Enyonyi y’okubanza eya Uganda Airlines kuruga Uganda ehiikire Mumbai, India

Enyonyi y’okubanza eya Uganda Airlines kuruga Uganda ehiikire Mumbai, India

N’ebya Angella Naturinda

Enyonyi ya Uganda Airlines eizooba erya nyomwabazyo ehiikire omuri Mumbai, India bwanyima y’orugyenda rw’ashaaha 5 n’edakiika 30.

Enyonyi egi eya UR430 etsimbwire ahakishaayi ky’enyonyi ekya Entebbe ahari shaaha 7 z’eihangwe.

Orugyendo oru rusiibwirwe entumwa ya India omuri Uganda, Upender Singh Rarat, Minisita w’eby’enguuto n’entambura, Gen. Katumba Wamala hamwe n’orikukurira ekitongore ekya Uganda Airlines, Jennifer Bamuturaki.

Enyonyi egi kuruga Uganda na India niyo nyonyi yakabiri eya Uganda Airlines kuza aheeru ya Africa kandi n’eya 12 bwanyima y’okutongozaho orugyendo kuruga Uganda kuza Dubai.

Prof. Joyce Kikafunda, entumwa ya Uganda omuri India agiizire ngu okutongozaho orugyendo kuruga Uganda kuza India nikiza kutunguura enkwatanisa ahagati y’amahanga gombi.

#WestUpdates