Abantu 40 baasingura Ekiterekye Kya Christmas ekya Radio West na TV West

N’ebya ANDREW TUSHABE

Abanyamugisha 40 boona abahurikiriza ba Radio West n’abareebi ba TV West, obwa hati nibateera kyakuniini bwanyima y’okusingura ekiterekye kya Noohiri omukaruuru akazaano k’okusingura ebiterekye aka TV West na Radio West.
Akaruuru k’okutoorana abasinguzi kaakorwa omu puroguraamu ya Omushongi omu ihangwe ry’eriizooba ahakitebe kikuru ekya Vision Group omururembo Mbarara

Mutabazi Wilson, Chairman Board Mwizi Sacco naatoorana omusinguzi. PHOTO: ANDREW TUSHABE

Akazaano aka akeetsirwe Ekiterekya kya Christmas kamazire wiiki 2 obwo kagyendereire kurongoora abahurikiriza ba Radio West n’abareebi ba TV West kubaruhuuraho ahaburemeezi bw’embeera etanguhi ey’okugura ebintu bya Noohiri n’okubakyendeereza ahanshohoza omubwire bw’okujaguza obu.

Kusingura, amatu obaire oine kugatega reediyo Radio West reeru amaisho okagazoorera aha TV West reeru okakwata obwire obu ekyeshongoro kya Christmas Nungi ekya Emily Kikazi. Orikwenda kuza omukazaano k’abasinguzi abaire naateera esimu agambeira abaheereza ebiro n’obwire obu ekyeshongoro eki kizaaniiremu. Na bwanyima ataaha omukazaano aka.

Eriizooba eihangwe ry’eriizooba, abantu 40 nibo baaba abanyamugisha bakeesingurira ebiterekye omukazaano akashagikirwe Coca Cola, Amity Realtors Limited, SILGAD Investments na Mwizi SACCO; boona abatwire nibaranga kandi nibakwatanisa na TV West na Radio West kumara akaire

Michael Jackson Kakaire, Coca Cola Area Sales Manager arikugaaniiraho na Lithan MC barikuza kutandika kusherura abasinguzi ba Ekiterekye. PHOTO: ANDREW TUSHABE Ahead Of The Draw. 1

Okurugiirira ahari Philbert Akankwatsa, orikutebeekanisa za puroguraamu aha Radio West, kandi nabwo obaire naashugaanisa akazaano aka, n’omucwe gwa Radio West kurongoora abahurikiriza baayo barikubasiima ahabw’obushagiki bwabo obureeteire Radio West yaaguma eyebembeire ezindi kumara emyaka erikurenga 24. “Tutwire nituha abahurikiriza baitu ebiconco kubeebaza ahabw’okuguma naitwe. Ninyenda kugaruka nkahamiza abantu boona ngu titurikukoma aha. N’omwaka ogurikwija nitwija kuba nitujaguza emyaka 25 y’obuheereza burungi munonga kandi nihaija kuba hariho n’ebindi biconco nyamwingi by’abahurirkiriza baitu kusingura,” Philbert nikwo yayongyeraho.

Michael Jackson Kakaire, orikukurira eby’okuguza omu Coca Cola omuri Mbarara eriizooba yaagambira TV West ngu okugarurira ba abarikubashagika obuby’obushuubuzi n’omucwe gwabo. “Obu buri obwire bw’okuha, buri omwe nabaasa kugira eki yaaha mutaahi we. Mbwenu tucweiremu kukwatanisa na TV West na Radio West ahabw’okuba abahurikiriza n’abareebi baabo nib a ‘kasitoma’ baitu,” nikwo Kakaire arikugira.

Orikukurira akakiiko k’abeebembezi ba SACCO ya Mwizi, Wilson Mutabazi yaagira ngu Radio West n’ey’amaani omuri Burengeyrwa-izooba kandi batwire nibakwatanisa kumara obwire buraingwa n’ahabw’ekyo baaba baine kukoresa akagisha na munonga omubiro bikuru ebi kumanyisa ba memba baabo ku bariyo, barikukoresa oburango oburikuba niburabaho omukuranga akazaano aka obundi na ‘kasitoma’ baabo nabo bakaaganyirwa omuri eki.

Kandi we Atwine Ruth, orikukurira eby’okuguza omu SILGAD INVESTMENTS, abarikukora viinyo ya Red Star Wine, St Peters Altar Wine hamwe n’ekyokunywa ky’entuurire yaagira ngu bwanyima y’okukwatanisa n’okuranga na Vision Group kumara emyaka erikurenga omuri 7, omurundi tigwo baaba baine kuburaho.
Aba Amity Realtors Limited, abarikuguza bakagura amataka n’ebyombeko omuri Mbarara na disiturikiti ezehinguririize nabo bashagikire akazaano aka kandi orikukurira eby’obutare bwabo, Herbert Tushabe, yaayoreka okushemererwa agumize ngu ebintu nk’ebi ni bimwe ahabigyendererwa by’ekitongore kyabo. “Kwongyera ahari ekyo, tucweiremu kukoresa TV West na Radio West kwendeza abantu baitu ebiro bikuru ebirungi n’omwaka ogw’ihoreere,” nikwo Herbert arikugira.  

Ebiterekye ebirikwija kuheebwa abasinguzi baabyo ebiro 22.12.2023 ahambuga za Vision Group omuri Booma, Mbarara birimu emiceeri, ebyokunywa nka za soda kuruga omu Coca Cola, esaano y’oburo, buto, omwonyo na shukaari, amagyani, enkoko n’ebindi bingi

#WestUpdates