Abantu ba Bunyoro bakiire Minisita Balaam omu kitiinisa.

N’ebya Yosam Gucwaki

MASINDI

Minisita w’eihanga ow’enshonga z’eminyeeto n’abaana oheerize kutooranwa, Balaam Barugahara ayakiirwe omu kitiinisa enkuyanja y’abantu b’omu kyanga ekya Bunyoro.

Abeebembezi b’eby’obutegyeki kuruga omu bicweka bitari bimwe by’eihanga, abakuru kuruga omu bukama bwa Bunyoro-Kitara, aba Pooriisi, abaserukare b’amahe ga UPDF n’abatuura beerundaniire aha kishaayi kya Booma omu munisiparite ya Masindi nyomwebazyo 01/04/2024 ahi Balaam Barugahara abaire atebeekaniise omukoro gw’okusiima Ruhanga.

Atakahikire aha kishaayi kya Booma, Balaam abandize yayakiirirwa ahari Kafu ahi okutambura kw’abantu baingi kuza omu tauni ya Masindi kutandikiire kkandi ayegaitsirweho enkuyanja y’abatuura b’omu kicweka ekyo.

Abeebembezi batari bamwe omuri Bunyoro basiimire Purezidenti Yoweri Museveni ahabw’okutoorana Balaam nka minisita barikugira ngu ahairwe minisiture ei arikwijuramu gye kandi emushemereire.

Omukoro gw’okusiima guhikirweho abeebembezi b’amadiini, abany’ishengyero barikurenga 20, enganzi y’eihanga, Ribinah Nabbanja, ba minisita 7 abarimu Lillian Aber, Florence Namboozo, Henry Okello Oryemu, Matia Kasaija, Mary Mugasa, Fred  Byamukama hamwe na Sarah Mateke.  

Aha mukoro ogu, Ceeyamaani wa disiturikiti ya Masindi, Cosmas Byaruhanga ashabire enganzi y’eihanga n’aba minisita abandi okuhwera disiturikiti ekabaasa kutunga purogyekiti ez’amaani nk’okwombeka eirwariro rya disiturikiti erya Masindi, akatare k’omurembe, amarwariro ag’ahansi, amashomero ga seed schools n’ezindi.

Omuny’ishengyero-kazi ahabwa Masindi, Florence Asiimwe ashabire Balaam okutaho oburyo akarwanisa enshonga ezirikuteganisa eminyeeto omu bwebembezi bwe.

Balamu Barugahara, ashabire enganzi y’eihanga okuhisya amashanyarazi g’eihanga omu bicweka by’omu Munisiparite ya Masindi ebitagiine.

Nabbanja, ashabire Balaam Barugahara obutamara obwire bwingi ari omu ofiisi beitu ahikye omu bantu amanye ebizibu ebirikubateganisa.

Nabwo araganiise kukuratiriza enshonga y’okwombeka eirwariro erya disiturikiti, okubangura eminyeeto omu myoga etari emwe, okurwanis obworo, obushomankuzi, abaishiki okutwara enda bakiri bato n’ezindi.

Minisita w’eby’esente, Matia Kasaija araganiise kukorera hamwe na Balaam kureeba ngu Masindi nayo yaganyirwa omu purogyekiti ez’amaani.

Nabbanja obaire ari omugyenyi mukuru aha mukoro ogu ashabire Balaam Barugahara obutamara obwire bwingi ari omu ofiisi beitu ahikye omu bantu amanye ebizibu ebirikubateganisa.

#WestUpdates