Omutendesi Byekwaso yeggyeeko ekikwa ky'obutawangula kikopo mu za CECAFA
Dec 09, 2023
OMUTENDESI wa ttiimu y’eggwanga ey’abasajja abatasussa myaka 18, Morley Byekwaso yenaazizzaako ennaku y’okumuyeeya nga bw’alina ekikwa ky’obutawangulira ttiimu za ggwanga kikopo buli bw’azibeera mu mitambo.
By Gerald Kikulwe
Journalist @New Vision
CECAFA U18 Boys Championship 2023
Uganda 2-1 Kenya (Fayinolo)
Ekifo ekyokusatu
Tanzania 3-1 Rwanda
OMUTENDESI wa ttiimu y’eggwanga ey’abasajja abatasussa myaka 18, Morley Byekwaso yenaazizzaako ennaku y’okumuyeeya nga bw’alina ekikwa ky’obutawangulira ttiimu za ggwanga kikopo buli bw’azibeera mu mitambo.
Abatendesi abaabaddeyo.
Lyabadde ssanyu ggyereere eggulo (December 8, 2023) nga Uganda abatasussa myaka 18 bateekawo kyafaayo bwe baasitukidde mu kikopo ky’empaka za CECAFA U18 Boys Championship 2023 omulundi ogwasookedde ddala mu byafaayo.
Uganda yamezze Kenya abategesi bwe yabavudde wansi n’ebakuba ggoolo (2-1) ng’eyita mu ggoolo ya Batiibwe Okello mu ddakiika eye 77 ne Hakim Mutebi mu ddakiika 30 azaayongeddwa mu 90.
Omutendesi Byekwaso
Eddakiika 90 zaggweeredde mu maliri (1-1). Munnakenya Syphas Owuor Otieno ye yasoose okuteeba mu ddakiika ettano ezaasoose mu muzannyo guno.
Baabadde ku fayinolo eyanyumidde ku kisaawe kya Jomo Kenyatta Mambo Leo Stadium mu kibuga Kakamegga ekya Kenya.
Mu mpaka zino, Uganda yakulembedde ekibinja B n’obubonero 6 bwe yakubye South Sudan (2-0), Zanzibar (2-1) ate ne bakubwa Tanzania (1-0). Ate ku semi baawanduddemu Rwanda ku ggoolo (1-0) okwesogga fayinolo gye baakubidde Kenya (2-1).
Omutendesi Byekwaso abadde afuuse oluyimba obutawangulira ttiimu za ggwanga bikopo zonna z’azze abeerako. Ye yali omutendesi nga ttiimu y’abasajja abatasussa myaka 20 bakubwa Ghana (2-0) ku fayinolo za AFCON mu 2021.
Mu October w’omwaka guno, Byekwaso yakwasibwa ttiimu y’eggwanga enkulu (The Cranes) ng’omutendesi ow’ekiseera ng’adda mu bigere bya Milutin Sredojevic Micho eyakwatibwa ku nkoona olw’omutindo gw’ekiboggwe.
Byekwaso yadduumidde Cranes n’eremererwa okuwangulayo wadde amaliri gonna, teyasobodde wadde okuteebayo ggoolo bwe yakubiddwa Mali 1-0 nga October 13 ku Stade du Mars mu kibuga Bamako ate bwe baasisinkanye Zambia yabakubye 3-0 nga October 18 ku kisaawe kya Al Hamriya mu kibuga Sharjah ekya Buwalabu (UAE).
No Comment