TOP
  • Home
  • Kalondoozi
  • Lwaki omugagga Drake Lubega asengula ab’e Lweza mu ngeri y’okunyigiriza?

Lwaki omugagga Drake Lubega asengula ab’e Lweza mu ngeri y’okunyigiriza?

By Musasi wa Bukedde

Added 14th September 2017

AMAKA agawera 10 e Lweza ku lw’e Ntebe galindiridde okusengulwa omugagga w’omu Kampala, Drake Lubega mu ngeri y’okunyigiriza.

Drakelweza1 703x422

Amayumba Drake g’ayagala okusenda e Lweza.

AMAKA agawera 10 e Lweza  ku lw’e Ntebe galindiridde  okusengulwa omugagga w’omu  Kampala, Drake Lubega mu ngeri  y’okunyigiriza.

Kalondoozi wa  Bukedde alaze engeri amateeka  g’ebyettaka gye gamenyebwa  abantu abamu ne watabaawo  kibakolebwako. 

ETTEEKA lya Uganda ligamba nti  abantu abali ku ttaka bwe liba litundibwa  nnannyini lyo be basooka  okuweebwa omukisa ne beegula. 

Wabula ebiseera bingi kino si  bwe kikolebwa, nnannyini ttaka  olw’okulowooza nti abeebibanja tajja  kubafunamu ssente ze yeetaaga,  abayita ebbali n’alifunira omugagga  aligula, olwo landiroodi omuggya  n’akozesa obukambwe bwonna  bw’asobola okusengula abeebibanja,  oluusi ng’abadondodde  ng’abawaamu ssente ezitasobola  yadde okuzimba ekisenge ekimu! 

 rake ubega Drake Lubega

 

Kino bwe kiri ne mu mugagga  w’omu Kampala, Drake Lubega  asengudde famire 10 mu Lweza  A mu munisipaali ya Makindye-  Ssaabagabo mu disitulikiti y’e  Wakiso. 

Abatuuze bali ku ttaka liwezaako  disimoolo 85 kyokka abamu  abawadde obukadde bubiri, abalala  obukadde mwenda ng’agula ebibanja  byabwe wamu n’amaka, sso nga  we yagula mu bukyamu kubanga  abeebibanja tewali yabawa mukisa  kwegula, wali mu kibuga. 

Abatuuze bagamba nti baagezaako  okwegula ku nnannyini ttaka,  Eric Zimula wabula n’abalemesa  oluvannyuma lw’okukolagana ne  Drake Lubega n’alimuguza. 

Abatuuze bagamba nti Drake  Lubega ne kayungirizi we Mwebaza  Kayumba bazze babatiisatiisa  ng’ettaka bwe liri erya Pulezidenti  Museveni, nti era bwe batakkiriza  ssente zonna ze banaaba babawadde,  bajja kuviiramu awo! 

BADRU KATAMBA 

Poloti yange nagigula nga November  14, 2015 eriko obuwanvu  bwa ffuuti 45 ku ffuuti 36 ku ffuuti  20, nagigula obukadde butaano. 

Ng’omuvubuka nnali njagala  kuwona bupangisa era ssente  ezaagulawo nazifuna mu bugubi nga  nzisonda okuziweza.

Ku ntandikwa  y’omwaka guno, twatandika okuwulira  olugambo nti nnannyini ttaka  ayagala kutundawo.

Twamutuukirira  n’atugaana okwegula kwa ssekinnoomu  ng’ayagala ettaka alitundire  wamu.  Yatugamba nti twesonde awamu  tuweze obukadde 150 ffenna abatuuze  atuwe ekyapa buli omu yeesaleko.

  Twatandika okusala amagezi  okulaba nga tusonda ssente era  twali tugenda okumuwa ssente ate  n’aguza omugagga Drake Lubega  era ono yamulabula nti tatwalagala  ku ttaka lye.

  Yatugamba nti tukkirize ssente  zonna z’anaatuwa wabula ekyasinga  okututabula kwe kulaba ng’atuwa  ssente za kujereegerera.

Mu poloti  yange gye nagula emyaka ebiri egiyise  ku bukadde butaano, ayagala  kumpa obukadde bubiri.

Nagezaako  okumugamba nga bwe kitasoboka  wabula yahhamba nti ettaka ennaku  zino lyagwa ebbeeyi! 

Ekizibu kino tekyatuuka ku nze  nzekka wabula ne batuuze bannange  ssente z’abawa ntono nnyo. Twasalawo  okwogera naye nga twagala waakiri  twegule n’atugamba nti buli poloti ayagala  okwegula asasule obukadde 150  kyokka ye twawulira nti ettaka lyonna  yaligula obukadde 190 ng’akimanyi  bulungi nti kuliko abeebibanja. 

 mayumba agoolekedde okusendebwa e weza Amayumba agoolekedde okusendebwa e Lweza.

 

Drake yatandika okuyiwa ettaka  n’okusenda nga poloti ezimu bwe  twagezaako okumugamba nga bwe tujja  okwekubira enduulu n’atugamba nti  tewali we tuyinza kwekubira nduulu ne  tuyambibwa kubanga ettaka ly’agula lya  Museveni! 

Kino kyatiisa abamu ne bakkiriza  ssente entono kubanga ebya Uganda  ennaku zino bimanyiddwa, bakusengula  n’akatono ke wandifunye n’otokafuna. 

Sarah Nalubega eyabadde ku ffuuti 50 x40 ne 32 yamuwadde  obukadde 9 mu ngeri  y’okunyigiriza era n’akkiriza. 

Bwe yayiwa ettaka mu poloti  yange nagenda ku poliisi y’e  Kajjansi ne nzigulawo omusango  gw’okusaalimbira mu poloti yange  ku fayiro nnamba SD/11/7/2017  wabula poliisi bajja ku poloti  yange wabula bwe baayogera  n’omugagga Drake, fayiro yakoma  awo teyaddamu kutambula. 

Nakanda kwewuuba ku  poliisi nga buli omu anneesamba.  Nabadde ndi awo Drake Lubega  n’ajja n’akulira poliisi y’e Kajjansi,  Hassan Musooba ne bankwata ne  bantwala ku poliisi. 

Drake yansabye endagaano ne  mmulaga enjokyemu n’agigaana.  Bwe nagenze okuleeta eteri njokyemu,  nasanze ku poliisi taliiwo,  nagenze okutuuka ku poloti yange  ng’amaze okusenda ennyumba  yange gye nnabadde nzimba!’ 

SAM LUBEGA 

Nze nninawo amayumba ga  mirundi ebiri, awamu waliwo  amayumba g’amaduuka gali ku  poloti eri ku ffuuti 50x100 ate  amalala gali ku poloti ewezaako  ffuuti 65x100 era wano we  nkulidde kubanga ekibanja kino  kyali kya bazadde bange. 

Baganda bange nabo balinako  ebibanja era abamu be baguzaako  abalala.

Amayumba ge nninako  gali ku luguudo era bagapangisa  ssente eziwera wabula kyanneewuunyisa  okulaba nga omuntu  ava eri atandika okutusindiikiriza  nga tulinga abaafuna ebibanja  bino mu bukyamu. 

Ekisinga okwewuunyisa  Drake olunaku lwe yagula ettaka  lino naffe lwe lunaku lwe twali  tugenda okwegula kubanga twali  tukkaanyizza ne nnannyini ttaka  okumuwa obukadde 150 olwo ffe  tunoonye engeri gye twewaamu  ebyapa okusinziira ku buli bunene  bwa poloti buli omu bw’alina. 

Drake bwe yagula yatutegeeza  nti asinga kwagala abali oludda  lw’emanga era abamu yabasasula.  Ekisinga okunnuma nze  amayumba gange ku poloti zombi  ngabaliriramu obukadde obusoba  mu 300 kyokka ye ayagala kumpa  obukadde 150.

DERRICK LULE

Nnannyini ttaka bwe yagaana  okwegula kwa ssekinnoomu,  twasalawo tutuule ng’abatuuze  tumuwe ssente ez’awamu nga bwe  yali ayagala.  Ssente ze twakkaanyaako  bwe zaawera, tuba tugenda  okuzimuwa waliwo eyatemya ku  mugagga eyapaaza ebbeeyi, n’awa  Zimula ssente ezisinga ku zaffe ze  twali tukkaanyizzaako. 

Bwe baayiwa ettaka mu poloti  ya Katumba n’agenda ku poliisi  y’e Kajjansi, kayungirizi wa Drake  ayitibwa Kayumba yatwatulira nti  tutawaanira bwereere okugenda  ku poliisi kubanga DPC w’e Kajjansi  baali bamulabyemu mu  ngeri ey’enjawulo era twali tetujja  kuyambibwa. 

 muserikale owemmundu akuuma rake wamaze okusenda Omuserikale ow’emmundu akuuma Drake w’amaze okusenda.

 

MWEBAZA KAYUMBA 

Ono ye kayungirizi  w’omugagga Drake Lubega.  Bwe namubuuzizza ku nsonga  zino ez’okugamba nti ettaka lino  lya Pulezidenti Museveni n’okuba  nga yagamba ng’aba poliisi  bwe baabawa ssente, Mwebaze  yabyegaanye n’agamba nti okwo  kwonoona linnya lya mukama we  kubanga ettaka lino Drake yaligula  era n’asasula abantu abamu  ne bagenda abalala tannaba  kubasasula era ajja kubasasula  essaawa yonna. 

KU POLIISI E KAJJANSI 

Atwala poliisi eno, Hassan  Musooba bwe namubuzizza ku  nsonga z’ettaka lino yajulizza mukama  we, omuduumizi wa poliisi  eno (DPC), Hillary Mukiiza.

Ono  bwe namubuuzizza yagambye  bwati;  Ensonga ezo sizimanyiiko era  tezijjanga ku poliisi yaffe mpozzi  nga baatuula eyo ne bazimalira  eyo. 

Oyo bbulooka agamba nti  bampa ssente tammanyi na bwe  nfaanana wabula bakozesa amannya  g’abantu okufuna bye baagala. 

Bw’aba nga Drake asenda  poloti z’abantu nga tebamaze  kukkaanya, oyo yeetaaga kukwata  bukwasi kubanga ky’akola  kimenya mateeka. 

 

GEORGE SSEKANDI 

Ono ye ssentebe w’ekyalo era  yagambye: Ffe aba LC obuyinza  bwaffe bukoma mu bibanja, bwe  butuuka mu ttaka ebyo bibeera  bya kkooti. Waliwo omukyala  omu eyajja nga yeemulugunya ne  mmusindika ku poliisi. 

Obuzibu obuliwo abantu abatunda  tebakyajja mu ofiisi zaffe  wabula babikolera mu balooya.  Nnaakafuna okwemulugunya  kwa muntu omu yekka. 

DRAKE LUBEGA 

Bwe nabuuzizza omugagga  Drake Lubega, yantegeezezza  nti ye e Lweza takimanyiiko  nti alinayo ettaka noolwekyo  tamanyi kyakukolera bantu abo. 

Wabula okusinziira ku ndagaano  gye nalabyeko ng’agula poloti  ya Sarah Nalubega eyakolebwa  nga July 21, 2017, kyankakasizza  nti ddala Drake ye yagula ettaka  lino.  Endagaano eno eri wakati  wa Sarah Nalubega ne Drake  Lubega akasanduuko 2839 Kampala  era yamusasula obukadde  9.

Endagaano eno yakolebwa  mu ofiisi ya bannamateeka ba  M/S Kirumira &Co. Advocates  abasangibwa ku Jesco Plaza plot  10 Wilson Road. 

Looya Adam Kirumira yasoose  kugamba nti ensonga ezo  talina ky’azimanyiiko mbuuze  Drake Lubega kennyini wabula  bwe namutegeezezza nga bwe  nnina endagaano nga zikoleddwa  kkampuni ye eya M/S Kirumira&  Co. Advocates yagambye bw’ati;  Endagaano ze nakola ku bantu  abaamuguza ebibanja, bannannyini  bibanja bennyini bajja mu  offisi yange ne bazikola. 

Baali baamala dda okutegeeragana  era nze ssaaliyo nga  bategeeragana wabula nakola  kya kukola ndagaano ne babawa  ssente.  Abo abagamba nti babanyigiriza  sibimanyi kubanga abajja  wano bajja beeyagalidde era  beereeta bokka.

Sirina kirala kye  mmanyi kikwata ku bantu abali  ku bibanja ebyo era ebikolebwayo  sibimanyi. 

ERIC ZIMULA 

Ono ye nnannyini ttaka  eyatunze ab’e Lweza. Bwe namubuuzizza  ensonga eyavuddeko  okutunda abatuuze yantegezezza  bwati; 

Abatuuze nabawa omukisa  beegule naye ne balemererwa.  Namala ebbanga ddene nga  mbagamba naye nga tebafaayo. 

Kituufu nagaana okwegula kwa  ssekinnoomu kubanga  abasenze baali boonoonye  ettaka lyange nga batunda  bupoloti obutono obutakkirizibwa  kufunako kyapa  mu mateeka. 

Ekirala abasenze bwe  baali batunda ebibanja,  tebaasookanga kuntegeeza  nze nga nnannyini ttaka  ekintu ekimenya amateeka  ne nsalawo okuguza musenze  munnaabwe Drake  Lubega kubanga naye  yalinako ekibanja. 

Munnamateeka Antony Wameli owa Wameli &  Co Advocates agamba nti  okusinziira ku mateeka,  oweekibanja bw’aba talina  ssente za kwegula, asobola  okutegeeragana ne nnannyini  ttaka n’amusalako  akatundu n’amuwa ekyapa  oba okusigala ng’asolooza  busuulu oba okukkiriziganya  n’amuwa ssente  z’ekibanja n’amuviira. 

Wabula ssinga oweekibanja  takkiriziganya na  ssente nnannyini ttaka  z’amuwa mu kibanja, buli  omu asigala w’ali.

More From The Author

Emboozi z’omuwandiisi endala

Emboozi endala

Isco 220x290

Isco agenda ku 'kiso'

Abakungu ba Real Madrid baategeezezza nti abasawo beekebezze Isco, ne basanga ng'alina okulongoosebwa mu bwangu...

Mic3webuse1 220x290

Bayiiyizza sigiri eneetaasa obutonde...

Obutonde bw'ensi busaanyiziddwaawo abantu mu kwokya amanda, okutema enku n'ebirala ng'obwetaavu bw'okuyiiya ebintu...

Butwa2 220x290

Babateze obutwa mu busera, omu...

EKIKANGABWA kigudde ku kyalo Katuulo mu ggombolola y'e Kyazanga mu disitulikiti y'e Lwengo omuntu atanamanyika...

Nakiwala 220x290

Nakiwala avuddeyo ku mwana omubaka...

Minisita Nakiwala Kiyingi waakukaka omubaka Onyango okulabirira omwana gwe yasuulawo.

Kambale1 220x290

KCCA etandika ne Soana, Villa ne...

Okusinziira ku nsengeka ya liigi eno eyafulumiziddwa Bernard Bainamani agikulira eggulo, bakyamipiyoni ba sizoni...