TOP
  • Home
  • Emboozi
  • Abasamize kati bakolagana n’abatunda ettaka okufera abantu!

Abasamize kati bakolagana n’abatunda ettaka okufera abantu!

By Musasi Wa

Added 4th February 2015

Abafere ennaku zino bakwataganye n’abasawo b’ekinnansi okubba n’okutunda ebintu by’abantu. Bwe bakikola ennaku zino, omusawo akupapya oleete ssente, oluvannyuma n’akuzigirira agula ettaka bwe bakolagana olwo ne bakubbira awo. Kalondoozi wa Bukedde atandise okuwandiika ku kakundi k’abafere abakolaga

2015 2largeimg204 feb 2015 091412263 703x422

Abafere ennaku zino bakwataganye n’abasawo b’ekinnansi okubba n’okutunda ebintu by’abantu. Bwe bakikola ennaku zino, omusawo akupapya oleete ssente, oluvannyuma n’akuzigirira agula ettaka bwe bakolagana olwo ne bakubbira awo. Kalondoozi wa Bukedde atandise okuwandiika ku kakundi k’abafere abakolagana okubba abantu.

James Kato ( yansabye erinnya lye ettuufu ndisirise kubanga ajja kuswala nnyo mu mikwano gye n’abaana!) bw’akunyumiza engeri gye baamuferamu ssente obukadde obusoba mu 150 toyinza butawulira nnaku:
Banfera ne nkimira kubanga biswaza! Erinnya ly’Omuganda eddala liyitibwa ‘Binsangawano’, nange nja kutuuka ku kituufu, nzuule oba ne ku beng’anda kuliko abirimu.

Twali tubeera Jjokolera era tulinayo ettaka ddene. Erimu lyange, eddala lya baaluganda. Twazaalibwa abaana mwenda naye kati twasigalawo omuggalanda ne mwannyinaffe Kigongo.

E Jjokolera tulinawo ettaka ddene, naye lyonna si lyange. Erimu ndikuumira abaana ba baganda bange abaafa. Nze nnasenga e Jjokolera okutandika okulabirira ettaka block 102.

Nnaalongo wange emmere ye baali bagibba kuba yalinayo ebikajjo bingi, n’asalawo okugenda ew’omusamize e Matugga ayitibwa Lubande Nkonge afuneyo eddagala ly’ababbi.

Kyokka mba ndi waka ng’omusamize agguse n’abuuza omukyala gy’ali! Ne mmulagirira mu kisenyi gye yali naye ne nsigala nga nkyewuunya omusawo okujja okutunoonya! Era akawungeezi ako Nnaalongo yagenda mu ssabo lya Nkonge, bwe yakomawo yasaba emitwalo 28 nti za kugenda mu ‘lukiiko’. Olukiiko lwe njogerako lwa bajjajja! Sso nga yasooka kusaba 40,000/- Nnaalongo n’azimuwa.

Omukyala nnamulabula nti batubba naye n’agaana okumpuliriza. Twagendera ku kya babbi, naye bwe twatuukayo, Nkonge n’atufulumyako katono mu ssabo. Okudda nga waliwo ekisanduuke (kiringa kigoma) ekiggule nga mulimu ssente nnyingi nnyo. Omusawo oyo yatugamba nti mulimu obukadde bwa ddoola busatu! Nneewuunya jjajja okuba ng’amanyi okwogera ddoola!

Yatusaba ‘omutabulo’ gwa bukadde 14, nti olwo ssente ziyingire mu musaayi gwaffe, tugaggawale obulamu bwaffe bwonna! Olwo n’agattako nti tulina okwebaza, okuba n’omwanirizo, amagi ga mmaaya n’ebirala bingi. Ndi musajja wa ssaayansi, era mmanyi waliwo ebisoboka n’ebitasoboka, era nnakimanya nti batubba!

Omusawo Nkonge yaleeta ekirowoozo nti bwe tuba tetulina ssente tutunde ku ttaka. Yiika y’e Jjokolera egula obukadde 70 naye nze eyange nnagitunda obukadde 32. E Jjokolera nninayo ettaka eryange ne lye nkuumira abaana ba baganda bange. Omusamize ono Nkonge yaleeta emmotoka ewange n’ekisanduke era ne tussaamu ssente ezo.

Naye okugenda okugiggula nga bwe yatulagira nga ssente teziriimu! Oluvannyuma waaliwo ‘olukiiko’ olulala, ebintu ne byerwanya mu ssabo. Olwo omusamize n’agamba nti tujja kwetaagayo amajiini kuba abatuli obubi bamaanyi nnyo! Okumala emisoso gyonna byaggweera mu bukadde 28 ne tuwummula.

Ssente ezaasigalawo ku bukadde 32 ze nnawaayo nnagulamu ssimu ne mbala nti yiika yange egenze bwetyo!
Ne Nnaalongo wange yali abiwummudde naye waayitawo ebbanga ttono ne bantemula. Nnafuna ekirowoozo nti osanga omusamize Nkonge, ssentebe w’e Jjokolera ne baddiira b’ettaka baalaba ettaka lyaffe ne baagala okunzigyawo balyezze.

Twadduka e Jjokolera baleme kututemula. Nnina abaana bataano, bonna bawala era mwe tubadde tubeera. Ebya poliisi n’e kkooti nnabivaako kubanga baavuluga omusango gwonna.

Lumu Nnaalongo yang’amba nti yafuna omusajja gwe yawulira ku Beat FM. Oyo omusajja yatulaga bookisi ya ssente ne ntegeeza Nnaalongo nti batubba. Era naye yatugamba nti byetaagamu omutabulo.

Omusamize oyo ye yaleeta ekirowoozo tutunde ku ttaka, tufune omutabulo gwa bukadde 130. Mbu mu ziri ssente ez’omu kibookisi z’olabye, otabulamu ezizo, ssente ne ziyingira mu musaayi n’obeera mugagga ebbanga lyonna!

Twayombera awaka ekiro kyonna, naye obudde bwagenda okukya nga nzikakkanye, ne ng’amba mukyala wange tutoole ku ttaka lyaffe yiika mukaaga tuwe omusawo. Omusawo ono yeeyita Matendeke. Naye olulala yeeyita Gaboggola, abeera Nansana. Erinnya lye ettuufu ye Shafik Ssekitooleko. Okutegeera erinnya lye ettuufu nnamulaba ku Bukedde nga waliwo omusuubuzi gw’afeze obukadde 400!

Ssente obukadde 130 twazissa mu ssanduuke ye n’agamba nti ajja kuzituleetera na buli kati. Nnatunda ettaka kusanyusa mukazi, aleme kulowooza nti nnalemererwa. Omusajja gwe twaguza ettaka lyaffe ye Mahad Katamba, era omusamize gwe yamuleeta.

Katamba ssente teyazimalaayo, nnasigala mu banja lya obukadde 14. Olwo lwali July wa 2013. Nkyewuunya na buli kati, muba mukyala wange yasomera mu Amerika, nange ntambuddeko naye baatufera ogwokubiri ne tutakimanya!

Bwe mmanja Katamba yalema. Nga wayise omwaka gumu nnakubanga essimu nga takyazikwata. Olulala omuntu yakwata essimu n’ang’amba nti ye Bashir Yiga (bakolera ku kizimbe ekinene ekitunudde mu poliisi y’e Kawempe. Ekizimbe kya Katongole eyafudde ennaku ezo. Edda waaliwo obupande bungi obwa Mahadia Properties, kati baamuggyawo naye ofiisi yasigalawo.

Yiga yang’amba nti Mahad Katamba yalwala n’agenda e Saudi Arabia okumujjanjaba. Yagamba nti ye y’ajja okusasula ebbanja, naye yayogerako obukadde mwenda zokka. Mu August w’omwaka oguwedde nnakuba ssimu ya Mahad, omuntu eyagikwata n’ang’amba nti Mahad baamukwatira e Dubai naye baweerezza balooya okumuwolereza.

Mu December wa 2014, mu ofiisi y’emu nnasangamu akalenzi akalala ne njogera nako, oluvannyuma Yiga n’ankubira n’asuubiza okuleeta ssente zange.”

Mahad Katamba bwe nnayogedde naye yang’ambye: Nze ndi muguzi wa ttaka era nfuna babbulooka okuva mu Uganda yonna abankubira kubanga balina ennamba yange. Ggwe nga bw’oli omuwandiisi w’amawulire nange bwendi omuguzi w’ettaka.

Omusajja oyo Kato (erinnya ettuufu nnalisirikidde) mmumanyi, nnamugulako ettaka n’asigala ng’ammanja obukadde 8. Bwe kiba nga musamize Gaboggola ye yanzigirira ettaka lino nze ssaakimanya, bonna mmanyi babbulooka ba ttaka, n’ab’e Kasese bankubira. Ssente Kato sizimuwanga kubanga twakkaanya nti tulansifa bwe ziriggwa olwo nga mmalayo ssente. Bw’aba ayagala atunule ku ndagaano gye twakola.

Omusamize eyasooka yali yeeyita Ssaalongo Lubande Nkonge. Yateranga okubeera ku leediyo ya Beat. Abeera Matugga ku lw’e Ssemuto.

Olulala omusajja yava Kkooki, nga yeeyita Joseph era n’aggyayo mangu paasipooti ye okugindaga. Yang’amba nti, ‘Matendeke yakubba, naye ajja nnyo ewange e Kkooki mmuwe amaanyi’. Yang’amba nti bwe mmuwa ku ssente ajja kuntereereza ebya Matendeke. Naye nze kati nkimanyi, nti bonna bakolagana, bonna babbi.

Sarah Namugabi gwe baagala okutwalako ennyumba

Bagezi nnyo, boogera naawe bulungi era bw’okkiriza okubawuliriza bayinza okukukola kyonna kye baagala. Nze ndowooza nti abadde ssentebe w’e Jjokolera, Ssekitooleko, abibaddemu nnyo naye ennaku ezo yadduka e Jjokolera n’agenda mu Lukoola naye yakwata sseng’enge n’asiba ebibanja by’abatuuze ne bamutwala ntyagi.

Ssaalongo Nkonge

Bwe nnakubidde Nkonge yagamb ye: Mmaze emyaka 20 nga ndagula, naye siferangako. Omusajja oyo Kato (erinnya nnalikyusizza) mmumanyi, naye mukyala we yandeetera ensonga era nnina bwino kuba baawandiika mu kitabo ky’abagenyi. Bansaba kutta bantu, abawera nga munaana naye nze ne ng’aana kuba sitta bantu!”

Bwe nnamubuuzizza lwaki teyabaloopa ku poliisi kubanga okutta omuntu musango yang’ambye nti yagendayo, kyokka yagaanyi okumbuuluira poliisi ki gye yaloopa, na lwaki Kato ne mukyala we tebaabakwata. Ebya ssente yabyegaanye!

 Sarah Namugabi

Ono ye nnannyini nnyumba ey’e Mpunga ekiri Wakiso Town Council. Omukazi ayitibwa Fiona Mbabazi yamufera ennyumba ebalirirwamu obukadde 500, kyokka nga Mbabazi agyagala ku bukadde 50. Abinyumya bwati:

Bwe nnatadika okunoonya omukozi, waliwo eyamundagirira e Masaka ne mmuleeta mu November wa 2014 n’atandika okunnyamba ku mirimu gy’awaka.

Wabula yali yaakamalawo ennaku nga nnya zokka, olumbe olutaategeerekeka ne lumukuba nga 21 November. Olw’okuba nnali sirabangako lumbe olw’ekika kino, kyandeerera okutya.
Nasalawo okuyita muliranwa wange annyambeko oba ye yali alutegeera. Kyankuba ensinsi okugamba nti ekyo kyali kitambo ekirya n’abafu!

Yang’amba nti waliwo omusawo gwe yali amanyi ayinza okuggyawo ekitambo kino era mu kudda yaleeta n’omusawo Jjajja Kalooli. Bwe bwe yatuuka yatugamba nti ekitambo kino ekyali kikutte omukozi tekyali kya mukozi wabula baali bakisindikidde ffe ab’omu nnyumba.

Olw’okuba ebintu by’okweraguza nnali sibimanyi, nnasooka kubiyita bya lusaago. Nagenda okulaba ng’omusamize agamba twali tugenda okufa ffenna mu nyumba kyokka nga n’omukozi yali tannaba kudda ngulu. Yasalawo amutwale ewuwe mu ssabo gy’aba amujjanjabira nti kubanga ejjiini lyali lya maanyi.

Olw’okuba ng’omwana baali bamunkwasizza ewaabwe, nnali sisobola kumuleka yekka nga ntya nti baali bayinza okumusaddaaka ne nsalawo okugenderako.

Bwe yatuuka yamuyingiza mu ssabo lye erisangibwa ku Mango shad e Wakiso- Kyoga. Mwe yamuyingiza mu ssabo nze nnali ng’aanye okuyingira wabula ne bankaka kubanga ebintu byali byaffe sso si bya mukozi. Ebintu byatandika okwogera nti byava Mityana, nti byajja kutwavuwaza n’okumalawo emirimu gyaffe.

Byatandika okwogera nti nti byali byagala embugo 80 nga buli lumu lwali ku 20,000/- ezo 1,600,000/-. Nnasooka kugaana wabula ekyasinga okuntengula omutima waliwo omwana wange eyali alwadde olususu ne bigamba nti bye byali bimulwazizza era nti yali agenda kufa!

Nakkiriza okunoonya ssente kubanga byali biyingiddemu obulamu bw’omwana wange. Awo yatandika okunsaba ssente ez’okumukumu nga bwe ndeeta kino ansaba endala. Ssente ze nnasaasaanya zaali ziweze ng’ obukadde mukaaga kyokka n’ansaba obukadde obulala butaano n’ekitundu okuggyawo ejjini eryo eryali lyagala okukutta.

Okumanya omusamize ono Jjajja Kalooli mufere, bwe yalaba ng’anzibye nnyo, yasalawo okuntuma ssente enzungu eza (doola) nti bajjajja ze baagala. Nange nnamusasira amagezi ne ng’enda ne nvungisa ssente ze ne mmuleetera doola 50.
Baatuzza mu ssabo ne balagira abalala okukyuka batunule ku kisenge ne baddira doola zange 50 ne baziteeka wansi olwo waggulu ne basaawo amawulire.

Ekyewuunyisa baagenda okuggyawo amawulire nga doola zeepanzeewo nga nnyingi nnyo, ssaamanya we zaava! Bang’aana okuzikwatako ne bamala ne bazizza mu kaveera.

Nnali mmanyi nti ekyo kiwedde kyokka Jjajja Kalooli n’addamu n’atugamba tunoonye ssente z’okukola emikolo giggwe. Natandika okwekengeera kubanga yali yaakatuggyamu obukadde nga mukaaga ate ng’atusaba ssente endala.

Nasalawo obutaddamu kukwata masimu ge kubanga nnali nzudde nti atubba, nga buli lwe tugendayo atubuzaabuza.
Nnali ndi awo omusajja n’ankubira essimu nga simumanyi n’ang’amba ngi yalina bye yali ayagala okumbuulira naye nga bya kyama. Yang’amba nti yali akubidde Bakka ku Lubiri.

Yang’amba nti yali musawo wa kinnansi, nti waliwo omusajja gwe bayita Jjaja Kalooli yali agenzeeko ewuwe ng’anoonya amaanyi ng’ayagala kukyusa ‘nnyota’ ye edde ku yaffe. Ennyota ssaakitegeera, naye ne nsigala nga mmuwuliriza!
Yantegeeza nti yali ayagala kututunza ebyaffe byonna ne ssente amale azibbe. Yang’amba nti ye Mulindwa Motomoto eran’andagira ntwale famire yange annyambe omusajja aleme kututunza bintu byaffe.

Bwe nnatuukayo e Bakka ku Lubiri, yang’amba nti Jjajja Kalooli musajja mufere nnyo era nti amaanyi g’akozesa agaggya wuwe. Yatutwala Mende e Mabunga nti kubanga e Bakka waliwo abantu bangi.
Mulindwa Motomoto oluusi asula kumpi ne Mango Shade e Wakiso era alinawo ne loogi! Avuga emmotoka UAW 180K ey’ekika kya Toyota Mark 11.

 

Yatugamba nti Jjajja Kalooli yatusindikira ejjiini eriyitibwa Lukanga n’agamba nti lye lisinza amaanyi mu nsi yonna, yaliggya Tanzania! Era n’atandika okulyogeza n’alibuuza kye lyali lyagala ne ligamba nti “nze njagala byange bye bantumye”! Baalibuuza ebibyo bitya ne ligamba nti obukadde 150 ze lyagala.

Motomoto yeefuula nti atuwolereza ng’aligamba nti abaana baveeko, mubaggyeeko ssente nnyingi kiki kye mubaagaza naye ne lyerema.

Twabagamba nti ffe tetulina ssente ezo olwo bajjajja ba Motomoto ne bagamba nti baali batuteereddewo obukadde 40 olwo ffe tunoonye 110. Nabagamba nti n’ezo nnali sisobola kuzifuna olwo bajjajja ne baddamu n’obukambwe nti “temusobola kutunda nnyumba yammwe”!

Nadda eka nga tewali we nnyinza kuggya ssente era bwe twaddayo bajjajja ba Motomoto ne bagenda nga batwongerezaako okutuuka ku bukadde 75 nti kubanga bo baakisa nnyo!

Baawunzika batugambye tunoonyeeyo obukadde 30 bawe ejjiini eryo ligende naye nago nga tetuzirina. Motomoto yatugamba nti yali asobola okutufunira abatuwola obukadde 30 tutaase ennyumba yaffe.

Ennyumba ya Sarah Namugabi e Wakiso

Twali twakavaayo ne wajja omusajja eka n’atugamba nti waliwo eyamugambye ennyumba bagitunda. Yatugamba nti atuwa obukadde 15,0 ffe ne tugaana kubanga twali tetwagala kutunda ate nga ne ssente ezo ntono nnyo.

Bajjangawo abantu bangi nga tubagoba, bwe twadda ewa Motomoto yatugamba nti ennyumba eyo Jjajja Kalooli yagissaamu ebintu y’ensonga lwaki tetufuna atuwola.

Waayitawo ennaku ntono ne wajja omukyala Phionah Mbabazi n’atugamba nti yali ayagala kutuwaamu nnyumba ndala atwongere ssente wabula ffe ne tugaana.

Mbabazi yadda n’omusajja omulala ne batandika okukwata ebifaananyi, nze nnalowooza nti baali baagala pulaani y’ennyumba.

Oluvannyuma Motomoto yaleeta abasajja abalala okuli Hajji Mahad Katamba n’omusajja omulala gwe nnategeerako erya Swaibu era bajja ne Mbabazi ne batugamba nti baali bagenda kutuwola ssente naffe ne tukkiriza.

Twali tukkiriziganyizza ne Katamba kyokka bwe twagenda e Kampala okutuwa ssente olwo Mbabazi ye yatuwa. Baasooka ne batuwa obukadde 22 wabula Motomoto yazibba ng’akozesa olukujjukujju bwe yeefuula omusambwa n’atubbako ssente mu nyumba.

Ku ndagaano gye twakola nga batuwola ssente, Mbabazi yatugamba nti yali ajja kutuwa obukadde 30 wabula nga tuzzaayo obukadde 50 era endagaano twakola yaakutunda era Mahad Katamba yali nga mujulizi.

Nga 10 January 2015, obukadde obulala 8 baabutuweera wa byakwerinda ku kyalo Tadeo Luyimbaazi wabula nazo ne bazibba.

Twali tukyali awo Mbabazi n’ajja ng’agamba nti ayagala kuyingira ennyumba ye gye yagula.
Yadduka ku poliisi e Wakiso n’akolagana n’akulira bambega ba poliisi ayitibwa Mbungu ne batuggulako omusango gw’okusaalimbira ku nnyumba ye ku CRB009/2015.

Obukodyo bwe baakozesa okutwala ennyumba

PHIONA MBABAZI

Ekituufu abantu abo banguza ennyumba eyo era be banneegayirira kubanga baalina ebizibu bye bagamba nti baalina okubimaliriza amangu.

Nze nnali ng’aanye nga ndaba obukadde 50 bwe baali batunda ennyumba zaali ntono kyokka ne bankakasa nti tebafaayo kasita bamala ekizibu kyabwe.

Wabula bwe nnatuuka okuyingira ennyumba, nneewuunya okuba ng’ate bagiremeramu. Bwe nnabatwala ku poliisi y’e Wakiso, waliwo omuserikale Norah Mbawuwo eyadda ku ludda lwabwe n’annemesa okuyingira ennyumba.”

Wabula bwe nnamubuzizza enkolagana gy’alina ne Mahad Katamba eyalabika ng’omujulizi ku ndagaano gye yakola, yasoose kutamwatamwa oluvannyuma n’antegeeza nti oyo yali amuyambako buyambi kubanga ye amanyi nnyo eby’okugula ettaka n’amayumba.

Mahad Katamba

Katamba yantegeezezza nti si ye yagula ennyumba eyo, nti era ku olwo lwe baagula teyali mu Kampala. Kino kyewuunyisa kubanga omuntu ataali mu Kampala lwaki Mbabazi tyandimutadde ku ndagaano z’obuguzi, wadde teyassaako mukono gwe!

Katamba yang’amgbye nti Mbabazi amumanyi nga mukwano gwe ali mu bizinensi y’okugula ettaka kye kyokka.

TADEO LUYIMBAZI (wa byakwerinda ku kyalo)

Nze kye mmanyi nti mukyala Mbabazi yagula ennyumba eyo kubanga nze omu ku baakola endagaano wabula simanyi bwe kyajja okuba nga be yagulako baalemera mu nnyumba eyo.

NORAH MPAWUWO ( Ono ye OC wa Wakiso).

Bwe nnabuzizza OC ono ku nsonga z’abafere bano ze yakolako edda yantegezezza nti,”Nze ensonga ezo nnazivaamu!’
Abalala

Ebibuuzo
Lwaki mu nsonga z’obufere buno, Mahad Katamba omuguzi w’ettaka y’azibaamu omuli n’endala ze tutannaba kwanjulira musomi waffe?

Mukisa ki gw’alina okufuna ettaka lino ku bbeeyi ey’enseko kyokka oluvannyuma ne libaamu enkaayana?
Poliisi eva etya mu nsonga z’obufere buno ng’ate bangi ababbiddwa y’evuluga emisango oluusi n’okubaawo nga ssente ziwaanyisibwa?

 

Wiiki ejja tujja kukulaga ebifaananyi by’abafere bano bonna n’engeri gye bakolaganamu ne poliisi okufera n’okuzizika emisango.

 WIIKI ebbiri eziyise Bukedde abadde akuwandiikira Kalondoozi ku ttaka erigambibwa okuba nti Hajj Kasule yaliwamba okuva ku bamulekwa ababiri okuli Annet Nassozi ne Sylvia Nakate bawala b’omugezi Israel Tambi.

Ettaka lino lisangibwa ku Block 9 Poloti 922 ku luguudo lwa Sir Apolo mu Kampala, lyali lya mugezi Yosia Makonzi Lutalo nga yalifuna mu 1921 y’omu kubaami abaafuna ettaka mu bitundu ebyenjawulo nga ne ku Sir. Apolo Kaggwa yalinawo ettaka lino eliriko obuzibu okusinziira ku muzzukulu we Blesburg Ssesanga owe Kyaliwajjala ono nga Mutabani wa Herbert Lutalo Ssemambo.

Ssessanga agamba nti Jajjaabwe Yosia Makozi Lutalo yazaala abaana abasoba mu 10 abawala n’abalenzi, bweyafa yasikirwa mutabani we Israel Kikomeko Lutalo era nga y’eyabeera nga ku ttaka lino erisangibwa ku Sir Apolo.

Ono yazaaa abaana Basatu okuli Israel Ntambi, Nassanga ne Nakate wabula nga bonna bagezi yali yasikirwa mutabani we Ntambi era nga ku ttaka ery babeera ngawo ne nyaabwe Night Zawedde Lutalo eyafa mu 2009.

Wabula omu kubawala ba Naght Zaweede Lutalo ayitibwa Nasanga yaguzaawo kitaffe ate nga naye yali kitaawe omuto ayitibwa Herbert Lutalo Ssemambo mu 1988.

Nassanga bweyali atunda ettaka lino waliwo okusika omuguwa wakati we ne nnyina ate nga yali atuukiridde taata aligule yakkiriza okuligula kuba lyali ttaka lya Kitaawe Yosia  Makozi Lutalo nga singa yali agaanyi okuligula yali akyasobola okuliguza omuntu omulala neliva mu family era mu kuligula yaligula agamba ndaba ttaka lyakitange.

Ebiseera ebyo taata yalina Looya eyali amukolera ku bintu gwenzijukirako erya Kaweesi ate Nasanga yali akola mu Lands newankubadde maama we yali tayagala atunde yali asobola okuguzaawo omuntu omulala yenna.

Godfery Mpiima Ssentebe w’ekyalo: Abasamize bano bajja mu o isi yange ku bye nnyumba eno wabula nga si balambulukufu kubanga baleeta endagaana yaabwe nga eraga nti yakolebwa mu balooya wabula bwe nagitunulako salabako linnya lya kkampuni yaba looya.

EDWARD MUYONJO ATUBBAKO ETTAKA LY’OKU SIR APOLO.

Taata bweyafa mu 1993 ffe twali tumanti nti ebyo byaggwa Nasanga bweyafa mu 2003 ate nga ne taata eyagula yali yafa mukadde Night Zawedde Lutalo yasalawo atutwale mu kooti asobola okununula ettaka lya bba.

Taata bweyafa mu 1993 ettaka twalizza mu mikono gy’abadiministrator okwali mutabani we omukulu Sam Balwana Makonzi, mukwano gwa kitaffe Joseph Serwanga ne mukyala we nyaffe Esther Nakafeero wabula nga mukiseera kino Nakafeero yasigaddewo ku basatu.

Zawedde bwagenda mu kkoti Twadduka netugenda mu kkoti nga Sam Makozi yeyagendayo bwatuuka ewa looya waffe Kaweesi ne Edward Muyonjo gyeyali akola nga Junior Lawyer bweyali tannaba kudda mu Jombwe and co. advocates, bweyatulaba yatwaguyira natutegeeza nga bwajja okutuwoleza ate yali mukwano gwa Sam Makonzi kuba naye yali asula kyaliwajjala ebisera ebyo.

Bwetwagenda mu kooti omusango yaguwoza naguwangula, olwo nga yatusaba dda ekyapa awoze nga akirina ebiseera ebyo Samu Makozi eyali omukulu weyafiira era nga nemuyonjo yali asasuddwa sente zeyakozesa ng’awoza omusango.

Olwo kooti yali eragidde Mukadde Night Zawedde Lutalo okusasula ensimbi ezaali zonooneddwa mu musango gweyawaaba negumusinga era Muyonjo namubalira sente z’alina okusasula namugamba nti bwezikulema okusasula ekibanja kifuuka kyange.

Era twafuna kooti order ejjawo omukadde ono wabula awo Muyonjo yali atandise okwefuula nga ye Nannyini so nga yali akolera ffe era olunakuolumu yagenda nayagala okukoona enyumba abatuuze nebamugobayo bugobi.

Twatandika okubanja ekyapa wabula ng’atubuzaabuza ekyavaamu nga atandika kutubuzaabuza ko ffe kwekumugamba nti twafunye ayagala okugulawo nga twagala tumujjeko ekyapa bwetagendayo yakijjayo nakitulaga naye teyatukkiriza ku kikwatako twamugamba nti omusajja agenda kutuwaamu obukadde 200 natutegeeza nti waliwo Hajji agenda okutuwaamu sente enyinji.

Naye nga ffe amagezi getwalina kwali kutuwa kyapa kyaffe wabula nakiremera era ekyaddirira nga atandika ku twegaana nga bwatatumanyi era tetulina kyetumubanja olwo yali atuusebye sente okugezaako okutulemesa wabula nga buli zaasaba tuzimuwa era ezasem=mbayo yatusaba emitwao 30.

Wabalukawo okusika omuguwa ogwamaanyi wakati waffe ne Muyonjo atuddize ekyapa kyaffe mu 2005-6 wabula byonna byaggwa butaka era twanugamba nti atuwe ekyapa tusalileko mukadde Zawedde ataundu waba agira nga asigadde wabula muyonjo yatutegeeza nta bwatasobola kubaako kyamuwa buli omu neyeebuuza nti ate muyonjo yafuukaddi nannyini ttaka lino olwo ng’alitwalira ddala ng’erirye.

Mu biseera ebyo nga tukyali mu kukaayana waliwo Pasita Robert Kanaabo yali ayingiddeko mu ttaka lyaffe era bweyakubwa kyazuulibwa netumutwala mu kooti bwetwatuuka mu kooti yatusaba ensonga tuzimalire wabweru  yatubuuza mbawe sente meka twamusaba obukadde 3.

Kubukadde owbo yatuwaako kakadde bwewayitawo ekiseera nga netuddayo okumubanja yatulaga kyapa natugamba ntiyasasula dda MuyonJo sente ezaasigalayo namukwasa ekyapa, wabula nga tekuli adiminisituleeta kyokka nga maama yaliwo yadde ababiri baali baafa dda buli omu yasigala yebuuza ngeri gyeyafunamu ekyapa.

Zaawedde bweyafa mu 2009 lwetwakizuula nti Edward Muyonjo yali tatunda dda ettaka lyaffe nga yaliguza Haj.  Dirisa Kasule kuba omukadde okwafa mu naku bbiri zokka nga amaze okuziikibwa yatwala tulakita n’akoonawo enyuma yonna eyalimu ebisenge 13.

Era Hajj. Bweyali akoona enyumba yagamba abaana Nassozi ne Nakate nti bajje ewaffe kuba yali atuwadde obukadde 700 netumuguzaawo kyokka nga naffe tetwamuguza yengeri gyebabbamu ettaka eryo Muyonjo twamutwala mu Law Cancel naye twewali kyakolebwa wabula nga yabba ettaka lyaffe mu lukwesikwesi kati tuwulira Hajj. Yaddukanyizaako emirimu gye.

Twagezaako okugendako ku poliisi tulabe nga tutuuka mu kooti wabula omusirikale eyali akola kunsonga ze ttaka ku poliisi ya CPS mukampala nga mukiseera kino akolera ku Jinja road Rith Kintu yatugamba nti agenda kukola okunoonyereza era nga namusaba ne fayiro y’omusango nagamba nti aja kugimpa nga amaze okunoonyereza wabula nabyo tebyatambula bwenaddayo yangamba nti fayiro y’akusooka kunoonya nagenda okuddamu okuwulira nga bamukyusa ali ku Jinja Road.

Abasamize kati bakolagana n’abatunda ettaka okufera abantu!

More From The Author

Emboozi z’omuwandiisi endala

Emboozi endala

Kazi 220x290

Eyandesa omulimu ansuddewo

NZE Mediatrice Kubwimana 28, nzaalibwa Burundi naye nga mbeera Namugongo Zooni II. Mu 2011, nafuna omulimu gw’obwayaaya...

Civil 220x290

Omukazi atagambwako yali antamizza...

ENNAKU gye ndabidde mu nsonga z’omukwano mpitirivu era nabulako katono okugwenenya.

Funa 220x290

Eyantwala ku yunivasite yanzitattana...

NZE Jennifer Alwoch 26, mbeera ku kyalo, Adyel mu Lira. Bazadde bange bampeererako okutuuka mu S6 naye ssente ezinyongerayo...

Ssenga1 220x290

Lwaki mpulira sirina maanyi ga...

SSENGA mpulira nga sirina bulungi maanyi ga kisajja. Naye bwe neegatta amaanyi ngafuna bulungi naye ndowooza nti...

Ssenga1 220x290

Ensundo ya muganzi wange entiisa...

SSENGA nnina omuwala gwe njagala naye alina ensundo empanvu ku kisambi. Mugamba agende mu ddwaaliro agamba nti...