TOP

Ebiragiro by'akakiiko k'amasaza bitemyemu abaddukanya ttiimu

Added 12th July 2020

EBIRAGIRO by'akakiiko k'amasaza bitemyemu abaddukanya ttiimu ezenjawulo ng'abamu babiwagira ,ate ng'abalala bawera kubisimbira kkuuli.





N'abakungu ba ttiimu z'amasaza bagumu nti bakwetaba mu mpaka z'omwaka guno ez'amasaza wadde ng'ebiragiro ebyabaweereddwa akakiiko akadduaknya empaka z'amasaza ku ky'okwetangira ekirwadde kya COVID-19 bigenda kubakosa mu by'ensimbi. 

Bano  okwetemamu kiddiridde ssentebe w'akakiiko k'amasaza Sulaiman Ssejjengo okuvaayo ku Lwokutaano emisana n'asaba abaddukanya ttiimu z'amasaza okulaga engeri gye zeteseteese okuzannya empaka z'omulundi guno wakati mu kugoberera ebintu ebigenderedwamu okwetangira ekirwadde kya COVID-19 bino wammanga ; 

1.Ebifo abazannyi mwe banaakumirwa nga temutuukamu bantu. 

2.Ebisaawe ttiimu zabwe mwe zinazannyirwa nga tebikirizibwaamu bantu omuli abawagizi n'abategekeramu emikolo okutuusa empaka lwe zinaggwa. 

3.Entambuza  babazannyi etebateeke mu bulabe nga bagenda okuzannya emipiira gino.  4.Eddwaaliro eri ku mutendera gwa Health Center iV n'okusingawo. 

5.Ttiimu y'abasawo abagenda okukebera n'okulondoola abazannyi n'abanabeera ku ttiimu .  6.Okulaga entegeka y'ebyokwerinda egenderedwaamu okuziyiza abawagizi okuyingira mu nkambi y'abazannyi .  7.Okuteekawo ebikozesebwa ebinamala abazannyi okweewala embeera y'okubigana ku  tiimu. 

Era ebiragiro bino bye bitemyemu abakungu bano (abaddukanya ttiimu z'amasaza)  abakulembedwa ssentebe wa Buweekula  Edward Mawanda eyawakanyiza eky'okukugira abawagizi okuyingira mu bisaawe ng'agamba nti kigenda kukosa ebyenfuna byabwe kubanga ssente ezisoba mu bitundu 95 ze bayingiza mu ttiimu zabwe ziva mu bawagizi.

Era n'awabula ab'akakiiko okusooka okutuula nabo banoonye engeri entuufu gye bayinza okuzannyamu empaka zino ng'abawagizi mwe bali mu bisaawe. 

Wabula abawagira ebiragiro by'akakiiko okwabadde omuwandiisi w'esaza lya Bulemeezi Andrew Walakira ne ssentebe wa ttiimu ya Gomba Mansoor Kabugo bategeezeza nti wadde nga bamaze dda okukola loosi (wakati mu kwetegekera empaka z'omulundi guno) nti kyokka  beetegefu okugondera ebiragiro bino ku lw'obulungi  bw'okusobozesa empaka zino okubeerayo n'okuwa abazannyi babwe omukisa okuzeetabamu . 

"Tuli mabega w'ebyasalidwaawo akakiiko kubanga tetumanyi ddi ekirwadde kino lwe kinagwaawo ,bwatyo Walakira bwe yategeezeza.  Empaka z'omulundi guno zisuubirwa okuzanyibwa mangu ddala nga gavumenti ezzemu okukiriza eby'emizannyo okuzanyibwa era ng'ezomwaka oguwedde zawanguddwa Bulemeezi eyakubye Busiro ggoolo 1-0 ku fayinolo e Namboole .

More From The Author

Emboozi z’omuwandiisi endala

Emboozi endala

Naro eweze okutumbula ebyen...

EKITONGOLE ekivunaanyizibwa ku kutumbula omutindo gw’ebyobulimi n’obulunzi mu ggwanga ekya National Agricultural...

Ekizimbe kye bazimbisa ebyuma.

Zimba ennyumba ng'okozesa e...

OKWETOOLOOLA ensi  yonna okugula ettaka n'okuzimba kufuuse kwa buseere. Ye bwe byegasseemu ekirwadde kya COVID...

Ssemugenyi mu nkoko ze ez’amagi z’alunda.

Okulunda enkoko kunnyambye ...

OBULUNZI bw'enkoko mulimu ogwetaagamu obuyiiya bw'oba waakugufunamu. George Ssemugenyi, 60, omutuuze e Mpangala-Buddo...

Kigongo.

Gwe nnafuna okuwona obuwuul...

BW'OSANGA omuvubuka ng'alemedde mu buwuulu tomunenya. Abakazi abamu tebaafuna kubuulirirwa era tebamanyi ngeri...

Amurit (ali mu bigere) mu mmisa gye yeetabyemu mu Eklezia ya Christ the King e Kabaale.

Amuriat alumbye Museveni ok...

PATRICK Oboi Amuriat, avuganya ku bwapulezidenti ku kaadi ya FDC alumbye Pulezidenti Museveni olw’okweggyako egimu...