulire ku Lwomukaaga n’ategeeza nti obutakkaanya bw’alina ne Sipiika Kadaga bwava ku jjoogo lye yakozesa n’agenda mu kitundu ky’akiikirira nga February 26, 2018 n’atuuza ow’essaza ly’e Nkono.

Yategeezezza nti ye mumbejja, azaalibwa mu famire ya Nkono nga tewali nsonga yandibadde etwala Kadaga mu kitundu ky’akiikirira ne famire ye nga tamugambyeko.

Yategeezezza nti baludde nga balina entalo mu famire olw’obutaba na musika gwe bakkaanyaako, kyokka kyabakubye wala okulaba nga Kadaga atuuzizza omuntu ku busika.

Abaamugobye mu kabondo ka Busoga yabiyise bya butaliimu kuba teyeetabangako mu lukiiko lwa kibiina, wadde nga baludde nga bamusalako emitwalo 28 buli mwezi.

Ssente zonna ze bazze bamutoolako ezisoba mu bukadde obutaano ayagala zimuddizibwe nga mulimu n’amagoba.

Abaamugaanye okuddamu okugenda e Busoga yabasekeredde n’agamba nti baayagadde kulaga nsi nti bulijjo waliwo ekibiina ekiyitibwa Busoga Parliamentaly Caucus.

Yategeezezza nti kimwewuunyisa ababaka abandibadde batuula ne bateesa ku bizibu bya Busoga nga kimanyiddwa ng’ekitundu ekijjuddemu envunza ezisibuka e Kamuli, ekitundu ekisinga okubeeramu obwavu, kyokka bino baabibuusizza amaaso obudde ne babumalira ku ye.

More From The Author

Emboozi z’omuwandiisi endala

Emboozi endala

Twala3 220x290

Aba UPDF balaze ebifo bye baakasuuza...

AMAGYE ga UPDF galaze ebifo ebyali eby’omutawaana bye baakasuuza abakambwe ba Al Shabab, gye baasinziiranga okulumba...

Unity 220x290

Ab’e Buvuma batutte NFA mu kkooti...

ABATUUZE abasoba mu 300 okuva mu byalo eby’enjawulo mu ggombolola y’e Buwooya mu disitulikiti y’e Buvuma batutte...

Kalekayihuraindeepthoughts 220x290

Abaserikale batulugunya batya abantu...

AMERIKA olwatadde ekkoligo ku Kayihura, n’atandikirawo okulaajana nti: Baagala kunzita, baagala kunsaanyaawo….....

Nyiiga 220x290

Poliisi esuuzizza ababbi ente gye...

ABASERIKALE ba poliisi ennawunyi basuuzizza ababbi mmotoka y’ekika kya Ipsum nnamba UAT 194J mwe baabadde batambuliza...

Noda 220x290

Mmotoka ya Kitatta nayo eri ku...

ABDALLAH Kitatta we yabeerera omuyima wa Bodaboda 2010, alina abantu naddala aba bodaboda be yanyiiza ne be yakoleranga...