Omufeere yakwatwa arikwenda kutwara omurwaire omubafumu – Mbarara

Omufeere yakwatwa arikwenda kutwara omurwaire omubafumu – Mbarara

N’ebya Christopher Ahimbisibwe

Eriizoba, abakumi b’eirwariro erihango erya Mbarara Referral bakwata omukazi owamanywa nka Doreen Amutuhaire owaaba nabihabiha abarikujanjaaba omukazi oine endwara ya stroke, obwe arikubashaba ngu bamutware ow’omufuumu omuri Mitooma kumutambira.

Halson Kagure omugambirizi w’eirwariro eri naagira ngu aha shaaha 9 z’eihangwe, bakwata Doreen Amutuhaire otwire omu eirwariro eri kumara ebiro bishatu arikweyeta omujanjaabi. 

Ogu atwire nabihabiha abarikujanjaaba omurwaire Annet obwo arikubagiira ngu aine omufuumu w’amaani omuri Karoza omu disiturikiti ya Mitooma disiturikiti orikubasa kutambira omuntu waabo.

Doreen Amutuhaire owaakwatwa

Bintabara Mwetise omwe ahabanyabuzaare ba Annet, naagira ngu batwire omu eirwariro kumara wiiki yoona barikutunga obujanjaabi.

Beitu omukazi Doreen obaire nayetwaramu nk’omunyabuzaare kandi oine omurwaire omu eirwariro niryo rimwe, atwire nabihabiha abajanjaabi obwe arikubashaba sente zirikwingana miriyooni 2 ngu aine omufumu orikwija kutambira omurwaire waabo. 

Ogu bwanyima y’okumukwata, bamubuza eki abaire nakora omu eirwariro nikwo kugiira ngu abaire nakora nka agenti w’omushaho w’ekiraguju orikukorera emirimo ye omuri Karoza Mitooma Disiturikiti. 

Obufeere bw’ekiika nk’eki omu eirwariro erihango erya Mbarara butwiremu ahu abantu barikwija  bakatandiika kubiha biha abarwaire hamwe n’abajanjaabi nangwa na bamwe nibahiika aha kweyeta abashaho. 

Aho niho Kagure arikushaaba abo boona abarikuba beizire omu eirwariro kuba abegyendesereza. 

Omukazi ogu bwanyima y’okumucondoozaho bamukwasa pooriisi ya Mbarara eyamutwara kwongyera kumucondoozaho n’okumanya abu atwire nakora nabo.

#WestUpdates