TOP
  • Home
  • Ebyobulimi
  • ‘Emmwaanyi zikyaleebya ebirime ebirala mu kuvaamu ssente’

‘Emmwaanyi zikyaleebya ebirime ebirala mu kuvaamu ssente’

By Musasi wa Bukedde

Added 1st February 2016

‘Emmwaanyi zikyaleebya ebirime ebirala mu kuvaamu ssente’

Mwa2 703x422

Kasiita (wakati) ng’alaga minisita Ssempijja ( ku ddyo) ne Ssentamu ekikolo ky’emmwaanyi ekibaze.

ABALIMI baweereddwa amagezi nti nga baagala okufuna mu bulimi, bafissengayo obudde bakyalireko bannaabwe ababukoze obulungi babakopppeko obukodyo obupya.

Minisita omubeezi ow’ebyobulimi, Vincent Ssempijja n’omukungu mu kitongole ky’omutindo gw’emmwaanyi mu ggwanga ekya UCDA, Edward Lutaakome Ssentamu baasinzidde mu nnimiro z’omulimi Francis Kasiita ow’e Kizigo-Kyanjovu e Kyanamukaaka mu Masaka gye buvuddeko ne bawa abalimi amagezi okuyigira ku bannaabwe.

Kasiita yabannyonnyodde obukodyo bw’akozesezza okubaza emmwaanyi mu bungi okuva lwe yazitandika mu mwaka gwa 2000 nga wadde eza sizoni eno zaakoseddwaamu omusana naye era yazifunyeemu.

Kasiita yawadde balimi banne amagezi nti okufuna mu mmwaanyi balina okuziwa obudde obumala nga tebaziganyiza ddala kumeramu muddo ate n’okweyambisa ebigimusa mu bipimo ebituufu n’agamba nti omumwe asinga kweyambisa busa ng’atabuddemu ebigimusa ebizungu.

Kasiita agamba nti ye obulimi yabufuulira ddala mulimu mw’assa ssente ng’akimanyidde ddala ze zinaamukolera amagoba n’agamba nti emmwaanyi takyazirabamu buzibu. Aweza yiika 11.

Minisita Ssempijja yakkaatirizza ekibalo kya Pulezidenti Museveni ky’asinziirako okwettaniza abantu obulimi bw’emmwaanyi nti buli kikolo kivaako kkiro 10 sso ng’eza Kasiita zivaako kkiro 25. “Singa mu buli kyalo tufunako abalimi 20 abaweza yiika y’emmwaanyi ne bazikola ku mutindo ng’ogwa Kasiita, ng’ekikolo kimu kivaako kkiro 25 awatali kulonzalonza obwavu mu bannansi bufuuka lufumo”, Ssempijja bwe yagambye.

Omukungu wa UCDA, Ssentamu yakunze Bannayuganda bagoberere ekisinde kya Pulezidenti Museveni ku byobulimi naddala obw’emmwaanyi nga baziwa ekifo kya ku mwanjo kubanga gye bakoma okuzikuumira mu mutindo n’amagoba gye gakoma obungi.

Mw. Ssentamu yayongeddeko nti emmwaanyi tebalina kuzigayaalirira kuba ky’ekirime kyokka omuntu ky’akaddiwa nakyo ng’akiganyulwamu n’akirekera abaana n’abazzukulu nabo ne bakyeyagaliramu. ATE abalimi mu disitulikiti y’e Mayuge bafunye ente 52 okuva mu pulogulaamu ya Operation Wealth Creation okulwanyisa obwavu mu bantu.

Ssentebe wa disitulikiti y’e Mayuge, Omar Bongo Muwaya ye yakulebeddemu okugaba ente ng’ali wamu ne RDC Sulaiman Ogajjo Barasa. Muwaya yasabye abaafunye ente zino obutazitunda kubanga kizuuliddwa nti abantu bangi be bawa ebintu okuva mu Gavumenti ng’ente, embuzi n’ebirala bamala ne babitunda

More From The Author

Emboozi z’omuwandiisi endala

Emboozi endala

Bow 220x290

Owebyokwerinda atulugunya abantu...

Abaakakiiko ka LC bagobye owebyokwerinda lwa kwenyigira mu bikolwa ebimenya amateeka. Bakkiriziganyizza ne basaba...

Go 220x290

Obukadde 60 zifudde ttogge: Ekyuma...

GIWEZE emyaka musanvu nga Museveni awadde abavubuka b’omu disitulikiti y’e Kamuli ekyuma ekyaluza enkoko beekulaakulanye....

Emery1 220x290

Emery atadde abazannyi 7 ku katale...

Emery, ayagala kuggumiza ttiimu ye sizoni ejja era agamba nti abamu ku bazannyi b’alina, tebajja kumukolera k'abatunde...

Kib1 220x290

Abakungubazi bakubaganye empawa...

Abakungubazi bakubaganye empawa ku nfa y'omugagga Kiriggwajjo!

Nanyinittakamarynagaddyabamuwujjaazirisewebuse 220x290

Abatuuze mu maka 1000 e Mukono...

Amaka agasoba mu 1,000 e Mukono paasika teyabawoomedde oluvannyuma lw’okulabulwa okusengulwa nga tebabaliyiridde...