Abantu 60 bafeeriire omuri butandu z’ahanguuto omu wiiki emwe.

N’ebya Godfrey Kigobero    

Abantu barikurenga omuri 60 bafiire kandi abanda 338 batungiire obuhuta omuri za butandu z’ahanguuto ezibaire omu wiiki emwe kuruga ebiro 22/10-28/10/2023.

Aha bafiire, abantu 25 babaire nibatamburira ahari boda-boda kandi 8 babaire bari abashaabazi reero 32 babaire nibatambuza ebigyere.

Omugambirizi wa Pooriisi ahabw’ekitongore kya Pooriisi y’eby’ahanguuto, Micheal Kananura naagira ngu zimwe omuri za butandu nizigyekyererwa aha kuvuga siipidi erengire hamwe n’okugyezaho kuraba aha biruka ebindi omu bushobya.

Agambire ebi aharw’okubanza obu abaire ari omurukiiko rw’abanyamakuru orwa buri wiiki orw’ebitongore by’okwerinda orubaire aha kitebe kikuru kya Pooriisi omuri Naguru, Kampala.

Michael Kananura, Omugambirizi wa Pooriisi y'eby'ahanguuto. Photo By Mpalanyi Sentongo

Kananura, ashabire abavugi b’ebiruka okwerinda okuvuga siipidi erengire hamwe n’okureeba ngu bakoresa endeberwamu eziri aha biruka byabo Kwenda kwerinda z’abutandu ezi. 

Okurugiirira ahari Kananura, abavugi b’ebiruka tibashemeriire kuraba aha motoka ezindi (overtaking) aha myanya nka; zebra crossings, junctions, ahanshozi, omukoona n’ahandi.

Kananura naagura ngu okubura kukuratira ebiragiro ebi nikyo kikanyiise z’abutandu z’ahanguuto omu eihanga.

Okurugiirira aha minisiture y’eby’amagara, Uganda neshohoza esente zirikurenga shiringi trillion 7.5 kuragurira abantu abarikuba batungire z’ahanguuto n’aha maato buri mwaka.

Minisiture neshaba gavumenti kurugayo ekataho oburyo bw’okukyendeza ahari za butandu ezi.

#WestUpdates